Beacon of Hope Christ Ministries yakoze igiterane cyagarutse ku kugarukira Imana no kwigisha ibibi by'ibiyobyabwenge, bamwe mu bakiriye agakiza batanga ubuhamya bw'urugendo rwabo rw'ubuzima bakoresha ibiyobyabwenge, ndetse n'ubuzima bafite nyuma yo kubireka.
Ni igiterane cyateguwe na Beacon of Hope Christ
Ministries yashinzwe ndese iyoborwa na Pastor Odeth Mutoni. Bagiteguye ku bufatanye n’umurenge wa Kigarama, mu ntego yo kwigisha ingaruka n’ibibi
biterwa no kunywa ibiyobyabwenge.
Cyahuje abantu batandukanye
barimo inzego z’ubuyobozi, abakozi b'Imana barimo Apostle Gasabira Emmanuel, Apotle Sosthene
Serukiza, Pastor Odeth Mutoni ndetse n’abahanzi batandukanye.
Bamwe mu baramyi bacyitabiriye barimo Gaby Irene Kamanzi, Danny Mutabazi na True Promises. Iki giterane cyagarutse ku myitwarire
ikwiriye kuranga abizera Uwiteka, ndetse no kuzibukira ibiyobyabwenge.
Iki giterane cy’ivugabutumwa no kurwanya ibiyobyabwenge,
cyari gifite isomo fatizo rivuga ngo “Mwese abarushye n’abaremerewe nimuze
munsange ndabaruhura”, rikaba riboneka muri Matayo 11: 28.
Igiterane kiswe “His Last Command Our First Concern”, cyatangiye kuya 18 Werurwe 2023, kirangiya kuya 19 Werurwe 2023, hagamijwe
kwigisha no gukangurira abantu kudakoresha ibiyobyabwenge kuko byangiza ubuzima
bwa muntu.
Pastor Odeth Mutoni wari uyoboye iki giterane, yakiriye abashumba bose bari mu giterane, abizera bihannye bakava mu biyobyabwenge, abizera muri rusange, ndetse n’abashyitsi bose baje kwifatanya nabo,abifuriza imigisha.
Ubuhamya bwa bamwe mu bizera barokotse ibiyobyabwenge
Ntakirutimana Gaston yavuze ko yahindutse umukirisitu muri Beacon, ariko avuga ko mu buzima bwe atigeze ashimisha Imana na gato, gusa ku bwo gufashwa n'abakozi b'Imana, arahinduka.
Yagize ati "Nakoresheje ibiyobyabwenge mu gihe kigera ku myaka 20, kandi nari mbayeho ubuzima bw'urugomo, gufungwa kenshi no gukora ibikorwa bikojeje isoni Imana".
Uyu musore na bagenzi be bashimiye Imana yabakijije bagahinduka abantu bazima.
Odeth Mutoni ubwo yavugaga inshingano za Beacon of
Hope Christ Ministries, yashimye Imana yabarinze mu gihe cy'iki giterane, maze yakira
bamwe mu bashumba batambutsa ijambo ry’Imana.
Apostle Gasabira Emmanuel yabwiye abizera ko n'iyo baba bumva ko badakwiye, Imana yiteguye kubakira, gusa abibutsa ko bagomba kwiyegurira Imana bamaramaje. Ati “Abantu bareba uko uri ariko Yesu areba uko uzaba”.
Apotle Sosthene Serukiza yashimye Imana ku bw’igiterane, n’umusaruro
cyatanze. Yavuze ko iyo ugiye mu Mana ukaba umukiranutsi mwiza, uhinduka
umukiranutsi w’umunyembaraga.
Yibukije abizera ko bafite amahirwe ko ubaruhura
ahari, nubwo baba barahuye n’ibikomeye biremereye, ibigeragezo by’indenga kamere, n’ibindi
byose binaniza ubuzima bwa muntu
Yagize ati “Bamwe muruhijwe n’amateka mwagize
ahahise, abandi mwahuye n’ibigeragezo bikomeye, ariko muhumure, ubaruhura arahari, mumwemerere abaruhure”.
Mu gusoza iki giterane, Pastor Odeth Mutoni yashimye
buri wese witabiriye, maze yibutsa buri mwizera wese ko gusanga Imana ari yo
nzira yonyine yo gukira ibyaha no kubizinukwa.
Yashimye ubuyobozi burimo Umurenge wa Kigarama, mu
gufatanya gukora iki giterane no kwamagana ibiyobyabwenge byibasiye ubuzima bw’urubyiruko
ndetse n’abandi babikoresha.
Pastor Odeth Mutoni, Umuyobozi Mukuru wa Beacon of Hope Christ Ministries
TANGA IGITECYEREZO