Ahabanza Imikino

REG VC yasezerewe mu irushanwa rya Kirehe Open Tournament ryashomejwe imvura - AMAFOTO + VIDEO

Yanditswe na: ISHIMWE Olivier Ba
Taliki:23/09/2023 22:39 0

Ikipe ya REG VC yari yabaye iya kabiri umwaka ushize mu irushanwa rya Kirehe Open Tournament, yasezerewe itarenze amatsinda, nyuma yo kunanirwa kwitwara neza ku makipe arimo APR VC na Gisagara.

Kuri uyu wa Gatandatu tariki 23 Nzeri, ni bwo irushanwa ngarukamwaka rya Kirehe Open Tournament ryatangiraga, rikaba ryabereye muri aka karere kagize uturere 7 tw'intara y'Iburasirazuba.

Iri rushanwa ryatangiye rifite amakipe 10, harimo 7 y'abagabo n'atatu y'abagore. Uyu munsi wa mbere, imikino yatangiye ku isaha ya Saa 09:00 am,

Mu bagabo, amatsinda yari abiri, aho itsinda rya mbere ryarimo ikipe ya Kirehe VC, Police VC na KVC. Itsinda rya kabiri, ryarimo ikipe ya APR VC, Gisagara VC, Kepler VC na REG VC.

Uko imikino ya saa Tatu yagenze; ikipe ya Kirehe VC yatsinzwe na Police VC amaseti 3-1, Kepler itsindwa na APR VC amaseti 3-2. Gisagara yatsinzwe na REG VC amaseti 3-2, umukino wabereye muri E.S Rusumo.

Imikino yatangiye saa yine n'igice, ikipe ya KVC yatsinzwe amaseti 0-3 na Police VC, APR itsinda REG amaseti 3-1, naho Kepler itsindwa na Gisagara amaseti 3-0.

Imikino yasoje amatsinda, yatangiye ahagana saa 12:30 PM, aho ikipe ya Kirehe yahise ikubita KVC amaseti 3-0, Gisaraga ikubita APR VC amaseti 3-0, naho REG itsindwa na Kepler amaseti 3-0.

Mu bagore, kuko amakipe yari atatu, bakinnye hagati yabo. Ikipe ya IPRC Kigali yatsinzwe na Police amaseti atatu kubusa, RRA itsinda IPRC Kigali amaseti atatu, naho Police itsinda RRA amaseti 3-0.

Ubwo iyi mikino yari igezemo hagati, batangiye imikino ya kabiri, imvura yaje kugwa ari nyinshi, ndetse bituma imikino ihagarara isubukurwa nyuma

Kwizera Pierre Marshall utoza REG VC avuga ko bimwe mu byabateye gusezererwa harimo n'uburyo imikino yari iteguye. Ati "Ntabwo byari bibi cyane, kuko Kepler idutsinze tumaze kunanirwa. Twakoresheje imbaraga nyinshi dutsinda Gisagara VC dukina iseti zigera kuri 5. Twagiye guhura na APR VC imbaraga zamaze kugabanuka, kuko dufite abakinnyi bacye."

REG VC yasezerewe nguma yaho mu 2022 ubwo iri rushanwa ryaherukaga gukinwa, yari yabaye iya kabiri, itsinzwe na Gisagara VC.

Kuri iki cyumweru, ni bwo hari bukomeze imikino ya 1/2 ndetse n'imikino ya nyuma, aho ku isaha ya saa 09:00 am, Police VC iribukine na APR VC, Gisagara VC ikine na Kirehe VC. Mu bagore, Police irakina na RRA.

Gisagara iri gushaka uko yakisubiza iki gikombe