EPL: Tottenham yagwiriye Manchester City inzovu isubira mu gitereko

Kuri iki Cyumweru saa kumi n’ebyiri n'igice, Tottenham yakiriye Man City iranayitsinda.

Abakinnyi ba Tottenham 11 babanje mu kibuga: Lloris, Emerson, Romero, Dier, Davies, Perisic, Højbjerg, Bentancur, Kulusevski, Kane na Son.

Mu minota 2 ya mbere Tottenham yatangiranye amashagaga ubona ko ishaka igitego hakiri kare, ariko abasore ba Manchester City bihagararaho. Ku munota wa 4 abakinnyi ba Man City bakambitse imbere y'izamu, Nathan Ake na Bernardo Silva bagerageje gushota mu izamu ariko akavuyo k’abakinnyi ba Tottenham ntikatuma iyo mipira igera mu izamu. 

Abakinnyi ba Manchester City 11 babanje mu kibuga: Ederson, Lewis, Walker, Akanji, Ake, Rodrigo, Bernardo, Mahrez, Grealish, Alvarez na Haaland.

Ku munota wa 14 Rodrigo yakoze amabara atanga umupira mugufi kuri Rico Lewis, bituma Hojebjerg awukozaho amano uhita ujya kwa Harry Kane ahita atsinda igitego cya 1 cya Tottenham. Harry Kane yahise aba umukinnyi utsindiye Tottenham ibitego byinshi mu mateka yayo, yari yujuje ibitego 267.

Nyuma yo gutsindwa igitego, Manchester City yakomeje gukina umupira wayo wo guhererekanya bigatuma abakinnyi ba Tottenham babakorera amakosa ndetse bagahabwa n'amakarita y'umuhondo. Tottenham yo yacungiraga ku kuwirukankana ishaka igitego cya 2, ariko bikomeza kugorana.

Ku munota wa 40 Man City yabonye amahirwe yo kuba yakwishyura igitego ku mupira Jack Grealish yari ahaye Rodri ariko atera ishoti ry'abana, Hugo Lloris awufata ku buryo bworoshye.

Igice cya kabiri cyatangiye n'ubundi ubona Tottenham ishaka gutsinda igitego cya 2, kuko ku munota wa 46 gusa Harry Kane yarase igitego cyari cyabazwe. 

Harry Kane atsinda igitego

Ku munota wa 58 Man City yakoze impinduka mu kibuga kugira ngo ishake igitego cyo kwishyura. Havuyemo umukinnyi wo ku ruhande Mahrez, hinjiramo umukinnyi wo mu kibuga hagati Kevin De Bruyne.

Akazi ka Kevin De Bruyne katangiye gutanga umusaruro ku munota wa 64, ubwo yateraga kufura irimo ubwenge bwinshi kwa Julian Alvarez, ariko arekuye ishoti riremereye riragenda rikubita kuri Eric Dier umupira ujya muri koroneri. 

Tottenham yashoboraga kubona igitego cya 2, bitewe n'uburyo abakinnyi nka Son na Harry Kane bagiye barata. Ku munota wa 85 Romero wa Tottenham yabonye ikarita itukura ku ikosa yari akoreye Grealish, yari yabonye indi karita yahawe iya kabiri bihita bibyara umutuku gutyo. Umukino warangiye Tottenham ibonye amanota 3 itsinze igitego 1-0 Manchester City. Kugeza ubu Manchester City ni iya 2 n'amanota 45, naho Tottenham Hotspur ni iya 5 n'amanota 39. Arsenal ubu iri mu byishyimo kuko iyo Man City itsinda, hari gusigaramo ikinyuranyo cy'amanota 2 gusa.