Ahabanza Cinema

Ibyihariye kuri filime nyarwanda “What's Love” aho umugabo atera akabariro abajije nyina-VIDEO

Yanditswe na: Muramira Racheal
Taliki:16/09/2023 15:12 0

Filime nyarwanda “What's Love” yakozwe hagamijwe gutanga inama ku ngo, inkundo zubu zubatse ku musenyi, inama ku mibanire n’izindi nama zitandukanye.

Mu kiganiro n’umuyobozi w’iyi filime akaba ari na we wayanditse Director Niyonzima Djuma uzwi ku izina rya The Phoenix, yatangaje ko filime “What's Love” yakozwe hagamijwe kugaragaza uko ingo zimwe na zimwe zibanye, bituma bamwe bifuza gusenya cyangwa bakubakira ku gahinda.

Yatangarije InyaRwanda ati “Iyi filime igaragaramo umugabo wubatse ariko yubakiye ku nama ahabwa na nyina aho gufatanya n’umugore we ku buryo no gutera akabariro cyangwa kunoza amabanga y’abashakanye, abanza kubaza nyina”.

Uyu mugabo abwira nyina buri kimwe akoze, ndetse n’umugore yagira icyo amusaba akamuhakanira kuko adafite uruhushya rwa nyina.

Director Djuma yakomeje agira ati “Bamwe bashinga ingo ariko kubaka kwabo bigashingira ku bitekerezo by’abandi, bityo bagasenya urwabo aho kurwubaka".

Iyi filime igaruka ku ngo zibana mu ntonganya nta bwumvikane na mba, bikagera aho urugo rugahinduka indiri y’umubabaro, aho kwifuza kuharuhukira umuntu akifuza kuhahunga agashaka amahoro ahandi, kandi bitwa ko bakundana.

Hasigara ikibazo kibaza kiti “Ese koko urukundo rurimo intonganya no kudahuza rurashoboka? Ese koko urukundo rupimirwa mu bibazo birurimo? Ese urukundo ni iki?”.

Ku mpera y’iyi filime hazagaragazwa urukundo nyakuri ndetse n’ibisubizo byinshi bisubiza ibyo bibazo byibazwa na benshi ku rukundo.