RFL
Kigali

Menya uduhigo twa Cristiano Ronaldo na Wayne Rooney dushobora gukurwaho na Rashford muri Manchester United

Yanditswe na: Aloys Niyonyungu
Taliki:20/02/2023 16:42
0


Marcus Rashford utari kurekera gutsinda ibitego buri munsi, bishobora kumuviramo no gukuraho uduhigo twashyizweho n'abakinnyi bakomeye muri Manchester United .



Kuri iki Cyumweru tariki 19 zu kwezi kwa 02 nibwo Manchester United yafatiranye Leicester City iyi tsinda ibitego 3-0. Iyi kipe yahise igira amanota 49, ikurikira Manchester City ifite amanota 52 na Arsenal iri ku mwanya wa mbere n'amanota 54. 

Uramutse uvuze ko kuba Manchester United ifite amanota angana gutyo Marcus Rashford abifitemo uruhare runini ntabwo waba ubeshye, kuko no ku mukino w’ejo niwe watsinze ibitego 2 wenyine. 

Uyu mukinnyi ari mu bakinnyi bari kugira umwaka mwiza w'imikino, akaba amaze gutsinda ibitego 24 kandi ni ubwa mbere abigize mu mwaka umwe kuva yatangira gukina umupira w'amaguru mu buzima bwe.

Kuva yava mu gikombe cy'Isi cya 2022 cyaberaga muri Qatar yahinduye ibintu cyane, ikipe y'igihugu cye cy'u Bwongereza yakuwemo n'u Bufaransa, ariko kuva icyo gihe amaze gutsinda ibitego 16 mu mikino 17.

Rashford mu gihe yakomeza kwitwara neza gutya, byatuma akuraho uduhigo tw’abakinnyi 2 bakomeye Manchester United yagize mu myaka yashize. Ibitego 2 Marcus Rashford yatsinze ku munsi w’ejo, byatumye nibura mu mikino 7 yikurikiranya bamaze gukinira kuri Old Trafford afitemo igitego kimwe muri Premier League.


Marcus Rashford ugeze mu bihe byo gukuraho uduhigo twashyizweho n'abakinnyi bakomeye muri Manchester United

Kandi mu mateka ya Manchester United, abakinnyi babiri gusa nibo bakoze ibirenze ibi Marcus Rashford amaze gukora. 

Wayne Rooney kuri sitade ya Manchester United yatsinze nibura igitego 1 mu mikino 8 yikurikiranya. Yabikoze mu mwaka w'imikino wa 2009 -2010. Undi wabikoze ni Cristiano Ronaldo, mu mwaka w'imikino wa 2008.

Mu mikino ya Manchester United igiye kwakira muri Premier League ni Southampton tariki 11 zu kwezi kwa 03, Everton tariki 18 z’ukwa 04, Chelsea tariki 22 z’ukwezi kwa 04 ndetse na Aston Villa tariki 29 z’ukwezi kwa 04. Ku mukino wa Chelsea niho Marcus Rashford ashobora kuba yanganya na Cristiano Ronaldo, noneho kuwa Aston Villa akaba yakuraho agahigo ke. 

Naramuka ashoboye kugera kuri iki gikorwa, Marcus Rashford yazaba umukinnyi watsinze ibitego byinshi kuri Old Trafford mu marushanwa yose y'umwaka umwe w'imikino, kuva Wayne Rooney yabikora muri 2011-2012. 

Kugeza ubu Marcus Rashford amaze gutsindira ibitego 17 kuri Old Trafford kuva uyu mwaka w'imikino watangira, 11 byo muri Premier League, 1 cyo muri FA Cup, 4 byo muri League Cup na 1 cyo muri Europa League . Wayne Rooney we mu mwaka w'imikino wose yari yaratsinze ibitego 19.


Ejo Rashford yishimira igitego cya mbere yari atsinze Leicester City








TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND