Jose Mourinho arashaka Cristiano Ronaldo mu kipe ye ya Fenerbahce

Cristiano Ronaldo, umunya-Portugal w’imyaka 39 w’imyaka, akinira ikipe ya Al-Nassr yo muri Saudi Pro League kuva muri Mutarama 2023. Icyo gihe, yari amaze gusesa amasezerano ye na Manchester United.

Amasezerano ye muri Al-Nassr ararangira muri Kamena 2025, ariko kugeza ubu nta kintu cyagaragajwe ku kongera amasezerano. Ibi byatumye amakipe atandukanye atangira kumutekerezaho, harimo n’iyi kipe ya Fenerbahce itozwa na Jose Mourinho.

Nk’uko byatangajwe n’itangazamakuru ryo muri Turukiya, Mourinho yahisemo gutera intambwe ya mbere ngo amenye icyerekezo cya Ronaldo. Bivugwa ko uyu mutoza yamuhamagaye amubwira amagambo asize umunyu: Ati"Ushimishijwe no kuba hariya? biravugwa ko ushaka kuhava. Niba utekereza kuhava, wakwifuza kuza muri Fenerbahce?"

Ntabwo Mourinho yahagarariye aho, kuko umuyobozi wa siporo wa Fenerbahce, Mario Branco, bivugwa ko yaganiriye na Ronaldo n’umujyanama we, Jorge Mendes, ngo hamenyekane amahirwe yo kubona uyu mukinnyi.

N’ubwo amakuru agaragaza ko Ronaldo ashobora kuguma muri Saudi Arabia cyangwa se akerekeza mu yindi kipe yo muri shampiyona yaho, abafana ba Fenerbahce bifuza cyane kubona uyu mugabo ufite Ballon d'Or eshanu yambara umwambaro w’ikipe yabo. Ni inzozi bashaka kubona ziba impamo.

Kubona umukinnyi nka Ronaldo muri Turukiya byaba ari ibintu bikomeye cyane ku mupira w’amaguru muri iki gihugu. Biramutse bibaye, Fenerbahce yaba ibonye isoko rikomeye, ikiyongeraho kugaragaza ko ishobora guhanganira abakinnyi n’amakipe y’ibikomerezwa ku rwego rw’isi.

Ku myaka ye 39, Ronaldo aracyari umwe mu bakinnyi b’icyitegererezo ku isi. Ahazaza he mu kibuga hakomeje kwibazwaho, cyane ko aho ajya hose ahasiga amateka akomeye. Niba Mourinho ari we ushobora kumuhindurira icyerekezo, Fenerbahce, nayo yaza mu makipe yatunze umunyabigwi ukomeye.

Jose Mourinho arashaka kuzajya Cristiano Ronaldo muri Turikiya