U Rwanda ruracakirana na Brazil ku mukino wa nyuma w'igikombe cy'Isi gitegurwa na PSG

Irerero ry'umupira w'amaguru mu Rwanda ryashinzwe n'ikipe ya PSG, riri mu gihugu cy'u Bufaransa, aho ryitabiriye imikino y'igikombe cy'Isi gitegurwa n'iyi kipe buri mwaka. Iri rerero ryatwaye amakipe y'icyiciro bibiri, harimo icyiciro cy'abatarengeje imyaka 11 ndetse n'icyiciro cy'abatarengeje imyaka 13. 

Kuri iki cyumweru, nibwo ibi byiciro byombi byakatishije itike y'umukino wa nyuma aho kugera ubu nta kipe nimwe iratsindwa umukino n'umwe, ndetse amakipe yose y'u Rwanda akazakina n'ikipe y'igihugu ya Brazil nayo yakomeje mu cyiciro cy'imyaka 11 na 13.

U Rwanda mu batarengeje imyaka 11, ni ubwa mbere rugeze ku mukino wa nyuma, kuko mu mwaka ushize ubwo bitabiraga bwa mbere, abatarengeje imyaka 13 nibo bageze ku mukino wa nyuma banegukana igikombe 

U Rwanda rwageze ku mukino wa nyuma mu batarengeje imyaka 13, rutsinze Antilles ibitego 4-0, naho mu batarengeje imyaka 11, rukaba nabwo rwatsinze Antilles ibitego 4-2.

Mu mikino y'amatsinda, ari naho iki gikombe cy'Isi cyahereye, mu batarenge imyaka 11 u Rwanda ratsinze Kuweit ibitego 5-0, rutsinda U Bufaransa ibitego 4-0, rutsinda na Turkey ibitego 3-1. 

Mu batarengeje imyaka 13 u Rwanda rwanganyije n'u Bwongereza ibitego 3-3, runganya n'u Bufaransa igitego 1-1, rutsinda Turkiya ibitego 5-0, nyuma rutsinda Korea y'Epfo ibitego 2-0.

Imikino ya nyuma iraba kuri uyu wa mbere, ibere kuri sitade Parc De Princes, ari naho ikipe ya Paris Saint-Germain ikinira. 

Shema wa mbaye ubururu, ni Kapiteni w'ikipe y'abatarengeje imyaka 11, akaba ariwe umaze gutsinda ibitego byinshi bigera kuri 11. 

Brazil niyo igomba gucakirana n'u Rwanda mu byiciro byombi