Amakipe akomeye mu Bwongereza yakamejeje arashaka ko Manchester City ikurwa muri Premier League

Ku munsi w’ejo nibwo shampiyona y'ikiciro cya mbere mu Bwongereza yashyize hanze itangazo rivuga ko Manchester City iri gushinjwa ibyaha birenga 100 yaba yarakoze mu myaka 9, ibi byaha hari hashize imyaka 4 bikorwaho iperereza.

Bimwe mu byaha Man City ishinjwa harimo kudatanga amakuru y’ukuri ku bijyanye n’ibyo yinjiza ndetse n’ibyo isohora, kubeshya imishahara y'abakinnyi ndetse no kubeshya amafaranga yatanzwe ku bakinnyi bashya mu gihe binjira mu ikipe muri rusange. 

Iyi kipe kandi ishinjwa kurenga ku mategeko ya Premier League n’ay'ishyirahamwe ry'umupira w'amaguru ku mugabane w'iburayi (UEFA).

Nyuma y’uko aya makuru agiye hanze iyi kipe ya Manchester City nayo yashyize hanze itangazo ryayo, rivuga ko itunguwe no kuba bashinjwa na Premier League kutubahiriza amategeko agenga imari kuva mu mwaka w'imikino wa 2009 kugeza muri 2018, ndetse baha ikaze urwego rwigenga kuza gukora kuri iki kibazo.

Manchester City itwara igikombe cya mbere cya Premier League yatozwaga na Roberto Manchini

Nk’uko Sky sports ibitangaza, amakipe 5 akomeye muri Premier League ariyo Manchester United, Liverpool, Arsenal, Chelsea na Tottenham arashaka ko iyi kipe niramuka ihamwe n'ibi byaha igomba gukurwa muri Premier League, nta bindi bihano ihawe.

Bimwe mu bihano iyi kipe ishobora kuzahabwa mu gihe ibi byaha byayihama harimo gukurwaho ibikombe n'amanota ndetse n'ibindi, ariko ngo ibyo ntacyo byaba bivuze.

Umwe mu bayobozi b'ikipe ikomeye mu Bwongereza utatangajwe izina ubwo yaganiraga n'ikinyamakuru n'ubundi cyo mu Bwongereza, yagize ati"mu gihe ibi bihano byahama Manchester City hagomba gutangwa igihano gikwiye, aricyo cyo kuyisezerera burundu ikava muri Premier League". 

"Ibintu byamaze imyaka igera ku 9 dukorerwa ihohotera, kandi dushaka ko shampiyona yacu ikora ibintu bikwiriye".

Mu myaka 11, ikipe ya Manchester City imaze gutwara ibikombe 6 bya Premier League.