RFL
Kigali

AFCON: Côte D'Ivoire yapfuye ikazuka yegukanye igikombe

Yanditswe na: Aloys Niyonyungu
Taliki:11/02/2024 21:13
1


Ikipe y'igihugu ya Cote D'Ivoire yapfuye ikazuka yatwaye igikombe cy'Afurika cya 2023 nyuma yo gutsinda Nigeria ibitego 2- 1 ku mukino wa nyuma wabereye kuri Sitade yitiriwe Alassane Ouattara i Abidjan n'ubundi mu gihugu cya Côte D'Ivoire.



UKO UMUKINO WAHUJE AYA MAKIPE WAGENZE UMUNOTA KU MUNOTA:

Iyi kipe bitirira inzovu umuntu yavuga ko yapfuye ikazuka dore ko yabonye itike iyikura mu itsinda nk'ikipe yatsinzwe neza gusa birangiye ariyo yegukanye igikombe,gihita kiba icya 3 begukanye mu mateka.

Umukino urangiye ikipe y'igihugu ya Cote D'Ivoire yegukanye igikombe cy'Afurika cya 2023 itsinze Nigeria ibitego 2-1. 

90+2' ikipe y'igihugu ya Cote D'Ivoire iri gukina yirwanaho, abasore ba Nigeria bari kunona imipira myinshi y'imiterakano gusa ba myugariro bakayikuraho

Umukino wongeweho iminota 7

84' Nyuma yo gutsindwa igitego cya 2, Nigeria itangiye gushaka uko yakwishyura,ibonye koroneri ariko itewe na Kelechi Iheanacho ayirenza izamu





82' Sebastien Haller atsinze igitego cya 2 cya Cote D'Ivoire  ku mupira mwiza yarahawe na Simon Adingira wazonze ba myugariro ba Nigeria maze nawe aragarama atereka umupira mu nshundura 

79 Nigeria ikoze impinduka mu kibuga havamo Alex Iwobi na Ademola Lookman hajyamo Yusuf na Kelechi Iheanacho 

77' Victor Osimhen na Seko Fofana bagonganiye mu kirere bose baryama hasi none bari kwitabwaho n'abaganga 

75' Abakinnyi bagiye mu karuhuko ko kunywa amazi kubera ubushyuye buri Cote D'Ivoire 

74' Ikipe y'igihugu ya Cote irase igitego cya 2 ku mupira Sebastien Haller abonye ari mu rubuga rw'amahina arihindukiza arekura ishoti ariko rinyura impande y'izamu gato 

69' ikipe y'igihugu ya Cote D'Ivoire ikoze impinduka mu kibuga havamo Serge Auriel na Max Gradel hajyamo Stephane Sango na Oumar Diakite 

67' Ikipe y'igihugu ya Nigeria ibonye kufura nziza iterwa na Ademola Lookman ariko kapiteni, Troost-Ekong ashyizeho umutwe , umupira unyura hejuru y'izamu gato cyabe

61' Nyuma yo gutanga ibimenyetso,Cote D'Ivoire ibonye igitego cyo kwishyura gitsinzwe na Franck Kessie kuri koroneri yaritewe na Simon Adingira 

60' Simon Adingira abonye umupira mwiza mu rubuga rw'amahina awuhindura kwa Franck Kessie ashyiraho umutwe ariko umunyezamu ararifata

58' Cote D'Ivoire iri mu rugo ikomeje gushaka uko yakwishyura abakinnyi bayo bakomeye bagerageza gufata imyanzuro,Seri arekuye ishoti ari inyuma y'urubuga rw'amahina gusa unyura hepfo y'izamu gato

54' ikipe y'igihugu ya Nigeria ikoze impinduka mu kibuga havamo, Samuel Chukueze hajyamo Moses Simon 

48' Ikipe y'igihugu ya Côte D'Ivoire itangiye kwatsa umuriro imbere y'izamu,Simon Adingira ahinduye umupira maze umunyezamu wa Nigeria awukoraho uragenda usanga Max Gradel arekura ishoti ariko Calvin Bassey ararihagarika

46' Igice cya kabiri gitangiye umupira wiharirwa n'ikipe y'igihugu ya Nigeria 

Igice cya mbere kirangiye ikipe rya Nigeria ikomeje kuyobora n'igitego 1-0

45+3'Seko Fofana wa Côte D'Ivoire yongeye kurekura ishoti riremeye ariko Umunyezamu wa Nigeria yongera gukora akazi arikuramo 

Igice cya mbere cyongeweho iminota 4

43' Abakinnyi ba Nigeria batangiye gukoresha amayeri yo gutinza umukino, Victor Osimhen aryamye hasi ari kwitabwaho n'abaganga 


36' Ikipe y'igihugu ya Nigeria ibonye igitego cya 1 gitsinzwe na Kapiteni, Troost-Ekong akoresheje umutwe kuri koroneri yaritewe na Ademola Lookman 

33'Ikipe y'igihugu ya Côte D'Ivoire irase igitego cyabazwe ku mupira Franck Kessie yarahaye Simon Adingira nawe arekura ishoti ariko Nwabali arikuramo 

30' Abakinnyi bagiye mu karuhuko ko kunywa amazi kubera ubushyuye buri muri Côte D'Ivoire 

24' Victor Osimhen na Obite Ndicka bari barwanye nyuma yuko bahuriye mu kirere umwe agakubita undi inkokora ariko umusifuzi ahita ahagoboka arabakiza

19' Zaidu Sanusi yarakoze amabara yihera umupira Simon Adingira ari mu rubuga rw'amahina ariko agira amahirwe uhita ujya muri koroneri 

16'Ikipe y'igihugu ya Nigeria nayo itangiye gusatira cyane 

14'Seko Fofana wa Cote D'Ivoire arekuye ishoti ryari riremereye ari inyuma y'urubuga rw'amahina ariko umunyezamu wa Nigeria aba maso arikuramo 

11' Ademola Lookman wa Nigeria yarazamukanye umupira ashaka kugera imbere y'izamu ariko ba myugariro ba Côte D'Ivoire baba ibamba

6' Ikipe y'igihugu ya Côte D'Ivoire ikomeje gusatira, Simon Adingira yinjiranye umupira mu rubuga rw'amahina ariko agiye kurekura ishoti ntibyamukundira rinyura hejuru y'izamu gato cyane 

3'Ikipe y'igihugu ya Cote D'Ivoire ibonye kufura iterwa na Konan maze Sebastien Haller agiye gushyiraho umutwe, Nwabali ahita awufata

1'Umukino utangiye Nigeria igerageza kuzamuka ariko umunyezamu wa Côte D'Ivoire ahita afata umupira 




Abakinnyi 11 ba Nigeria babanje mu kibuga:

Nwabali, Ekong, Ajayi, Bassey, Zaidu, Oneyka, Iwobi, Aina, Lookman, Chukwueze, Osimhen 

Abakinnyi 11 ba Côte D'Ivoire babanje mu kibuga: Y. Fofana; Aurier, Kossounou, Ndicka, Konan; Michael Seri, Kessie, S. Fofana; Gradel, Adingra, Haller

Mu mateka y'iki gikombe cy'Afurika cyakinwaga ku nshuro ya 34,kipe y'igihugu ya Côte D'Ivoire bita Inzovu igifite inshuro 2(icyo mu 1994 no muri 2013) mu gihe iya Nigeria yo bitirira Kagoma igifite inshuro 3(icyo mu 1984,1988 no 1990).

Mu mikino 8 iheruka guhuza aya makipe y'ibihugu byombi kuva muri 2006, ntabwo azi kunganya uko bisa kubera ko buri kipe yatsinze imikino 4 kuri 4.

Aya makipe ahuriye ku mukino wa nyuma,nyuma y'uko bari mu itsinda rimwe maze Nigeria igatsinda Côte D'Ivoire igitego 1-0 cya Kapiteni, William Troost-Ekong kuri penariti. 

Muri iri tsinda A Nigeria niyo yazamutse iri yoboye n'amanota 7 mu gihe Côte D'Ivoire yo yari yazamutse nk'ikipe yatsinzwe neza.

Mu mikino ya 1/8, Nigeria yahise isezerera ikipe y'igihugu ya Cameroon iyitsinze ibitego 2-0 naho Cote D'Ivoire yo isezerera Senegal kuri penaliti 5-4.

Muri 1/4 Nigeria yahise isezerera Angola iyitsinze igitego 1-0 naho Côte D'Ivoire yo isezerera Mali iyitsinze ibitego 2-1.

Muri 1/2 ikipe y'igihugu ya Cote D'Ivoire yahise isezerera ikipe y'igihugu ya DR Congo iyitsinze igitego 1-0 naho Nigeria yo isezerera Afurika y'Epfo iyitsinze penariti 4-2.

Ikipe y'igihugu ya Côte D'Ivoire ibaye ikipe ya mbere igeze ku mukino wa nyuma w'igikombe cya Afurika kandi yanacyakiriye nyuma ya Misiri yaherukaga kubikora muri 2006 ndetse bikaba byaranarangiye igitwaye kuri penaliti.


Ubwo Perezida wa Côte D'Ivoire, Alassane Ouattara yageraga muri sitade asuhuzanya na Dr Patrice Motsepe uyobora CAF 


Perezida wa Côte D'Ivoire kandi yakiriwe na Perezida wa FIFA, Gianni Infatino nawe waje kureba uyu mukino 


Umunyabigwi njyana ya Reggae, Seydou Koné wamamaye ku izina rya Alpha Blondy, yasusurukije abitabiriye ibirori bisoza igikombe cya Afurika cy'Ibihugu cya 2023



Bamwe mu bafana bamaze kugera muri sitade 




Ubwo abafana biganjemo aba Côte D'Ivoire bageraga kuri Alassane Ouattara Stadium 











TANGA IGITECYEREZO

Izina ryawe
Email yawe
Andika igitecyerezo

IBITECYEREZO

  • Matcha lobato 2 weeks ago
    Kurba umupira





Inyarwanda BACKGROUND