Haruna Niyonzima yibiye ibanga Rayon Sports yitegura guhura na Al-Hilal Benghazi

Uyu musore uzwiho umupira mwinshi, yaganiriye n'itangazamakuru ryaherekeje Rayon Sports yemeza ko Al-Hilal Benghazi ari ikipe  Rayon Sports yabasha.

Yagize Ati" Al-Hilal Benghazi ni ikipe nziza, buriya ikipe yaje mu makipe atatu ya mbere, ntabwo biba ari ibintu byo gusuzugura, ariko icyo navuga ni ikipe ikinika, ntabwo navuga ko ari ikipe nziza cyane kurusha Rayon Sports. Ntabwo ndi Imana ngo nari kuvuga uko umukino wari kugenda hano, ariko iyo urebye mu mibare ukareba n'amateka ya Rayon Sports, usanga umukino wari kuzaba 50/50."

Abajijwe niba mu gihe imikino yose yabera i Kigali ari amahirwe kuri Rayon Sports, Haruna Niyonzima yemeje ko ari amahirwe akomeye. Ati" yego ku bwanjye ndumva ari byiza kuri Rayon Sports, kuko ni nabyo twaganiraga na Perezida, wenda ntabwo abantu bakwishimira ko ikipe yatakaje amatike ndetse n'amafaranga yakoreshejwe bageze hano ariko ku bwanjye nk'umukinnyi w'umupira, ndumva ari amahirwe."

Haruna Niyonzima aganira na Perezida wa Rayon Sports Uwayezu Jean Fidele 

Rayon Sports na Al-Hilal Benghazi zitegereje umwanzuro ntakuka w'ahantu   umukino uzabera, dore ko inama yabaye kuri uyu wa gatatu amakipe yombi yifuje ko imikino yose yabera mu Rwanda, umukino ubanza ukaba tariki 30 Nzeri 2023, umukino wo kwishyura ukaba tariki 7 Ukwakira 2023.