Victor Osimhen yegukanye igihembo cy'umukinnyi w'Umunyafurika mwiza kurusha abandi

Ku mugoroba wo kuri uyu wa Mbere nibwo mu mujyi w'i Marrakech muri Morocco habereye ibirori by'Impuzamashyirahamwe y'umupira w'amaguru muri Afurika, CAF, byo gutanga ibihembo ku batoza b'Abanyafurika, amakipe yo muri Afurika ndetse n'abakinnyi b'Abanyafurika bitwaye neza mu mwaka w'imikino wa 2022-2023.

Igihembo cyari gitegerejwe na benshi ni icy'umukinnyi w'Umunyafurika witwaye neza kurusha abandi muri rusange. Cyahawe rutahizamu ukomoka muri Nigeria Victor Osimhen ahigitse Mohammed Salah na Achraf Hakim.

Uyu mukinnyi asanzwe akinira ikipe ya Napoli yo mu gihugu cy'u Butaliyani akaba yarayifashije gutwara igikombe cya shampiyona mu mwaka ushize w'imikino nyuma y'imyaka 30 itazi uko gisa anayifasha kugera mu mikino ya 1/4 muri UEFA Champions League. 

Victor Osimhen mu mwaka ushize w'imikino muri rusange yakiniye Napoli imikino 39 atsinda ibitego 31 atanga imipira 4 yavuyemo ibitego naho mu ikipe y'Igihugu ya Nigeria yakinnye imikino 7 atsinda ibitego 10. 

Abaye umukinnyi w'umwaka wa 2023 kandi nyuma yuko mu bihembo bya Ballon d'Or ya 2022-2023 ariwe mukinnyi ukomoka muri Afurika waje ku mwanya wa hafi wa 8.

Mu bindi bihembo byatanzwe, Lamine Camara ukinira ikipe y'igihugu ya Senegal na Metz yo mu Bufaransa yahawe igihembo cy'umukinnyi ukiri muto witwaye neza.

Yassine Bounou ukinira ikipe y'igihugu ya Morocco ndetse na n'ikipe ya Al Hilal yo muri Morocco niwe wagizwe umunyezamu mwiza kurusha abandi, umutoza w'umwaka agirwa Walid Regragui utoza ikipe y'igihugu ya Morocco naho ikipe nziza igirwa Morocco.

Victor Osimhen yegukanye igihembo cy'umukinnyi w'Umunyafurika witwaye neza kurusha abandi

Yahigitse Mohammed Salah na Achraf Hakim