Iperereza ryasize rimufungiye habi ku isi ryatwaye Miliyari 50 Frw! Byinshi ku buhezanguni bwa Prof Kaczyneski

Uwo ni we tugiye kugarukaho none bya nyabyo kubera amateka yanditse isi itazibagirwa n’ubuhanga yari afite. Yitwa Theodore John Kaczynski, yavukiye muri Chicago umujyi ukomeye muri Leta ya Illinois muri Leta Zunze Ubumwe za Amerika kuwa 22 Gicurasi 1942.

Nyina yitwaga Wanda Theresa wakoraga mu by’ubwarimu na se Theodore Richard Kaczynski wakoraga sosiso. Ababyeyi be bombi bari abakristo Gatulika mbere yuko baba abahakanyi bakomeye bo mu idini rya ‘Atheist’.

Ababyeyi be bashyingiranwe kuwa 11 Mata 1939.

Ubwo yari afite imyaka hagati yitandatu n’icyenda, Kaczynski yigaga mu ishuri ribanza rya Sherman muri Chicago, abayobozi be bamubonagamo ubuhanga buzatuma avamo igihangange.

Mu 1952 nyuma yo kuvuka kwa murumuna we David wabonye izuba mu 1949, hamwe n’ababyeyi babo bimukiye mu gace ka Evergreen Park ho muri Illinois, Kaczynski aha atangira kwiga mu ishuri ryisumbuye rya Central Junior.

Nyuma yo gupima ikigero cy’ubwenge bwe bagasanga burenga ikigereranyo cy’abantu basanzwe kiba kiri hagati ya 85 na 115, (we bwageraga ku 167), byatumye hari imyaka atarutswa mu mashuri ye, atangira guhesha umuryango we icyubahiro gikomeye.

Ababyeyi be batangiye kugerageza igishoboka cyose ngo abana babo bazagere kure hashoboka dore ko na murumuna we David atari yoroshye mu bijyanye n’ubwenge.

Abaturanyi b’uyu muryango bafataga Kaczynski nk’umuhanga ariko ubayeho mu bwigunge kuko nta nshuti yagiraga. Amashuri yisumbuye yaje kuyasoreza mu ishuri rya Evergreen Park Community aho yari n'umwe mu bagize itsinda ry’umuziki rya ‘Marching’.

Yari kandi mu itsinda ry’abahanga bafite inkomoko mu Budage. Mu 1996 umwe mu biganye na we yagize ati:”Ntabwo yigeze na rimwe abera nk’umuntu, nta mico nk’iyabantu basanzwe yagiraga, ubwonko bwe buhora bukora.”

Muri ibyo bihe Kaczynski yari yariyeguriye isomo ry’imibare, akamara amasaha yiga anakora amahurizo yayo. Yari mu itsinda ry’abanyasiyansi bari bazwiho guhorana ibikapu biteye nka valize birimo ibitabo ryari rizwi nka ‘Briefcase Boys’, ugenecyereje mu kinyarwanda ni abasore bagendana amavalisi.

Amashuri ye yisumbuye yayasoje ari mu ba mbere mu gihugu ku myaka 15 gusa, ibi byatumye ahita ahatirizwa kujya gukomereza muri Kaminuza ya Harvard iri ku isonga mu zikomeye ku isi.

Ku myaka 15 yemerewe buruse muri Harvard, atangira kuyigamo ku myaka 16 hari mu mwaka wa 1958. Urumva yari akiri umwana cyane, ntiyari anafite uruhushya rwo gutwara imodoka.

Mu mwaka we wa mbere yari atuye ahazwi nka 8 Prescott Street, ahantu hashyiriweho abanyeshuri bashya kandi bakiri bato. Mu myaka 3 ya nyuma yagiye kuba ahitwa Eliot House.

Yaje gusoza icyiciro cya kabiri mu ishami ry’Imibare mu mwaka wa 1962 ku kigereranyo cy’amanota yo hejuru kizwi mu rurimi rw’icyongereza nka Grade Point Average [GPA] aho yari afite 3.12.

GPA ubusanzwe ni igipimo cyerekana imitsindire y’umunyeshuri watsinze neza iba iri hagati ya 1 kugera kuri 4.

Kaczynski ari mu banyeshuri bakoreweho ubushakashatsi na Henry Murray, bujyanye no kwihanganira itotezwa kwa muntu hagamijwe kumenya neza urugero rw’ubwihangane bwagirwa n'umukozi wa CIA [Centre Intelligence Agency], ikigo cy’ubutasi cy’abanyamerika kiri mu bya mbere bitinyitse.

Ni ubushakashatsi bwakorwaga hifashishwa gutoteza umuntu ngo harebwe kwihangana kwe binyuze mu buryo busikologi. Ibi byemezwa na bamwe ko ari yo soko y’ubwihebe bwa Kaczynski, umushinga w’ubwo bushakashatsi uzwi nka ‘Project MKUltra’.

Mu mwaka wa 1962 Kaczynski yatangiye kwiga muri Kaminuza ya Michigan aho yakuye impamyabumenyi y’icyiciro cya gatatu cya Kaminuza mu 1964 n’impamyabushobozi y’ikirenga mu 1967 hose yigaga imibare.

Yatangiye gushaka akazi yemererwa akazi muri Kaminuza ya California na Chicago ariko umushahara wari uwa ntawo kugera ubwo mu yo yari asojemo ya Michigan bamuhaga akazi kazajya kamuha 2,310 y’amadorali angana 20, 693 mu madorali y'ubu [Icyo gihe yari Miliyoni 2 Frw, ubu ni Miliyoni 20 Frw].

Yatangiye kwiga ku mahame atandukanye y’imibare. Professor Peter Duren avuga kuri Kaczynski yaragize ati: ”Yari umuntu udasanzwe utewe umuhate n'akazi ke, ntabwo yari ameze kimwe n’abandi banyeshuri yitangiraga ubushakashatsi bwe, ubona afite inyota yo gusobanukirwa bya nyabyo ishingiro ry’imibare.”

Naho Professor George Piranian amugarukaho yavuze ko ari we muntu mu mateka yigeze abona wari utandukanye. Ati: ”Ntecyereza ko byaba bidahagije kuvuga ko yari umuhanga cyangwa umunyabwenge.” Professor Allen Shields na we yunzemo agira ati: ”Niwe muntu mwiza nigeze mbona.”

Bimwe mu bihe bitazibagirana kuri kuri uyu mugabo!

Mu 1966 Kaczynski yashatse kwhinduza igitsina ariko mu nyuma aza kwisubiraho. Mu 1967 yahawe igihembo cy’umushakashatsi mwiza mu mibare muri Kaminuza ya Michigan, icyo gihe yarimo akorera impamyabumenyi y’ikirenga.

Mu buzima bwa Kaczynski nta nshuti yari afite ndetse yigeze no kwegura ku kazi muri Kaminuza ya California nyuma y'uko bigaragaye ko adakunzwe n’abanyeshuri kuko atigishaga neza ndetse nta n'ibisubizo yatangaga ku bibazo bamubazaga, hari 1970.

Mu 1971 yasubiye kubana n’ababyeyi be muri Leta ya Illinois aho yamaze agahe gato, ubundi aza kujya gutura muri Montana mu nzu yari yarubatse iciriritse abayeho ubuzima bwa gikene, ahantu hatari umuriro, nta mazi, abeshejweho n'akazi hafi ya ntako ubundi afashwa n’ababyeyi be.

Kaczynski yari afite intego yo kwigira ariko na none ntiyavugirwagamo ndetse yarwanyaga bikomeye ibintu by’ikoranabuhanga kuko nta keza yaribonagamo. Byaje guhuhuka ubwo yasomaga igitabo cy’umufilozofe w’umufaransa Jacque Ellul kitwa The Technological Society.

Icyo gitabo cyavugaga ko ikoranabuhanga riri kugenda rifata intera nyamara ari ryo herezo ry’isi. Iki gitabo Kaczynski yagifataga nka Bibiliya. Mu 1998 ubwo yasobanuraga iby’inyigisho zigikubiyemo, yagize ati: ”Ubwo nasomaga igitabo bwa mbere, naratangaye cyane kubera ko ntekereje numvaga ari umuntu uri kuvuga ibyo nanjye nahoze ntecyereza.” 

Kaczynski yageze ku rwego atifuzaga akavuyo k’abantu benshi, ibintu byafashe indi ntera mu mpeshyi ya 1983 nk'uko yabisonuye ati: ”Iyo mpeshyi hari abantu benshi hafi y’inzu yanjye, nafashe umwanzuro mvuga ko nkeneye umwanya. Naje gusubira ku ivuko naho mpageze nsanga harangiritse bahanyujije umuhanda ntabwo wakumva uburakari nari mfite.”

Akomeza agira ati: ”Icyo gihe ni bwo nafashe umwanzuro ko aho kurwana no gushaka ahandi hantu ahubwo ngomba gukora uko nshoboye nkagarura ibihe by'ahahise nkihorera.”

Kaczynski muri ibyo bihe byose yasurwaga kenshi na se wari unarembejwe na kanseri y'ibihaha kugera kuwa 02 Ukwakira 1990 ubwo se yahitagamo kwiyahura.

Kaczynski yagiye atega ibisasu bitandukanye bibarirwa muri 16 byivuganye abantu bagera kuri 3, abandi 23 barakomereka, byari hagati ya 1978 na 1995. Ibintu byose yakoraga, yagiraga ukwigengesera cyane ku buryo nta kimenyetso yasigaga.

Bimwe mu bisasu Kaczynski yagiye atega, yahereye ku cyo yoherereje nk’ubutumwa bwanditse Buckery Crist wari umwarimu muri Kaminuza ya Northwestern, ariko nibwabasha kumugeraho ahubwo ushinzwe umutekano witwa Terry wabufunguye ni we bwaturikanye arakomereka, hari kuwa 25 Gicurasi 1978.

Na none nyuma y’umwaka yongeye kwibasira ya Kaminuza mu gisasu cyari mu gipfunyiko cy'itabi umunyeshuri warimo ahasoreza John Harris ni we wagifunguye kiramukomeretsa.

Mu 1979 igisasu cyashyizwe mu mwanya wagenewe imizigo mu ndege ya Boeing 727 y’ikompanyi y’ingendo y’abanyamerika ya Airlines Flight 444, yavaga Chicago yerekeza mu murwa mukuru wa Leta Zunze Ubumwe z’Amerika, Washington DC.

Kuba cyari gifite ikosa mu kukiregera, byatumye kidaturitsa indege ariko cyateje umwotsi bituma igwa igitaraganya.

Kaczynski yaje koherereza ikindi gisasu umuyobozi wa kompanyi itwara indege ya United Airlines, Percy Wood. Cyamutwitse igice kinini cy’umubiri we.

Yakoreshaga uburyo bwihariye mu gutunganya no gutega ibisasu bye ku buryo hari n'ibyo yoherezaga nk’urwandiko cyangwa mu gitabo. Ibisasu bye byabaga bikoze hifashishijwe ahanini ibimera, ibiti n’imbaho.

Ibisasu byinshi yagiye akora yabyoherereza abahanga nkawe bigisha muri Kaminuza zitandukanye zirimo na California yakozemo akaza kwegura. Harimo icyakomerekeje bikabije Professor Diogenesis Angelakos, hari 1982.

Muri Gicurasi 1985 Captain John Hauser yatakaje intoki enye mu gisasu cyoherejwe na Kaczynski, mu Ugushyingo 1985 Professor James V McConell n’umwunganzi we Nicklaus Suino nabo barakomeretse bikamije nyuma yo kwakira ubutumwa babufungura bagasanga ari igisasu.

Nyuma yo gumeretsa no kwivugana abantu batandukanye, yatangiye kwemera ibyaha avuga ko azarecyeraho ibikorwa by’ubuhezanguni n’ubwihebe mu gihe ibyo asaba bizaba byubahirijwe.

Yohereje ubutumwa bw’amagambo ibihumbi 35 asaba ibitangamakuru kubumushyirira hanze, ibintu byabanje kwigwaho na FBI hibazwa niba bwarekurwaga.

Ariko ku burenganzira bwatanzwe n’Umushinjacyaha Mukuru Janet Reneo n’Umuyobozi Mukuru wa FBI, byabaye ngombwa ko burekurwa hagamijwe kuburira abaturage no kureba niba hari uwamenya nyiri iyo nyandiko.

Mu byo Kaczynski yasabaga harimo ko ikoranabuhanga rikwiriye guhagarikwa kuko riri kwangiza imibereho ya muntu kandi isi yose ibibona nubwo yirengagiza.

Yasabaga ko ibintu byasubira nko mu myaka yo hambere yaryo kuko bitabaye ibyo ubuzima bwa muntu buri habi. Inyandiko y’uyu mugabo yagiye ivugisha abasesenguzi benshi, bamwe bavuga ko ari mu kuri, abandi bakagaragaza ko byamucanze yataye umutwe.

Nk’uwitwa Alston Chase, mu 2000 yabwiye ikinyamakuru The Atlantic ati:”Ni ukuri ko abantu babona Kaczynski nk'uwataye umutwe kuko ariko bifuza kubyizera ariko ibitekerezo bya Kaczynski nubwo bidasanzwe bifite ishingiro.”

Yagaragaje ko Kaczynski akwiriye gufatwa nk’umuntu utandukanye ariko na none ibyo avuga bikwiriye gutera isi yose ubwoba. Ibikorwa byose bya Kaczynski ntabwo higeze hamenyekana niba yaba yari afite abandi yabifatanyagamo nabo.

Hashingiwe kandi ku buryo ibisasu by’uyu mugabo byabaga bikozemo, bisangwa ko yari yarancengewe burundu n’inyigisho z’umufilozofe Jacques Ellul, Inzobere mu buzima bw’inyamaswa Desmond Morris n’umusikologe Martin Seligman nk'uko byagaragajwe muri raporo y’ubushakashatsi yashyizwe hanze mu mwaka wa 2021.

Ibikorwa by’ubwihebe bya Kaczynski byahagurukije FBI ndetse kugeza n’ubu haracyakorwa ubusesenguzi ku birego bye.

Murumuna we David, yatangiye kugerageza kurengera mukuru we ariko biba iby’ubusa kuko abacurabwenge ba FBI batari bamumereye neza aho batangiye kumusaba kwerekana inyandiko ajya agirana na mukuru we ngo bazigereranye n’inyandiko yoherereje ibitangamakuru.

David yaje kuva ku izima yemera gukorana na FBI nyuma yo kwemererwa uburinzi n’umuryango maze atanga ibishoboka byose yasabwaga.

Kuwa 03 Mata 1996 ni bwo Kaczynski yatawe muri yombi anasanganwa inyandiko za paji zirenga ibihumbi 40 zivuga ku buryo bwa gihanga bwo gutunganya ibisasu.

Hanasanzwe inyandiko isa n'iyari yaratanzwe asaba ibyahindurwa kugira ngo ahagarike ibikorwa bye by’ubuhezanguni. Miliyari zigera kuri 50Frw nizo byemezwa ko zakoreshejwe mu iperereza ryagejeje ku itabwa muri yombi rya Kaczynski.

Muri Kamena 1996, Kaczynski yatangiye kuburanishwa mu mizi ndetse abavoka be bakora igishoboka cyose ngo adakatirwa urwo gupfa, ibitaramubujije kubirukana uko bari babiri ari bo Michael Donahoe na Judy Clarke.

Kaczynski yashyizeho Tony Sierra wakoresheje amayeri yose ashoboka, anatangaza ko umukiliya we afite indwara yo kumva ibidahari. Ni ibintu ariko byaje kunugwanugwa ko ari igitekerezo cyacuzwe na nyina na murumuna wa David Kaczynski bagira ngo aticwa.

Yaje gukatirwa burundu y’umwihariko mu mwaka wa 2006. Inzu ye yashyizwe mu cyamunara itangwaho agera kuri miliyari 15Frw, yahise agirwa impozamarira ku bagizweho ingaruka n’ibitero bye.

Imyaka 8 ya mbere yafungiwe muri gereza ya ADX Florence iri mu za Supermax (gereza zo ku rwego rwo hejuru), ikorerwamo iyicarubozo iherereye mu gace ka Florence ho muri Collarado.

Aha yaharemeye inshuti zirimo Rmazi Yousseg na Thimothy McVeign wari warakatiwe urwo gupfa yaje kugenerwa mu wa 2001.

Nubwo afunzwe ariko ubuhanga bwe, ibitabo n’inyandiko yanditse mu bihe bitandukanye biracyafatwa na benshi nk'iz’umumaro by’umwihariko muri Kaminuza ya Michigan yizemo.

Inyubako yabagamo yashyizwe mu mutungo wihariye wa FBI.

Kuwa 14 Ukuboza 2021 ku myaka 79 Kaczynski nubwo hatatangajwe indwara arwaye, yavanwe muri ADX Florence Supermax Prison yerekezwa mu kigo cy’ubuvuzi kizwi nka Federal Medical Center ho mu gace ka Butner muri North Carolina.

Ubuzima bwe bwagiye buvanwamo ibihangano bitandukanye kandi byamamaye, nka filimi yo mu 1996 yitwa Unabomber: The True Story, hari kandi filime y'uruhererekane Manhunt Unabomber yo mu 2011 kimwe na Ted K yo mu wa 2021. Hari n'ibice by’ubuzima bwe byifashishijwe muri Italian Unabomber.

Si ibyo gusa ahubwo hari ibitabo kandi byagiye byandikwa bishingiye ku buzima bwe nka The Age of Spiritual Machines cyo mu 1999 cya Ray Kurzweil ndetse hari n’ubushakashatsi n’ibiganiro mpaka byagiye bikorwa kuri we.

Umushinjacyaha Mukuru wa Leta Zunze Ubumwe za Amerika wa 86, Merrick Garland, yatangaje ko mu buzima bwe ikirego cy’ikihebe, umuhanga, umwanditsi, umushakashatsi waminuje, Professor Kaczynski, kiri mu byo adashobora kuzibagirwa bibaho. 

Ni umwe mu byihebe byahangayikishije Isi mu buryo bukomeye

Yategaga ibisasu mu bitabo n'ahandi hanyuranye

Avuga ko aticuza ibyo yakoze byose