Cristiano Ronaldo yavuze amakipe 3 aha amahirwe yo kuzatwara igikombe cya Champions League

Yabitangaje ku w Gatanu tariki 19 Mutarama ubwo yari mu birori byo gutanga ibihembo bya Globe Soccer Awards, aho yanegukanye igihembo cy'umukinnyi watsinze ibitego byinshi ku Isi, umukinnyi mwiza wo mu Burasirazuba bwo hagati ndetse n'icy'umukinnyi wakunzwe n'abafana kurusha abandi.

Ari muri ibi birori, yabajijwe ku makipe abona azegukana igikombe cya Champions League ya 2023-2024 dore ko n'imikino yayo iri muri 1/8.

Cristiano Ronaldo yavuze ko Manchester City ariyo aha amahirwe menshi yo kuba yakongera kugitwara, ati: "Ndatekereza ko Manchester City ifite amahirwe menshi yo kongera gutwara igikombe cya Champions League y'uyu mwaka".

Andi makipe 2 abona azahangana na Manchester City, yavuze ko ari Real Madrid isanzwe ifite ibikombe 14 bya Champions League ndetse na FC Bayern Munich yo isanzwe ifite 6.

Kuva Cristiano yakwerekeza muri Al Nassr yo muri Arabia Saudite ntagikina imikino ya UEFA Champions League, ariko ayifitemo amateka ahambaye. Ni we mukinnyi watsinze ibitego byinshi mu mateka ya Champions League, bigera kuri 140 ndetse yanatwaye ibikombe bya Champions League inshuro 5.

Cristiano Ronaldo yavuze ko abona Manchester City ariyo ifite amahirwe menshi yo kuzongera kwegukana igikombe cya Champions League ariko anavuga ko FC Bayern Munich na Real Madrid nazo aziha amahirwe