Abafana bavugirije induru Lionel Messi nawe ahitamo kwivumbura umukino urangiye

Ibi byabereye mu mukino ikipe ya Paris Saint-Germain yakiriyemo Rennes mu mikino yo ku munsi wa 26 muri shampiyona y'u Bufaransa, iyi kipe byarangiye itsindiye Paris Saint-Germain kuri Parc Des Princes ibitego 2-0.

Igitego cya mbere cyatsinzwe na Karl Toko Ekambi ahawe umupira na Benjamin Bourigageaud ku munota wa 45, naho igitego cya 2 gitsindwa na Arnaud Kalimwengo ahawe umupira na Lesley Ugochokwu ku munota wa 48.

Muri uyu mukino abakinnyi basanzwe bagenderwaho, Lionel Messi na Kylian Mbappé ntacyo bafashije ikipe yabo kuko ubu ni ubwa mbere Paris Saint-Germain yatsindiwe mu rugo mu minsi 715. Uyu mukinnyi ukomoka muri Argentine yateye amashoti 2 gusa agana mu izamu, atanga imipira 5 imbere y'izamu, yaremye uburyo 2 gusa bwashoboraga kuvamo ibitego ndetse yanaatakaje imipira inshuro 25.

Lionel Messi umukino ukirangira yahise yigira mu rwambariro asiga abandi bakinnyi mu kibuga

Nk’uko Goal.Com yabyanditse mbere y’uko umukino utangira,  abakinnyi bagiye kwishyushya. Abafana ba Paris Saint-Germain bavugirije induru Lionel Messi nk’uko bari barabiteguye, ariko nawe umukino ukirangira yahise yigira mu rwambariro asiga abandi bakinnyi mu kibuga bonyine bashimira abafana bari baje kubashyigikira.

Lionel Messi akomeje kwangwa n'abafana ba Paris Saint-Germain nyuma y’aho ikipe yabo ikuwemo na Bayern Munich muri 1/8 cya Champions League, ibi ni ibigenda bigaragaza ko kuba yakongera amasezerano bizagorana.

Kugeza ubu uyu mukinnyi umaze gutwara Balloon d'Or 7 amaze gutsinda ibitego 18 yanatanze imipira 17 ivamo ibitego, mu mikino 32 amaze gukina muri uyu mwaka w'imikino.

Kylian Mbappé wagerageje amashoti 2 mu mukino ariko umuzamu akayakuramo 

Lionel Messi uri kugenda abihirwa muri Paris Saint-Germain