Filime yakorewe mu Bufaransa yakinnyemo umunyarwandakazi Kayije Kagame, yabuze amahirwe yo guhatana mu bihembo bya Academy Awards bisanzwe bizwi nka Oscars bikomeye bitangirwa muri Amerika.
Gutangaza filime zizahatana mu byiciro 23 bya Oscars
byakozwe kuri uyu wa Kabiri tariki 24
Gashyantare. Uru rutonde rwa filime zihataniye ibihembo bya Oscars bigiye gutangwa ku nshuro ya 95, rwatangajwe
n’abakinnyi ba filime Riz Ahmed na Allison Williams.
Filime iyoboye izindi mu guhatana mu byiciro byinshi ni
‘Everything Everywhere All at Once’ ihatanye mu byiciro 11, ikurikirwa na ‘All
Quiet on the Western Front’ na ‘The Banshees of Inisherin’ zose ziri guhatana
mu byiciro icyenda.
Hakurikiraho ‘Elvis’ iri mu byiciro umunani, ‘The Fabelmans’ ihatanye mu byiciro
birindwi, ‘Tár’ na ‘Top Gun: Maverick’
ziri mu byiciro bitandatu buri imwe
ndetse na ‘Black Panther: Wakanda Forever’ iri mu byiciro bitanu.
Indirimbo ya "Lift Me Up" yakoreshejwe
nka soundtrack ya ‘‘Black Panther:
Wakanda Forever’’ yaririmbwe na Rihanna, Tems wo muri Nigeria,
Ryan Coogler na Ludwig Goransson; ihatanye mu cyiciro cya ‘Best Original Song’.
Iyi yanditswe na Tems na Ryan Coogler.
Muri iki cyiciro bahatanye n’izindi ndirimbo
zakoreshejwe nka Sound Track mu zindi filime nka "Applause" yo muri ‘Tell It Like a Woman’. Iyi yaririmbwe inandikwa na Diane Warren. Hari
kandi "Hold My Hand"
yaherekeje filime yitwa ‘Top Gun:
Maverick’. Iyi yaririmbwe inandikwa na Lady Gaga na BloodPop.
Hari "Naatu Naatu" yaherekeje
‘RRR’ ikaririmbwa na M.M.
Keeravaani; mu gihe yanditswe na Chandrabose.
Ndetse na "This Is a Life" yaherekeje ‘Everything Everywhere All at Once’ iyoboye izindi mu
guhatana henshi. Iyi yaririmbwe na Ryan Lott, David Byrne na Mitski; mu gihe yanditswe na Ryan Lott na
David Byrne.
Filime yitwa ‘‘Saint Omer’’ ikinamo Umunyarwandakazi
yari yatoranyijwe ku rwego rw’igihugu mu Bufaransa ijya ku rutonde
rw’agateganyo; rwavuyemo urutonde ntakuka, ntabwo yabashije gutoranywa ngo
ihatanire ibi bihembo.
Mu cyiciro yagombaga gutoranywamo cya Best
International Film ikaba yaseruka ikajya muri Oscars, ntabwo yahiriwe.
Filime zatoranyijwemo harimo ‘‘All Quiet on the Western
Front’’ yo mu Budage, ‘‘Argentina,
1985’’ y’abanya-Argentine, ‘‘Close’’ y’Ababiligi, ‘‘EO’’ y’Abanya-Pologne
ndetse na ‘‘The Quiet Girl’’ yo muri
Ireland.
‘‘Saint Omer’’ yahabwaga amahirwe yo kujya muri Oscars 2023 ikinwamo n’umunyarwandakazi Kayise Kagame w’imyaka 36. Ubusanzwe ni
umukinnyi w’ikinamico, akaba umunyarwenya, umubyinnyi wa ‘Dance contemporaine’
n’ibindi.
Yavukiye i Genève mu Busuwisi ku babyeyi
b’abanyarwanda. Yize ibijyanye no gukina filime n’amakinamico muri Ecole
Nationale Supérieure des Arts et Technique du Théâtre de Lyon mu 2014, nyuma mu
2015 ajya kuba mu nyubako yagenewe abahanzi ya Watermill International Summer
Program iba i New York muri Amerika.
Iyi filime yagiye hanze ku wa 23 Ugushyingo 2022 mu
Bufaransa no muri Leta Zunze Ubumwe za America, ku wa 13 Mutarama 2023.
Kayije Kagame muri ‘Saint Omer’ ya Alice Diop imara
amasaha abiri n’iminota ibiri akina yitwa Rama. Aba ari umwanditsi w'ibitabo
utwite witabiriye urubanza rwa Laurence Coly, umugore wo muri Senegal ushinjwa
kwica umwana we w'amezi 15 akamusiga ku mucanga kugira ngo atwarwe n'umuraba.
Mu minsi ishize Kayije Kagame yashyizwe ku rutonde
rw’abakinnyi 10 ba filime bitwaye neza mu 2022 ku mugabane w’u Burayi, bityo
kubera impano zabo bakazahabwa amahirwe muri Porogaramu yiswe ‘European
Shooting Stars’ ikorerwa mu iserukiramuco rya filime ribera mu Mujyi wa Berlin
mu Budage.
Abajya muri iyi porogaramu batoranywa bigizwemo uruhare
na European Film Promotion (EFP), isanzwe ihuriyemo ibigo bitandukanye bikora
akazi ko kumenyekanisha ubuhanzi bwo muri sinema mu bihugu 37 byo mu Burayi.
Abatoranyijwe iyo bageze muri ‘Berlin International
Film Festival’ bahabwa umwanya uhagije wo guhura n’abantu b’ingeri zitandukanye
muri sinema, bafite icyo babafasha muri uyu mwuga.
Aba barimo aba-agents b’impano, abatunganya filime
bakomeye [producers], abayobozi ba filime n’abandi.
Uwabonye aya mahirwe aba ahawe rugari ngo yigaragaze,
ndetse bimufungurire amarembo amenyekane ku rwego mpuzamahanga no ku isi yose
muri rusange.
Abantu bahiriwe no kunyura muri ‘European Shooting
Stars’, barimo Umwongerezakazi Michaela Coel uheruka kugaragara muri ‘Black
Panther: Wakanda Forever’ yitwa Aneka, Umutaliyani Luca Marinelli, Umunya-Suède
Alica Vikander umaze kubaka izina mu buryo bukomeye n’abandi benshi.
‘Berlin International Film Festival’ izaberamo iki
gikorwa, uyu mwaka izaba muri Gashyantare 2023. Izatangira guhera ku wa 16
kugeza ku wa 26 uko kwezi.
Aba yagiye muri uru rubanza kugira ngo azabone uko
abara inkuru ya nyayo y’ibyabaye.
Iyi filime ishingiye ku nkuru nyayo y’urubanza
rwabereye mu Bufaransa mu 2016 rwa Fabienne Kabou, wahamwe n'icyaha nk’iki.
Alice Diop wayoboye akanagira uruhare mu kwandika iyi film, yari yitabiriye uru
rubanza rwa Kabou.
Kayije mu mwaka ushize mu Bufaransa yahawe igihembo
gitangwa na Académie des Arts et Techniques du Cinéma, kizwi nka Césars. Iki
yagihawe nk’umukinnyi utanga icyizere mu mwaka wa 2023.
Iyi filime iheruka kwegukana igihembo yahawe n’akanama
nkemurampaka cyatanzwe muri Palm Springs International Film Festival (PSIFF).
Iri serukiramuco riri mu yakomeye muri Amerika ryabaga ku nshuro ya 34.
Muri Cannes Film Festival ibera mu Bufaransa umwaka
ushize yari iri muri filime
z’icyubahiro, ndetse muri Venice International Film Festival uwo mwaka nabwo
ihabwa igihembo nyamukuru n’akanama nkemurampaka.
Yerekanwa muri Amerika mu bitangazamakuru bikomeye muri
iki gihugu wabonaga biyiha amahirwe yo kuba yahatana ndetse byayisamiye hejuru
bimwe biha ibiganiro Alice Diop wayikoze.
Ibinyamakuru byayanditseho bigaragaza ko ari filime
nziza ikwiriye guhatana muri Oscars
harimo nka TheWrap, The New York Times, Variety, Rolling Stone, Deadline
Hollywood, Vogue, The New Yorker n’ibindi.
Ibirori byo gutanga ibihembo bya Oscars bizaba tariki 12 Werurwe. Bizayoborwa na Jimmy Kimmel wanabiyoboye mu 2017 na 2018. Bizatambuka kuri ABC.
REBA AGCE GATO K'IYI FILIME YAHABWAGA AMAHIRWE
''REBA EVERYTHING EVERYWHERE ALL AT ONCE'' IHATANYE MU BYICIRO 11 MURI OSCARS 2023
TANGA IGITECYEREZO