REG VC yegukanye irushanwa ry'ubutwari inanije Gisagara VC

Mu mpera z'icyumweru twasoje, mu mukino wa Volleyball hakinwaga irushanwa rya Volleyball Heroes Tournament mu bagore n'abagabo. Imikino yabereye muri Gymnase ya Kimisagara, aho ku wa Gatandatu hakinwe imikino ya 1/2.

Mu bagabo, ikipe ya REG yari yegukanye shampiyona yahuye na Forefront yabaye iya 4, maze REG VC igera ku mukino wa nyuma itsinze amaseti 3-2. Mu mukino wa kabiri, Gisagara VC yabaye iya kabiri yakinnye na APR VC yabaye iya gatatu, umukino urangira Gisagara VC.

Gisagara VC muri 1/2 yatsinze APR VC 

Mu bagore, ikipe ya APR WVC yegukanye shampiyona, yahuye na Ruhango yabaye iya kane, iyitsinda amaseti 3-0, ihita igera ku mukino wa nyuma. Undi mukino, RRA yahuye na Forefront, birangira Forefront itsinze RRA amaseti 3-2 ihita igera ku mukino wa nyuma aho yagombaga guhura  na APR WVC. 

APR WVC itarakunze guhura na Ruhango muri shampiyona, yayitsinze amaseti 3-0 ihita igera ku mukino wa nyuma 

Imikino ya nyuma yabaye kuri iki cyumweru, APR WVC itsinze Forefront amaseti 3-2 ihita yegukana igikombe cya shampiyona, naho mu guhatanira umwanya wa gatatu RRA yatsinze Ruhango amaseti 3-0. 

Nk'ibisanzwe, APR WVC yatsinze Forefront ku mukino wa nyuma 

Mu bagabo, umukino wa nyuma wahuje REG VC na Gisagara VC, aho baherukaga guhura mi cyumweru cyari gitambutse, icyo gihe Gisagara VC ikaba yaratsinze REG VC. 

REG VC niyo yatsinze iseti ya mbere ku manota 25 kuri 17, iseti ya kabiri nayo, REG VC yayitsinze amanota 25 kuri 18 ya Gisagara VC abari aho batangira gukeka ko Gisagara igiye gukibitwa nk'uruhinja. 

Isetiya gatatu Gisagara VC yahise iyitsinda amanota 25 kuri 17, iseti ya kane nayo Gisagara iyitsinda 25 kuri 20, naho iseti ya 5 ari nayo kamarampaka, REG iyitsinda ku amanota 15 ku 10 ya Gisagara VC. 

REG VC yahise imanika igikombe cy'irushanwa ry'ubutwari

Mu mukino wo guhatanira umwanya wa 3, Forefront yatsinze byihuse ikipe ya APR VC amaseti 3-0. REG VC na APR WVC zikomeje gutangira umwaka neza, nyuma yaho zegukaniye ibikombe bya shampiyona, aya makipe yahise yegukana n'igikoma y'ubutwari 2023, mu gihe kitarenze iminsi 8 gusa. 

Gisagara VC yasaga n'iyacitse intege, yabaye iya kabiri 

Forefront yabaye iya gatatu ikoze akazi gakomeye ko gutsinda APR VC  

Mu bagore, RRA niyo yabaye iya gatatu