Ibitego bitanu byakoze ku mitima y'abakunzi ba Manchester United

Nubwo Manchester United iri mu bihe bibi muri iyi myaka, ntabwo bikuyeho ko yabaye ikipe idahangarwa. Mu bitego bitanu byakoze ku mitima y'abakunzi bayo, harimo icya Alejandro Garnacho yatsinze muri uyu mwaka w'imikino nubwo Manchester United yo ikomeje kurwana n'ibihe bibi.

5. Igitego cya Alejandro Garnacho

Kimwe mu bitego byakoze ku mitima y'abakunzi ba Manchester United, harimo ngarama yatsinzwe na Alejandro Garnacho muri uyu mwaka w'imikino.

Manchester United yagiye mu kibuga idahabwa amahirwe yo gutsinda umukino kubera ko yari imaze iminsi yitwara nabi. Ku munota wa karindwi Umunya Portugal, Diogo Dalot yazamuye umupira imbere y'izamu rya Everton, Alejandro Garnacho yikoza mu bicu atareba izamu nuko umupira awutera agaramye, igitego kiranyobwa.

Nubwo umukino warangiye Manchester United ifite ibitego bitatu ku busa, igitego cya Alejandro Garnacho ni cyo cyagunye kwibazwaho, kugeza na n'ubu kiracyagereranywa n'ibitego byiza byatsinzwe muri iki kinyejana.

4.Kufura ya CR7 muri 2008

Mu mwaka wa 2008 nibwo Cristiano Ronaldo yari atangiye kuvugisha isi mu mupira w'amaguru bitewe n'ubuhanga budasanzwe yari ari kugaragaza muri Manchester United.

Ubwo Manchester United yakinaga na Portsmouth muri English Premier League, Ronaldo yatsinze kufura y'akataraboneka. Icyo gihe ntabwo hibajijwe ku ikipe atsinze ko yari iciriritse, ahubwo amarangamutima y'abakunzi ba Manchester United yazamuwe na kufura y'akataraboneka yari itsinzwe n'umwana muto.

3. Igitego cya Eric Cantona mu 1996

Eric Cantona ni umwe mu bakinnyi babayeho batazibagirana mu mateka ya Manchester United. Uyu mukinnyi mu 1996 yatsinze igitego cyiza ubwo Manchester United yakinaga na Sunderland.

Muri uwo mukino, Manchester United yatsinze ibitego bitanu ku busa bwa Sunderland. Igitego cya Eric Cantona kuri uwo mukino, ni kimwe mu bitego byatsindanywe ubuhanga bwo ku rwego rwo hejuru.

2. Ngarama ya Wayne Rooney muri 2011.

Ngarama yatsinzwe na Wayne Rooney muri 2011 ubwo Manchester United yari iri gukina na Manchester City, ni kimwe mu bitego bitazava mu mitwe y'abafana ba Manchester United.

Iyo ngarama neza neza igereranywa n'iya Alejandro Garnacho yatsinze Everton muri uyu mwaka w'imikino, gusa iya Wayne Rooney yo ikaba yarakoze cyane ku mitima y'abakunzi ba Manchester United kuko wari ku mukino Manchester United yari iri gutsindamo Manchester City.

Iyo ngarama ya Wayne Rooney yatumye Manchester United icyura amanota atatu, kuko yatsinze ibitego bibiri kuri kimwe cya Manchester City. Icyo gitego cyatumye Wayne Rooney aguma kuba umwe mu bakinnyi bakunzwe muri Manchester United, kugeza ubu igitego cye ntabwo kiribagirana.

1. Igitego cya Ole Gunnar Solskjaer mu 1999

Igitego cya Ole Gunnar Solskjaer yatsinze FC Bayern Munich mu 1999, ntabwo kizibagirana kuko cyakoze ku bakunzi ba Manchester United, gishengura abakunzi ba Bayern Munich.

Hari ku mukino wa nyuma wa UEFA Champions League wahuzaga Manchester United na FC Bayern Munich. Muri uwo mukino, amahirwe menshi yari aya Bayern Munich, kubera ko umukino wa nyuma waberaga mu Budage imbere y'abafana bayo.

Umukino wageze ku munota wa 88 Bayern Munich ifite igitego kimwe ku busa bwa Manchester United.

Sir Alex Ferguson yashyize Ole Gunnar Solskjaer mu kibuga umukino Wenda kurangira, ahita atanga umupira wabyaye igitego cya mbere.

Bayern Munich yari izi ko yishyuwe mu minota ya nyuma ariko izi ko ishobora kungukira muri Penaliti, yakubiswe n'inkuba ubwo Ole Gunnar Solskjaer yatsindaga igitego cya kabiri ku ruhande rwa Manchester United habura amasegonda ngo umukino urangire.

Umukino wageze ku munota wa 85 bamwe mu bafana ba Manchester United batangiye gusohoka mu kibuga, kuko bari bazi ko Bayern Munich yabatwaye igikombe. 

Uwasohotse ku munota wa 85, byaragoranye kwemera ko Manchester United yegukanye UEFA Champions League ku buhanga budasanzwe bwa Ole Gunnar Solskjaer.

Igitego Alejandro Garnacho aheruka gutsinda ku mukino wa Everton cyahise kibutsa icyo Wayne Wayne Rooney yatsinze Man City muri 2011

Eric Cantona ni umwe mu bakinnyi batsinze ibitego bitazibagirana muri Manchester United 

Ole Gunnar Solskjaer yatsinze igitego mu 1999 cyatumye Manchester United yegukana UEFA Champions League 

Ronaldo yateye kufura y'akataraboneka muri 2008