Sudan: Imirwano yatwikiwemo inyubako y'amagorofa 18

Nk'uko byagaragaye mu mashusho yashyizwe ahagaragara ku cyumweru tariki ya 17 Nzeri 2023 ni uko imirwano ikaze yabereye mu murwa mukuru wa Kharthoum muri Sudan yangirikiyemo ibintu byinshi birimo n'umuturirwa uzwi cyane witwa Greeter Nile Petroleum Oil Company Tower watwitswe n'inkongi y'umuriro. 

Amakuru avuga ko imirwano yo kuwa Gatandatu no ku cyumweru yasize inyubako nyinshi za Leta zitwitswe. Tagreed Abdin, wakoze igishushyanyo mbonera cy'iyo nyubako, yatangaje ku rubuga rwa X, rwahoze rwitwa Twitter, ko bibabaje gutwika uwo muturirwa wari ikirango cy'umujyi wa Kharthoum.

Iyo nyubako ya kompanyi y'ibitoro, iri hafi y'Uruzi rwa Nili, ifite amagorofa 18. Ni imwe mu nyubako ndende zihita zigaragarira ijisho i Khartoum. Abdin yavuze ko ari yo yahaga isura ikirere cy'uwo mujyi, yinubira "ugusenya nk'uko kudafite ishingiro".

Intambara muri Sudan yatangiye ku itariki ya 15 Mata, rutewe no guhanganira ubutegetsi hagati y'umukuru w'igisirikare cya Sudan n'umukuru w'umutwe witwara gisirikare wa Rapid Support Forces (RSF). Byakurikiye iminsi yari ishize hari ubushyamirane, ubwo abarwanyi ba RSF bongeraga koherezwa mu bice bitandukanye by'igihugu, igikorwa igisirikare cya Sudan cyabonye nk'igiteye inkeke.

Urubuga Sudan War Monitor, rukora isesengura kuri iyi ntambara, rwavuze ko ku wa gatandatu RSF yateye ibice bigenzurwa n'igisirikare cya Sudan, birimo n'inyubako irimo ibiro bya minisiteri y'ubutabera. Inyubako nyinshi za leta na zo bitangazwa ko zahiye kubera icyo gitero.

Ababibonye babwiye ibiro ntaramakuru by'Abafaransa AFP ko ibitero ku hakorera igisirikare cya Sudan byakomeje no ku cyumweru. Abatuye mu karere ko mu majyepfo y'uwo mujyi aho igisirikare cyari kirimo kurasa ku birindiro bya RSF babwiye AFP ko bumvise "ibiturika cyane" ubwo babyukaga.

Ku cyumweru, abayobora urwego rw'ubuvuzi batangaje ko ibitaro byose bikuru by'i Khartoum hamwe n'ibyo mu karere ka Darfur bitarimo gukora.Ibiro by'ikigo cy'ubuziranenge cya Sudan ni bimwe mu byahiye

Nawal Mohammed, w'imyaka 44, utuye ku ntera ya kilometero nibura eshatu uvuye ahabereye imirwano mu murwa mukuru, yavuze ko imiryango n'amadirishya y'inzu y'umuryango we byatigise kubera ingufu z'ibiturika.

Uyu mugore yavuze ko imirwano yo ku wa gatandatu no ku cyumweru ari yo "ya mbere ikaze cyane ibaye kuva intambara yatangira".

Itsinda ry'abanyamategeko baharanira demokarasi ryavuze ko imirwano yishe "abasivile babarirwa muri za mirongo" i Khartoum kuva ku wa gatanu.

Imirwano yanatangajwe ko yabereye mu mujyi wa El-Obeid, uri ku ntera ya kilometero 400 mu majyepfo ya Khartoum.

Umutwe wa RSF umaze igihe urwana ushaka gufata Khartoum, ndetse ibitero by'indege by'igisirikare cya Sudan bimaze igihe bigambiriye guca intege ibirindiro bya RSF.

Ibitero by'indege n'ibyo ku butaka birakomeje mu murwa mukuru Khartoum no mu yindi mijyi kuva imirwano yakwaduka mu kwezi kwa Mata uyu mwaka.

Imirwano yo muri Sudan imaze kwicirwamo abantu bagera ku 7,500, ituma abandi barenga miliyoni eshanu bata ingo zabo.