Etienne Ndayiragije, umwe mu batoza babonye Impamyabumenyi ya CAF bidasabye imyaka myinshi, yagizwe umutoza mukuru w'Ikipe y'igihugu y'u Burundi 'Intamba mu rugamba' nyuma y'ibyumweru bibiri atandukanye na Bugesera FC.
Uyu mutoza w'Umurundi yatoje Bugesera FC mu gihe cy'amezi 10, aho yageze asimbuye Mbarushimana Abdou wirukanywe mu ntangiriro za 2022 kubera umusaruro muke.
Ku ya 10 Mutarama 2023, nibwo Bugesera FC yanditse ku mbuga nkoranyambaga zayo yemeza ko yatandukanye n'umutoza Ndayiragije Etienne ku bwumvikane, mu gihe hari hashize amezi 6 gusa basinye amasezerano mashya y'amezi 6.
Mu masaha y'igicamunsi cyo kuri uyu wa Kabiri, Ishyirahamwe ry'umupira w'amaguru i Burundi (FFB) ryatambukije ubutumwa ku mbuga nkoranyambaga, ryemeza ko Etienne Ndayiragije yagizwe umutoza w'Ikipe y'igihugu nyuma yo guhabwa amasezerano y'imyaka 2.
Etienne yasinye amasezerano y'imyaka 2
Nk'uko bigaragara mu mafoto, Etienne Ndayiragije yasinye amasezerano ari kumwe n'umuyobozi w'Ishyirahamwe ry'umupira w'amaguru mu Burundi, General Alexandre Muyenge.
Havuzwe ko Bwana Ndayiragije azaba umuyobozi w'amakipe y'igihugu y'u Burundi mu byiciro byose, uhereye mu byiciro by'abato kugeza ku ikipe y'igihugu nkuru.
Ndayiragije yamamaye muri 2015, ubwo yatwaga igikombe cya Shampiyona y'icyiciro cya mbere mu Burundi atoza Vital'O FC. Nyuma y'aho yagizwe umutoza w'Ikipe y'igihugu ya Tanzania anatoza Azam FC ariko hose ntiyahagirira ibihe biryoshye.
Eng
RSS 
Gen Alexandre Muyenge uyobora FFB ni we wahaye amasezerano Ndayiragije Etienne
TANGA IGITECYEREZO