Abahanzi bakunzwe mu gihugu cya Nigeria, Simi n'umugabo we, Adekunle Gold bari mu byishimo byo kwizihiza isabukuru y'imyaka itanu bamaze bahanye isezerano ryo kubana ubudatana.
Itariki nk'iyi mu 2019, ni bwo Simisola Bolatito Kosoko wamenyekanye nka Simi yasezeranye kubana akaramata na Adekunle Almoruf Kosoko, umunsi udateze kwibagirana mu buzima bwabo.
Aba bombi, bongeye kwibukiranya ko bakundana urw'ukuri, bashimangira ko imyaka itanu bamaranye yababereye nka paradizo.
Adekunle Gold abinyujije ku rubuga rwa Instagram yagize ati: "Imyaka itanu irashize duhamije ko tubyemeye. Icyo gihe gishize dusangira byose, dukundana, duseka, kandi duhitanamo buri munsi. Isabukuru nziza kuri twe."
Ayo magambo yayaherekesheje indirimbo aba bombi bakoze isobanura uko buri wese yahinduye undi kuva babana, yitwa "Look What You Made Me Do" imaze amasaha macye igiye hanze.
Simi, nawe yagiye ku rukuta rwe rwa Instagram maze yandika ubutumwa burebure bwuzuyemo amagambo aryohereye y'urukundo, atera imitoma umugabo we karahava.
Yifashishije amafoto yabo y'ubukwe maze aragira ati: "Imyaka itanu irashize turushinze. Nahoze mbwira buri wese ushobora kunyumva ko ari wowe mugabo undutira abandi nzi. Ndashimira Imana ku bw'ubuzima mbanyemo nawe. Nkukunda by'ukuri, mbivanye ku ndiba y'umutima kandi nkagukunda byuzuye.
Uri inshuti yanjye magara. Numva ntekanye, nishimye kandi nitaweho iyo ndi kumwe nawe. Warakoze gutanga ADN yawe kugira ngo tubyare umwana utangaje ku isi. Ndagushimira kubwo gukomeza kumpitishamo ibikorwa byawe, amagambo yawe ndetse n'intego zawe. Ndagukunda Mr Kosoko. Kandi ndakwishimira cyane cyane.
Uri umugabo mwiza kandi narahiriwe. Ku yindi myaka myinshi yo kwishimana, gukurira hamwe, no gukundana mu izina rya Yesu.
Kubaho ntagufite bimeze nk'izuba ritagira urumuri, nk'ukwezi kudafite ijoro, kubera ko nkukeneye cyane mu buzima bwanjye. Kutakugira bimeze nko kwizera kudafite imyizerere, nk'umutima utari gutera,.... Isabukuru nziza Rudasumbwa."
Adekunle Gold na Simi, bamenyanye bwa mbere mu 2014, ubwo Adekunle yitabiraga kimwe mu bitaramo bya Simi. Uyu muhanzikazi aherutse gutangaza ko bwatumye yemera gukundana nawe nyuma y'amezi macye bamenyanye. Aba bombi, bakundanye imyaka 5 mbere y'uko bakora ubukwe.
Kugeza ubu, bafitanye umwana umwe w'umukobwa bise Adejare, bibarutse muri Gicurasi 2020.
Simi na Adekunle Gold benshi bakunze kwita Jay-Z na Beyoncé ba Nigeria, bamaze gukorana indirimbo nyinshi zirimo iyitwa 'No Forget,' 'Promise,' 'By You,' 'Happy Birthday' yagaragayemo n'imfura yabo, inshyashya bise 'Look What You Made Me Do,' n'izindi.
Reba hano amwe mu mafoto y'ubukwe ndetse n'ay'umuryango wa Adekunle Gold na Simi:
Reba hano indirimbo Adekunle Gold n'umugore we Simi batuye abafana babo ku isabukuru y'imyaka itanu bamaze barushinze
Eng
RSS 
TANGA IGITECYEREZO