Muri Leta ya New York hateranye inama yahuje inzego z'umutekano yari igamije gufata ingamba zo guhangana n'inkurikizi zishobora guturuka ku itabwa muri yombi rya Trump.
Inzego zishinzwe umutekano muri Leta ya New York muri Leta Zunze Ubumwe za Amerika, zatangiye kwitegura uko bahangana n'abashyigikiye Donald Trump igihe umushinjacyaha yakwemeza ko agomba gutabwa muri yombi.
Kuwa Mbere tariki ya 20 Werurwe mu mujyi wa New York mu Burasirazuba bwa Leta Zunze Ubumwe za Amerika habereye inama yahuje inzego z'umutekano yari igamije kwitegura uko abashinzwe umutekano bashobora kwitwara igihe umushinjacyaha yasohora impapuro zo guta muri yombi uwahoze ari Perezida wa Amerika, Donald Trump.
Ibinyamakuru byo muri Amerika bivuga ko polisi y'icyo gihugu yatangiye imyiteguro ku buryo abapolisi bamaze gushyirwa ku Rukiko rw'ahitwa Manhattan.
Nubwo Polisi yamaze kuzenguruka urwo rukiko ariko inzego zishinzwe kubungabunga umutekano zifite impungenge ko igihe Trump azajyanwa mu rukiko hashobora kuzaba imyigaragambyo nk'uko byagenze muri Nzeri 2021 mu mujyi wa Washington DC ubwo abambari be bakoreye imyigaragambyo hafi y'Ingoro y'Inteko ishinga Amategeko.
Mu mpera z'icyumweru gishize Perezida Donald Trump yamenyesheje abamushyigikiye ko kuri uyu wa Kabiri hari umugambi wo kumuta muri yombi anabasaba kwigaragambya kugira ngo ubutegetsi bugaruke mu maboko yabo.
Trump ashinjwa icyaha cyo kwica amategeko agenga gucunga ingengo y’imali y’umuntu wiyamamaza mu matora.
Umushinjacyaha ahera ku madolari 130,000 uwari kandida Trump yahaye ihabara rye mu mwaka wa 2016 kugira ngo atamena ibanga ry'uko yamubereye ihabara.
Umushinjacyaha nasohora impapuro zo kumuta muri yombi, azaba abaye umuntu wa mbere wayoboye Amerika uzaba atawe muri yombi kubera ibyaha akekwaho n'umushinjacyaha.
Uwunganira Donald Trump mu mategeko, avuga ko umukiriya we nta byaha yakoze kandi ari umwere ku byo ashinjwa.
Uyu munyamategeko na Trump avuga ko ibyaha ashinjwa ari uburyo bwo kumubuza amahirwe yo kongera kuyobora Leta Zunze Ubmwe za Amerika dore ko yatangaje ko mu matora azaba mu mwaka utaha aziyamamaza.
Inkomoko: NBCNEWS
Eng
RSS 
TANGA IGITECYEREZO