RFL
Kigali

Injira muri Copa America 2024 izatangira ku itariki 20 Kamena

Yanditswe na: ISHIMWE Walter
Taliki:15/06/2024 12:25
0


Amaso ya benshi arangariye Euro iri kubera mu Budage, gusa ku itariki 20 Kamena muri Leta Zunze Ubumwe za Amerika hazatangira imikino ya Copa America.



Copa America ni irushanwa ry'umupira w'amaguru rihuza ibihugu byo ku mugabane wa America yo gahati, America ya ruguru na America y'Epfo. Gusa iri rikaba ryihariye cyane kuri America y'Epfo kuko ariyo igira uruhare rukomeye mu gutegura iri rushanwa.

Copa America 2024, izabera muri Leta Zunze Ubumwe za Amerika, aho iki gihugu kizaba kiri mu myiteguro myiza yo kwakira igikombe cy'Isi cya 2026.

Iri rushanwa ritegurwa na CONMEBOL ishyirahamwe ry'umupira w'amaguru muri America y'Epfo, ryitabirwa n'amakipe 16. Gusa kubera ritegurwa na CONMEBOL, amakipe 10 yaryitabiye akomoka muri America y'Epfo, andi atandatu akaba ari ayo muri America ya ruguru no hagati.

Amakipe ahanzwe amaso cyane muri Copa America 2024 ni Argentina ya Lionel Messi iheruka kwegukana iki gikombe, na Brazil ya Vinicius Junior ihora ihanzwe amaso muri iri rushanwa.

Umukino ufungura iri rushanwa, uzaba ku itariki 20 Kamena 2024, ubwo Argentina iheruka iki gikombe izacakirana na Canada, amakipe azakinira muri Atlanta.

Kuva ku itariki 20 Kamena kugera ku itariki 2 Nyakanga, ni bwo imikino yo mu matsinda ya Copa America izakinwa, bityo amakipe azaba abiri ya mbere muri buri tsinda akomeze muri kimwe cya Kane, naho abiri ya nyuma asezererwe.

Kuva ku itariki 4 Nyakanga ukagera kuri 6 Nyakanga, nibwo imikino ya kimwe cya Kane muri Europa America izakinwa, amakipe ane azatsinda akomeze muri kimwe cya kabiri, azatsindwa asezererwe.

Ku itariki 9 na 10 Nyakanga, hazakinwa imikino ya kimwe cya kabiri, abiri azatsindwa azakine yishakamo izegukana umwanya wa gatatu, naho abiri yatsinze azakine umukino wa nyuma.

Ku itariki 13 Nyakanga ni bwo amakipe azaba yatsindiwe muri kimwe cya kabiri azahura ashaka umwanya wa gatatu, naho ku itariki 14 Nyakanga, amakipe yatsinze muri kimwe cya kabiri akine umukino wa nyuma wa Copa America yishakamo iyegukana igikombe.

Ibihugu bizitabira Copa America ni Argentina, Mexico, USA, Brazil, Uruguay, Colombia, Equador, Peru, Chile, Panama, Venezuela, Paraguay, Jamaica, Bolivia, Canada na Costa Rica.

Uko amatsinda apanze muri Copa America 2024 

Itsinda A

Argentina, Canada, Chile na Peru.

Itsinda B

Ecuador, Jamaica, Mexico na Venezuela.

Itsinda C

Bolivia, USA, Panama na Uruguay

Itsinda D

Brazil, Colombia, Costa Rica na Pa raguay.


Kuva ku itariki 20 Kamena 2024 kugeza ku itariki 14 Nyakanga muri Leta Zunze Ubumwe za Amerika hategerejwe imikino ya Copa America 2024 


Lionel Messi na Vini Junior na Christian Pulisic, bamwe mu bakinnyi bitezwe muri Copa America 2024 


Ikipe y'igihugu ya Argentina yitezweho kongera kwisubiza iki gikombe








TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND