Ikipe ikina shampiyona y'umupira w'amaguru mu cyiciro cya mbere mu gihugu cya Maroc, AS Far Rabat ikaba ikinamo n'umukinnyi w'Umunyarwanda, Emanuel Imanishimwe Manguende, yegukanye igikombe cya shampiyona.
Imyaka yari imaze kuba 15 iyi kipe ya AS FAR Rabat itazi uko igikombe cya shampiyona gisa kuko yagiherukaga mu mwaka wa 2008. Ku munsi w'ejo ni bwo babigezeho batsinda ikipe Ittihad Tanger ibitego 3-2 bigoranye.
Ni umukino wagoye AS Far Rabat bitewe nuko batsindaga maze Ittihad Tanger nayo igahita iza yishyura, byageze ku munota wa 91 iyi kipe ikinamo Manguende igikombe yamaze kugitakaza bitewe nuko icyo yasabwaga ari ugutsinda gusa kandi bo bari bari kunganya ibitego 2-2.
Ku bw'amahirwe ku munota wa 92 bahise babona penariti, iterwa neza n'umukinnyi witwa Reda Slim ahita ayinjiza nta kuzuyaza.
Uyu mwaka w'imikino Manguende yafashije ikipe ye ya AS Far Rabat dore ko ariwe wakunze gukoreshwa cyane ku mwanya we adasimburwa kugeza ku mukino wa nyuma w'ejo ndetse yewe byari bigeze n'aho yimwa ikipe y'igihugu y'u Rwanda "Amavubi" kugira ngo batazamubura muri iyi mikino ya nyuma.
AS Far Rabat yegukanye igikombe cya shampiyona cya 13 mu mateka yayo irusha inota rimwe gusa Wydad AC ya kabiri, yari ifite amanota 67 naho indi ari 66.
Imanishimwe Emmanuel Manguende, myugariro w’ibumoso yagiye muri AS Far Rabat muri 2021 aho yari avuye mu Rwanda akina mu ikipe ya APR FC.
Abakinnyi ba AS Far Rabat barimo Manguende nyuma yo guhabwa imidari
Manguende ari kumwe n'umufasha we n'umwana we bifotoza nyuma yo kwegukana igikombe
Manguende asoma igikombe begukanye
Eng
RSS 
TANGA IGITECYEREZO