RFL
Kigali

NBA Final: Dallas Mavericks yatangiye kuzamuka ibuza Boston Celtics kwegukana igikombe

Yanditswe na: ISHIMWE Walter
Taliki:15/06/2024 10:03
0


Mu gitondo cyo kuri uyu wa Gatandatu ku itariki 15 Kamena 2024, Dallas Mavericks nayo yagaragaje ko itageze ku mukino wa nyuma ku bw'impanuka, itsinda Boston Celtics, iyibuza gutwara ibikombe cya NBA 2024.



Abakunzi ba Boston Celtics bari bamanutse kuri American Airlines Center, bazi ko ikipe yabo nitsinda umukino wa kane yari ifitanye na Dallas Mavericks, yari kwegukana igikombe cya NBA ya 2024.

Imikino itatu ya mbere, Boston Celtics yari yatsinze Dallas Mavericks idakoramo, ubwo byari byitezwe ko nitsinda uwa Kane, ihita yegukana igikombe cya shampiyona kubera ko ikipe itanze indi intsinzi enye muri NBA, iba yayisezereye.

Mu mukino wa none, Dallas Mavericks yari imbere y'abafana bayo kuri American Airlines Center, yatsinze amanota 122 kuri 88 ya Boston Celtics. Nubwo Dallas Mavericks yatsinze uyu mukino, kugira ngo yegukane igikombe byayisaba kuzamuka umusozi, kuko byayisaba gutsinda imikino ibiri isigaye. 

Mu gihe Dallas Mavericks yatsinda imikino ibiri isigaje, amakipe yombi yahita anganya intsinzi eshatu, nuko Dallas Mavericks igasabwa gutsinda n'undi mukino wa karindwi wa Kamarampaka.

Uko bimeze kuri Dallas Mavericks, si ko bimeze kuri Boston Celtics, kubera ko iyi kipe isabwa gutsinda umukino umwe gusa, ubundi ikuzuza intsinzi enye ziyemerera gutwara igikombe.

Mu mukino wa none, Doncic Lucas wa Dallas Mavericks, ni we wayikuye mu menyo ya rubamba kubera ko yayitsindiye amanota 29, akora rebound eshanu anatanga imipira itanu yabyaye andi manota.

Gutsinda uyu mukino, Dallas Mavericks byayoroheye cyane kuko uduce tune twose, nta na kamwe Boston Celtics yigeze itsinda.

Agace ka mbere Dallas Mavericks yatsinze amanota 34 kuri 21 ya Boston Celtics, aka kabiri itsinda 27 kuri 14, aka gatatu itsinda 31 kuri 25, naho aka Kane itsinda 30 kuri 24. Umukino wose warangiye ari amanota 122 ya Dallas Mavericks kuri 88 ya Boston Celtics.

Ku itariki 17 Kamena ni bwo amakipe yombi azacakirana mu mukino wa gatanu, aho nubundi Boston Celtics ihabwa amahirwe yo kwegukana igikombe mu gihe yaba iwutsinze, cyangwa Dallas Mavericks ikaguma kuzamura amahirwe mu gihe yaba itsinze uyu mukino.



Dallas Mavericks yatsinze umukino wa kane muri NBA Finals, imibare iguma kuba miremire


Boston Celtics yari yiteguye gutwara igikombe yatashye ikubita agatoki ku kandi 






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND