Ni mu mikino yakinwe kuri uyu wa Kabiri taliki ya 22 Ukwakira 2024. Umukino wari utegerejwe na benshi ni uwo ikipe ya Real Madrid yari yakiriyemo Borussia Dortmund kuri Santiago Bernabeu Saa tatu z'ijoro.
Uyu mukino watangiye ikipe ya Real Madrid ihererekanya umupira neza, gusa abakinnyi bayo nka Kylian Mbappé na Vinicius Junior bagashaka uko bagerageza uburyo imbere y'izamu ntibibakundire.
Mu minota 18 ikipe ya Borussia Dortmund nayo yatangiye kwinjira mu mukino ihererekanya neza umupira, gusa kubona aho yamenera ngo igere imbere y'izamu bikaba ikibazo.
Ku munota wa 30 iyi kipe yo mu gihugu cy'u Budage yafunguye amazamu ku gitego cyatsinzwe na Donyell Malen ahawe umupira na Serhou Guirassy.
Ba myugariro b'ikipe ya Real Madrid bakomeje gukina barangaye maze bidatinze ku munota wa 34 Borussia Dortmund yongera kubakosora itsinda igitego cya 2 gitsinzwe na Jamie Gittens ku mupira yahawe na Donyell Malen.
Nyuma yo gutsindwa, Real Madrid yasatiriye cyane ishaka uko nayo yanyeganyeza inshundura ndetse binashoboka nk'aho Jude Bellingham yarekuye ishoti riremereye gusa ku bw'amahirwe macye rigakubita igiti cy'izamu.
Amakipe yombi yagiye kuruhuka Borussia Dortmund ikiyoboye n'ibitego 2-0. Mu gice cya kabiri abasore ba Real Madrid nka Vinicius Junior, Bellingham na Kylian Mbappé bari bayoboye abandi mu gice cy'ubusatirizi baje bashaka uko bakwishyura gusa bigakomeza kugorana.
Ku munota wa 60 Antonio Rudiger yaje kubona igitego akoresheje umutwe ku mupira wazamuwe neza na Kylian Mbappé. Bidatinze ku munota wa 63 Real Madrid yahise ibona igitego cya 2 gitsinzwe na Vinicius Junior.
Ku munota wa 83 Lucas Vasquez yatsinze igitego cya gatatu, naho ku wa 86 Vinicius Junior atsinda igitego cya 3 ku mupira yari akuye inyuma acenga, aragenda ageze imbere y'izamu arekura ishoti riremereye riruhukira mu nshundura.
Mbere yuko umukino urangira umunya-Brazil, Vinicius Junior yongeye gutsinda igitego kiba icya gatatu cye muri uyu mukino naho kiba icya 5 cya Real Madrid kuri 2 bya Borussia Dortmund.
Indi mikino yari yabaye Saa kumi nebyiri kipe ya AC Milan yo mu Butaliyani yari yakiriye Club Brugge yo mu Bubiligi kuri San Siro yayitsinze ibitego 3-1 naho AS Monaco yo mu Bufaransa yari yakiriye ikipe ya FK Crevena Zvezda yo muri Serbian kuri Stade Louis II, Monaco yayitsinze ibitego 5-1.
Saa tatu z'ijoro ikipe ya Arsenal yo mu gihugu cy'u Bwongereza yari yakiriye ikipe ya Shakhtar Donetsk yo muri Ukraine kuri Emirates Stadium ikaba yayitsinze 1-0 , Aston Villa yo mu Bwongereza yari yakiriye Bologna yo mu Butaliyani kuri Villa Park iyitsinda ibitego 2-0.
VFB Stuttgart yo mu Budage yari yakiriwe na Juventus yo mu Butaliyani kuri Allianz Stadium yayitsinze igitego 1-0 naho ikipe ya Paris Saint-Germain yo mu Bufaransa yari yakiriye PSV Eindhoven yo mu Buhorandi kuri Parc des Princes banganya igitego 1-1.
Kurri uyu wa Gatatu, imikino ya UEFA Champions League izakomeza aho Saa kumi n'ebyiri n'iminota 45 ikipe ya Atlanta yo mu Butaliyani yakira Celtic yo muri Scotland kuri Gewiss Stadium naho Brest yo mu Bufaransa yakire Bayer Leverkusen yo mu Budage kuri Stade du Roudourou.
Saa tatu z'ijoro ikipe ya Atletico Madrid yo mu Bufaransa irakira Lille yo mu Bufaransa kuri Civitas Metropolitano naho ikipe ya FC Barcelona yakire umwanzi wayo FC Bayern Munich kuri Estadio Olimpico Lluis Companys.
Ikipe ya FC Bayern Munich isanzwe ari umwanzi wa FC Barcelona bijyanye nuko buri gihe aho bahuriye iyitsinda ndetse abantu bakaba batibagirwa igihe yayinyagiraga ibitego 8 -2 muri 1/4 cya UEFA Champions League ya 2020.
Kuri izi Saha kandi ikipe ya Benfica yo muri Portugal irakira Feyenoord yo mu Buhorandi kuri Estádio do Sport Lisboa e Benfica, Manchester City yo mu Bwongereza yakira Sparta Prague yo muri Czech Republic kuri Etihad Stadium naho RB Leipzig yo mu Budage yakire Liverpool yo mu Bwongereza kuri Red Bull Arena Leipzig.
Ikipe ya RB Salzburg yo muri Australia kandi irakira Dinamo Zagreb yo muri Croatia kuri Red Bull Arena Salzburg naho Young Boys yo mu Busuwisi yakire Inter Milan yo mu Budage kuri Wankdorf Stadium.
Vinicius Junior yafashije Real Madrid gusubirana inyuma Borussia Dortmund