Ahabanza Imikino

Ibiti byavuzaga ubuhuha! Uko byari byifashe Napoli yegukana igikombe nyuma y'imyaka 33-AMAFOTO

Yanditswe na: Aloys Niyonyungu
Taliki:5/05/2023 9:11 0

Ikipe ya Napoli yaraye yegukanye igikombe muri Shampiyona y'u Butaliyani, abafana bananirwa kwihanganira ibyishimo bishora mu kibuga bibaviramo gukubitwa nubwo nabyo batabyumvaga.

Ku munsi w'ejo shampiyona y'u Butaliyani yarakomezaga, hakinwaga umunsi wa 33 aho Udinese yari yakiriye Napoli kuri Dacia Arena saa mbili n'iminota 45. Ikipe ya Napoli yagiye muri uyu mukino ibizi ko ikeneye nibura kunganya ikabona inota 1 igahita yegukana igikombe.

Udinese niwe yafunguye amazamu hakiri kare ku munota wa 13 ku gitego cyatsinzwe na Sandi Lovric ku mupira yahawe na Iyenoma Destiny Udogie. Iyi kipe yakomeje kugora Napoli ariko ku munota wa 52 rutahizamu uri mu bagezweho ku Isi, Victor Osimhen yahise aterekamo igitego cyo kwishyura, ibyishimo biba ibyishimo.

Umukino warangiye amakipe yombi akinganya, Napoli iba itwaye igikombe nyuma y'imyaka 33, abafana b'amakipe yombi bishora mu kibuga. Abafana ba Udinese bari bari mu rugo ntabwo binjiye mu kibuga gusa kuko bari bafite n'inkoni bakubita aba Napoli mu buryo bukomeye.

Abafana bakubise abandi karahava

Kugira ngo imirwano irecyere byasabye kwitabaza Police nayo iza ikubita buri umwe kugira ngo bave mu kibuga. Ibyishimo ntabwo byari biri kuri sitade ya Udinese gusa kuko mu mihanda ya Naples hari hazuye abafana baturitsa imiriro mu kirere.

Napoli yaherukaga igikombe cya shampiyona mu 1990 igifite Diego Maradona nka kapiteni wayo. Yatwaye igikombe cyo muri uyu mwaka w'imikino hakibura imikino 5 muri shampiyona y'icyiciro cya mbere mu Butaliyani.

Uku kunganya na Udinese byatumye bashyiramo ikinyuranyo cy'amanota 16 kuri Lazio ya 2 nyuma y'imikino 33 bamaze gukina. Iki gikombe batwaye ni icya 3 nyuma y'ibindi 2 bahawe na Maradona mu myaka ine gusa.