Copa america 2024: Ibyo wamenya ku itsinda C ririmo Luis Suarez

Itsinda C muri Copa America 2024, ririmo ibihugu nka Uruguay, Leta Zunze Ubumwe za Amerika, Panama na Bolivia.

1. Uruguay

Ikipe y'igihugu ya Uruguay, ni imwe mu ahabwa amahirwe yo kwegukana igikombe cya Copa America, cyane ko nayo yagitwaye inshuro nyinshi.

Uruguay yatwaye Copa America mu 1916, 1917, 1920, 1923, 1924, 1926, 1935, 1942, 1956, 1959, 1967, 1983, 1995, ndetse na 2011.

Muri Copa America 2024, Uruguay izaba iri gutozwa na Marcelo Bielsa, umutoza wamamaye atoza amakipe akomeye ku mugabane w'iburayi.

Bamwe mu bakinnyi bo kwitega umutoza Marcelo Bielsa yamanukanye muri Leta Zunze Ubumwe za Amerika ni Federico Valverde wa Real Madrid, Darwin Núñez wa Liverpool na Luis Suárez wa Inter Miami.

Marcelo Bielsa, ubusatirizi bwe buzaba burangajwe imbere na Darwin Nunez wa Liverpool, umukinnyi utarabasha kwigarurira imitima y'abanya Uruguay, kubera ko imikino 54 amaze gukinira iki gihugu haba no mu bato, amaze gutsinda ibitego 18 gusa.

Darwin Nunez azayobora ubusatirizi bwa Uruguay nyuma y'uko Edson Cavani wari umenyerewe muri ubu busatirizi, yamaze kureka ruhago.

Nubwo Darwin Nunez azaba ari mu busatirizi, azaba yunganiwe n'abandi bakinnyi bazi gutsinda ibitego, abo ni Luis Suarez wa Inter Miami na Federico Valverde wa Real Madrid.

2. Leta Zunze Ubumwe za Amerika

Ikipe y'igihugu ya Leta Zunze Ubumwe za Amerika nubwo izaba iri imbere y'abafana bayo muri Copa America 2024, si igihugu gikanganye mu mupira w'amaguru.

Kwakira Copa America 2024, ni imyiteguro myiza ku gikombe cy'Isi cya 2026 iki gihugu kizakira gifatanyije na Canada hamwe na Mexico.

Mu irushanwa rya Copa America, nabwo ntabwo Leta Zunze Ubumwe za Amerika zigeze zikora ibikomeye cyane ugereranyije n'izina iki gihugu cyakagombye kugira ku mugabane wa America.

Leta Zunze Ubumwe za Amerika muri Copa America 2024, izaba iri gutozwa na Gregg Berhalter.

Kure iki gihugu cyageze muri Copa America, ni ubwo cyasozaga irushanwa ku mwanya wa kane, ibyo byabaye inshuro ebyiri mu 1995 na 2016.

Abakinnyi batatu bo kwitega mu ikipe y'igihugu ya Leta Zunze Ubumwe za Amerika muri Copa America 2024 ni Christian Pulisic, John Sargent,l na Folarin Balogun.

 3. Panama

Ikipe y'igihugu ya Panama, nayo iri mu itsinda rya gatatu C. Panama yazamutse muri Copa America 2024 iri gukubita agatoki ku kandi ko igomba kwigaragaza, nyuma y'uko itabashije kwitabira igikombe cy'Isi cyabereye muri Quatar 2022.

Ikipe y'igihugu ya Panama itozwa na Thomas Christiansen, nta bigwi bikomeye ifite muri Copa America, kubera ko kure yageze muri iri rushanwa ari muri kimwe cya Kane inshuro imwe muri 2016.

Abakinnyi batatu bo kwitega mu ikipe y'igihugu ya Panama itozwa na Thomas Christiansen, ni Michael Murillo, Adalberto Carrasquilla na Luis Mejía.

4. Bolivia

Ikipe y'igihugu ya Bolivia nayo ihanzwe muri Copa America 2024, gusa ntabwo yitezweho gukora ibikomeye.

Ikipe y'igihugu ya Bolivia, ni kimwe mu bihugu bizi uburyohe bwa Copa America, cyane ko yayegukanye inshuro imwe muri 1963.

Muri Leta Zunze Ubumwe za Amerika, Bolivia izaba irangajwe imbere n'umutoza Antonio Carlos Zago.

Abakinnyi batatu bo kwitega Bolivia ya Antonio Carlos Zago izaba ifite muri Copa America 2024 ni Carlos Lampe, Gabriel Villa mil na César Menacho.