Umukobwa witwa Ndekwe Paulette yamaze kwerekeza muri Malaysia aho yaserukiye u Rwanda mu irushanwa ry’ubwiza rya Miss Cosmo World agiye guhatanamo ku nshuro ya mbere.
Uyu mukobwa yahagurutse ku kibuga cy’indege
Mpuzamahanga cya Kigali, ku gicamunsi cyo kuri uyu wa Gatatu tariki 15
Ugushyingo 2023, aherekejwe n’abo mu muryango we, Stella Matutina wahatanye
muri Miss Global Rwanda 2021 n’abandi.
Ndekwe yabwiye InyaRwanda ko yiteguye guhesha ishema u
Rwanda muri iri rushanwa, kuko yifitemo icyizere cyo kuba yagera kure muri iri
rushanwa.
Yavuze ati “Ni ishema kandi ni inshingano zitoroshye
ariko niteguye kwitwara neza Imana niyo izagena itsinzi kuko ikamba ryo rwose
mu bo turi guhatana ntawe ritabera ariko hagena Imana.”
Iri rushanwa yitabiriye rizabera muri Malaysia mu
nyubako ya JW Marriott Hotel, Bayu Ballroom ku wa 29 Ugushyingo 2023.
Ndekwe witabiriye iri rushanwa asanzwe ategura
amarushanwa ya Rwanda Global Top Model na Miss Global Beauty Rwanda agamije
gufasha Abanyarwanda benshi kwitabira amarushanwa Mpuzamahanga.
Imibare igaragaza ko amaze kohereza abakobwa batandatu
mu bikorwa bitandukanye Mpuzamahanga byubakiye mu mideli n’ubwiza.
Ndekwe yaherukaga guserukira u Rwanda muri Miss Globe
World 2020, aho yabashije kuboneka mu bakobwa batanu bavuyemo Nyampinga ndetse
abasha no kwegukana ikamba ry’igisonga cya kane.
Ndekwe Paulette aherutse kubwira InyaRwanda ko ashima
Imana yamubashije gutsindira guserukira u Rwanda. Yavuze ati “Ndashimira Imana
kuko Miss Cosmo World n’irushanwa bitoroshye na gato kuba wahagariramo Igihugu
cyawe.”
“Nitegura gukora cyane nkahagararira Igihugu cyanjye
neza, harimo gusenga cyane kuko Imana niyo igena ahazaza h’umuntu.”
Yasabye Abanyarwanda kuzamushyigikira muri iri
rushanwa, kuko abakobwa bahatanye barashoboye.
Ati “Abakobwa bose tuzahatana barashoboye icyo nsaba
abanyarwanda ni ukunshyigikira mu buryo bw’imbuga nkoranyambaga bagakurikirana
igikorwa kuko mu bumenyi maze kugira mu marushanwa mpuzamahanga gushyigikirwa
bigira umumaro kandi abanyarwanda turi hasi cyane kuri iki cyiciro bituma bamwe
banabiburiramo amahirwe. Ibindi ni ingeno ry'Imana icyo nijeje abanyarwanda ni
ukubahagararira neza.”
Miss Cosmo World ni irushanwa ryashinzwe na Miss Carrie
Lee ukomoka Muri Malaysia usanzwe ufite ikamba rya Miss Cosmo Chinese 2004.
Rigamije gushyigikira no guteza imbere umwana w’umukobwa wese uryitabiriye.
Ni ku nshuro ya Gatandatu rigiye kuba. Umukobwa uzaba
Miss Cosmo World azasimbura umunya-Philippines umaze umwaka yambaye iri kamba.
Mu guhitamo abakobwa bemerewe guhatana muri iri
rushanwa, hagendewe ku bwiza, ubwenge n’uburyo umukobwa agaragara.
Miss Ndekwe Paulette yitabiriye irushanwa rya Miss
Cosmo World
Stella witabiriye The Miss Globe Rwanda yaherekeje Ndekwe Paulette ku kibuga cy’indege
Ni ubwa mbere Ndekwe agiye guhatana muri iri rushanwa rikomeye ku rwego rw'Isi
Ndekwe yavuze ko yiteguye guhesha ishema u Rwanda muri iri rushanwa
Ndekwe yaherukaga guserukira u Rwanda muri Miss Globe
World 2020
TANGA IGITECYEREZO