Mu gisa n'agasopo Ubushimwa bwaburiye Amerika bunayishinja gushoza intambara y'Ubutita

Ibi General Li Shangfu,yabitangarije mu nama ya shangri -la dialogue  yabereye mu Gihugu cya Singapour ku cyumweru  yahuzaga ibihugu byo mu Karere k'inyanja ya pasifika n'ibigo byo muri Aziya  ,

Mu nama ku mutekano, Jenerali Li Shangfu yavuze ko "ibihugu bimwe" birimo gukaza umurego wo kwigwizaho intwaro muri Aziya. yavuze ko Isi ari nini bihagije ku Bushinwa na Amerika, kandi ko ibi bihugu bibiri by'ibihangange bikwiye kureba uko byumvikana.

Mbere, Amerika yavuze ko hari ingendo "zitarimo umutekano" zirimo gukorwa n'ubwato bw'intambara bw'Ubushinwa, iruhande rw'ubwato bw'intambara bwa Amerika mu Bunigo bwa Taiwan.

Ku wa gatandatu, igisirikare cya Amerika kirwanira mu mazi cyavuze ko ubwato bw'intambara bw'Ubushinwa bwagenze "mu buryo butarimo umutekano" bwerekeza iruhande rw'ubwato bw'intambara bwa Amerika, ubwo bwari bunyuze mu bunigo bwa Taiwan buri kumwe n'amato y'intambara ya Canada.

Ubushinwa bwanenze ibyo bihugu byombi kubera icyo bwise "guteza ibyago ku bushake". Amerika na Canada byavuze ko amato yabyo yari arimo kugenda ahemewe n'amategeko mpuzamahanga.

Jenerali Li, wabaye Minisitiri w'ingabo muri werurwe uyu mwaka, yashinje Amerika kugira "imitekerereze yo mu ntambara y'ubutita" ndetse avuga ko ibyo "birimo kongera cyane ibyago byo mu rwego rw'umutekano".

Mu ijambo rye, yavuze ko Ubushinwa butazemera ko amarondo y'ubwato bwa Amerika n'inshuti zayo aba "urwitwazo rwo kugira ubwiganze bw'ingendo z'amato".

Abajijwe ku byabereye mu Bunigo bwa Taiwan, yavuze gusa ko ibihugu byo hanze y'ako Karere birimo kongera ubushyamirane.

Ubushinwa bwanze ubusabe bwa Amerika bwo kugirana ibiganiro bya gisirikare bitaziguye, bubikora mu kwamagana ibihano Amerika yafatiye Jenerali Li mu mwaka wa 2018 kubera intwaro zaguzwe mu Burusiya.

Muri iyo nama yo muri Singapour, Minisitiri w'ingabo wa Amerika Lloyd Austin yanenze Ubushinwa kubera kwanga kugirana ibiganiro bya gisirikare.

Jenerali Austin na Jenerali Li bahanye ikiganza barasuhuzanya ndetse bavugana akanya gato ubwo habaga gusangira ifunguro rya nimugoroba ku wa Gatanu ryo gutangiza iyo nama, ariko nta kintu cy'ingenzi baganiriye, nk'uko amakuru abivuga.

Imvugo irimo "kworoshya" ya Minisitiri w'ingabo w'Ubushinwa igaragaza ko ibiganiro na mugenzi we wa Amerika bishoboka, ariko ko Amerika igomba gukuraho ibihano yamufatiye, nk'uko byavuzwe na Zhou Bo, wahoze mu ngabo z'Ubushinwa ubu akaba ari mu kiruhuko cy'izabukuru.

Jenerali Li yafatiwe ibihano mu 2018 kubera kwakira ibikoresho bya gisirikare bivuye mu Burusiya. Manda ye y'imyaka itanu nka Minisitiri w'ingabo yatangiye muri uyu mwaka, ariko ibyo bihano bimubuza gukorera ingendo muri Amerika, ndetse bituma agorwa no gutumira Jenerali Austin mu Bushinwa, nk'uko Zhou akomeza abivuga.

Zhou, ubu ukora nk'umushakashatsi mu kigo cyiga ku mutekano mpuzamahanga n'igenamigambi cyo kuri Kaminuza ya Tsinghua i Beijing, yagize ati: "Niba igihano gihari, ni gute dushobora kuvugana? Ibihano bifite ingaruka cyane".

Bamwe mu bategetsi bo mu butasi bitabiriye inama y'abakuru b'ubutasi muri iyo nama ngari y'i Singapour, nk'uko bitangazwa n'Ibiro Ntaramakuru  by'Abongereza ,Reuters.

Nubwo hari umwuka mubi mu mubano wa diplomasi, umutegetsi wo hejuru wo muri Minisiteri y'Ububanyi n'Amahanga ya Amerika yageze mu Bushinwa mu ruzinduko rw'icyumweru, aho azaganira ku ngingo zitandukanye n'abategetsi bo mu Bushinwa.

Umubano hagati ya Amerika n'Ubushinwa wajemo igitotsi mu myaka ya vuba aha ishize kubera ibibazo byinshi, birimo nko kuba Ubushinwa buvuga ko Taiwan ari iyabwo, no kubera ubushyamirane bwo mu karere k'inyanja yo mu majyepfo y'Ubushinwa.

Lt.Gen. Jing Jianfeng wo mu ngabo z'Ubushinwa yavuze ko nta mwanya uhari wo kumvikana kuri Taiwan, ashinja Amerika kwivanga mu bibera muri  ako karere.

Nyuma y'iyo nama  Jianfeng yabwiye abanyamakuru ko icyemezo cya Amerika cyo kongera umubare w'abasirikare muri ako karere, gishobora kongera ibyago by'uko habaho gukozanyaho.

Isoko: BBC