Euro 2024: Espagne yahemukiye u Bufaransa yerekeza ku mukino wa nyuma

Uko umukino wagenze umunota ku munota:

Umukino warangiye ikipe y'igihugu ya Espagne isezereye u Bufaransa ibutsinze ibitego 2-1

90+2' Espagne ikoze impinduka mu kibuga, ikuramo Nico Williams na Lamine Yamal ishyiramo Ferran Torres na Martin Zubimendi

Umusifuzi wa 4 yongeyeho iminota 4 ku mukino 

87' U Bufaransa burase amahirwe yo mu minota ya nyuma ku mupira Bradley Barcola yahaye Kylian Mbappé aracenga yinjira mu rubuga rw'amahina arekuye ishoti rinyura hejuru y'izamu kure. 

83' Myugariro wa Espegne, Aymeric Laporte aryamye hasi ari kwitabwaho n'abaganga nyuma yo kugira ikibazo ku zuru 

76' Ikipe y'igihugu y'u Bufaransa ikoze impinduka mu kibuga ikuramo Dani Olmo na Alvaro Morata hajyamo Mikel Merino na Mikel Oyarzabal 

75' Ikipe y'igihugu y'u Bufaransa irase igitego cyabazwe ku makosa ya Fabian Luiz watakaje umupira wifatirwa Camavinga arekura ishoti rikubita ku maguru ya ba myugariro ba Espagne umupira usanga Theo Hernandez ahagaze ahantu heza arekuye ishoti riragenda rinyura hejuru y'izamu kure.

70' U Bufaransa bukomeje gushaka igitego cyo kwishyura, Bradley Barcola azamukanye umupira acenga, ahinduye umupira imbere y'izamu birangira ba myugariro ba Espagne batabaye.

65' Kylian Mbappé abonye umupira muremure ari inyuma y'urubuga rw'amahina gato bawufunga neza awuhereza Theo Hernandez ariko birangira awupfushije ubusa. 

62' Didier Deschamp utoza u Bufaransa, nawe akoze impinduka mu kibuga akuramo NG'OLO Kante, Randal Kolo Muani na Adrien Rabiot ashyiramo Antoine Griezmann, Bradley Barcola na Eduardo Camavinga. 

57' Umutoza w'ikipe y'igihugu ya Espagne, Luis de la Fuente akoze impinduka mu kibuga havamo Jesus Navas hajyamo Dani Vivian. 

56' Kylian Mbappé agerageje uburyo arekura ishoti nyuma yo gucenga abarimo Jesus Navas, gusa birangira umunyezamu arikuyemo. 

51' Ikipe y'igihugu y'u Bufaransa igeze imbere y'izamu bwa mbere mu gice cya kabiri ku mupira Kylian Mbappé yahinduye ufatwa na Ousmane Dembele nawe arekuye ishoti birangira Unai Saimon arifashe nta ngorane.

49' Espagne ikomeje guhererekanya umupira neza, abakinnyi b'ikipe y'igihugu y'u Bufaransa bawubuze burundu. 

45' Igice cya kabiri gitangijwe n'ikipe y'igihugu ya Espagne ndetse ihita inarema uburyo ku mupira Fabian Luiz yahaye Nico Williams ariko birangira Mike Maignan avuye mu izamu aragenda awumukura ku kirenge.

Dani Olmo wagize uruhare mu gitego cya 2 cya Espagne 

Igice cya mbere kirangiye ikipe y'igihugu ya Espagne iyoboye n'ibitego 2-1

Igice cya mbere cyongeweho iminota 2 

40' Nico Williams wa Espagne azamukanye umupira yiruka awuhindurira ku nshuti ye Lamine Yamal agiye kongera nk'ibyo yakoze ku gitego cya 1 ariko Theo Hernandez aritambika umupira ujya muri koroneri. 

37' Kylian Mbappé azamukanye umupira acenga birangira yikubise hasi, gusa arabyuka awutanga kwa Ousmane Dembele nawe yinjira mu rubuga rw'amahina agiye kurekura ishoti Marc Cucurella aritambika ujya muri koroneri itagize icyo itanga. 

31' Espagne batazira 'La Roja' yari ibonye igitego cya 3 habura gato ku mupira Nico Williams ahaye Alvaro Morata bari mu rubuga rw'amahina gusa birangira ateye agashoti k'abana.

29' Kugeza kuri ubu Espagne niyo iyoboye mu guhererekanya umupira ku kigero cya 58% mu gihe u Bufaransa bwo buri kuwuhererekanya ku kigero cya 48%. 

24' Espagne ibonye igitego cya 2 ku ishoti Dani Olmo arekuye maze myugariro w'u Bufaransa, Jule Kounde agiye gukuraho umupira birangira ugiye mu nshundura. 

20' Ikipe y'igihugu ya Espagne ibonye igitego cyo kwishyura, Lamine Yamal abonye umupira awuhawe na Alvaro Morata, acenga Adrien Rabiot ahita ashyira umupira mu kuguru kw'ibimoso, arekura ishoti riragenda rikubita igiti cy'izamu rijya mu nshundura. 

18' Ikipe y'igihugu ya Espagne irarokotse, Kylian Mbappé azamukanye umupira yihuta anacenga yinjira mu rubuga rw'amahina arekura ishoti rikubita ku maguru ya Nacho risanga Randal Kolo Muani agiye kuhindura birangira umucitse.

13' Adrien Rabiot w'u Bufaransa azamukanye umupira ashaka kwinjira mu rubuga rw'amahina, gusa birangira Jesus Navas amuteretse hasi bituma umusifuzi amuha ikarita y'umuhondo ndetse anatanga kufura yatewe na Mbappé ariko ikubita mu rukuta.

11' Nyuma yo gutsindwa, ikipe y'igihugu ya Espagne itangiye gushaka uko yakwishyura, Alvaro Morata abonye umupira mwiza washoboraga guteza ibibazo u Bufaransa ariko William Saliba aratabara. 

Kylian Mbappé yishimira igitego cya Randal Kolo Muani yagizemo uruhare amuha umupira 

Uburyo Randal Kolo Muani yatsinzemo igitego 

Randal Kolo Muani yishimira igitego yatsinze 

7' Hakiri kare cyane ikipe y'igihugu y'u Bufaransa ifunguye amazamu ku mupira Kylian Mbappe azamuye maze Randal Kolo Muani aterekaho umutwe, uhita unyeganyeza inshundura.

3' Ikipe y'igihugu y'u Bufaransa itangiye neza ihererekanya umupira

Abakinnyi 11 ba Espagne babanje mu kibuga: 

Umunyezamu: Unai Simon;

Ba myugariro: Jesus Navas, Nacho Fernadez Iglesias, Aymeric Laporte na Marc Cucurella;

Abakina hagati mu kibuga: Fabian Ruiz, Rodrigo Hernandez na Dani Olmo;

Ba rutahizamu: Lamine Yamal, Alvaro Morata na Nico Williams Jr

Abakinnyi 11 b'ikipe y'igihugu y'u Bufaransa babanje mu kibuga:

Umunyezamu: Mike Maignan;

Ba myugariro: Jules Kounde, Dayot Upamecano, William Saliba na Theo Hernandez;

Abakina hagati mu kibuga: Adrien Rabiot, Aurélien Tchouaméni, N’Golo Kanté;

Ba rutahizamu: Ousmane Dembélé, Randal Kolo Muani, Kylian Mbappe

Ikipe y'igihugu ya Espagne yazamutse ivuye mu itsinda B ari iya mbere nyuma yo gutsinda imikino yayo yose. Muri 1/8 yasezereye Georgia naho muri 1/4 isezerera ikipe y'igihugu y'u Budage.

Ikipe y'igihugu y'u Bufaransa yo yavuye mu itsinda D ari iya 2 nyuma y'uko yari yatsinze umukino umwe gusa ikanganya imikino 2. Muri 1/8 yasezereye u Bubiligi naho muri 1/4 isezerera Portugal.

Imibare yerekana ko inshuro 3 ziheruka guhuza aya makipe mu mikino ya Euro yo gukuranwamo, ikipe yashoboraga gutsinda ni yo byarangiraga yegukanye igikombe.

Mu bijyanye nuko amakipe yombi ahagaze kugeza ubu mu gihe cya vuba, ikipe y'igihugu ya Espagne niyo nziza kuko kugeza ubu niyo kipe yonyine yatsinze imikino 5 yayo yose muri iyi Euro ya 2024. 

Iyi kipe y'igihugu kuva mu mwaka wa 2023 mu mikino 19 imaze gukina, yatsinzemo 15, bikaba bivuze ko bafite intsinzi ingana na 79 % by'imikino yose bakinnye kuva mu mwaka ushize ndetse ni nayo kipe y'igihugu yo ku mugabane w'Iburayi ifite iyi mibare gusa.

Espagne ifite impande ziryana ziba zinyuraho Neco Williams na Lamine Yamal imaze gutsinda imikino 7 yikurikiranya. lkindi gihe yari yarigeze gutsinda imikino myinshi yikurikiranya ni muri 2010 ho ikaba yari yatsinze 12.

Kugeza ubu Lamine Yamal amaze kurema uburyo 14 kuri bagenzi be akaba ari we mukinnyi ukiri muto ubikoze mu mateka ya Euro ndetse akaba umukinnyi wa 2 wa Espagne uremye uburyo bwinshi mu irushanwa rikomeye (Euro n'igikombe cy'Isi) nyuma ya Xavi wari waremye uburyo 25 muri Euro ya 2012.

Uyu mukinnyi wa FC Barcelona amaze gutanga imipira 3 yavuyemo ibitego, akaba ariwe mukinnyi wa mbere ubikoze muri Euro imwe.

Ikipe y'igihugu ya Espagne irakina uyu mukino ishaka kugera ku mukino wa nyuma wa Euro ku nshuro ya 5 aho ikipe y'igihugu y'u Budage ariyo yonyine iyirusha kugerayo inshuro nyinshi dore ko yo imaze kuhagera inshuro 6.

Mu nshuro 5 Espagne imaze kugera muri 1/2, enye byarangiye igeze ku mikino ya nyuma (Final), usibye muri Euro iheruka ya 2020 yahageze ariko bikarangira isezerewe n'u Butaliyani bwahise bunegukana igikombe.

Ku ruhande rw'ikipe y'igihugu y'u Bufaransa yo irajya gukina ishaka kugera ku mukino wa nyuma wa Euro ku nshuro ya 4 nyuma y'uko yahageze mu 1984, 2000 ndetse no muri 2016.

Muri izi nshuro zose u Bufaransa bwageze ku mukino wa nyuma ariko inshuro 1 yonyine ni bwo bwabikoze butari mu rugo muri Euro ya 2000 yabereye mu gihugu cy'u Buhorandi.

Kugeza kuri ubu ntabwo kizigenza w'u Bufaransa, Kylian Mbappe ari guhirwa muri iyi Euro ya 2024 kubera ko amaze gutera amashoti 20 mu izamu ariko yatsinze igitego 1 na cyo cya penariti. 

Ibi biri kumubaho mu gihe mu gikombe cy'Isi ho amaze kugerageza gutera amashoti 39 ariko akaba yaravuyemo ibitego 12.

Imibare yerekana ko iyi ari inshuro ya Gatandatu igiye guhuza aya makipe yombi mu irushanwa rikomeye (Euro n'igikombe cy'Isi). 

Mu mikino 5 imaze kubahuza, u Bufaransa bwatsinzemo 3, harimo uwo mu 1984 bwatsinzemo ibitego 2-0 ndetse buhita bunegukana igikombe cya Euro yari yabereye iwabo, uwo muri 2000 bwatsinzemo ibitego 2-1, hakaba hari muri 1/4 cya Euro ndetse n'uwo mu gikombe cy'Isi cya 2006 batsinzemo ibitego 3-1.

Ikipe y'igihugu ya Espagne muri izi nshuro 5 yo yatsinzemo umukino 1 wo muri 2012 ibitego 2-1 mu gihe undi umwe bawunganyije igitego 1-1.

Lamine Yamal yanditse amateka yo kuba umukinnyi muto utsinze igitego muri 1/2 cya Euro 

Uburyo Lamine Yamal yazamuye ishoti ryavuyemo igitego 

Lamine Yamal yishimira igitego yatsinze