Gatete Fidele ukina umupira w'amaguru w'abafite ubumuga, yatangiye gukora amateka muri Turkey

Gatete Fidele usanzwe ari na Kapiteni w'ikipe y'igihugu ya Amputee Football na Patrick Imanirutabyose, bari gukina icyiciro cya mbere muri shampiyona ya Turkey y'umupira w'amaguru mu bafite ubumuga aho bakinira ikipe ya Pendik Belediyesi. 

Mu mukino waraye uhuje Pendik na ODTU aho Pendik yatsinzwe ibitego 2-1, igitego rukumbi cya Pendik cyatsinzwe na Gatete Fidele. Cyari igitego cya kabiri nyuma y'igitego n'ubundi yari yatsinze bakina na Alves Cabro Ampute banganya igitego 1-1, akaba ariwe wari watsinze icyo gitego.

Gatete wa gatatu mu basutamye, niwe kapiteni w'ikipe y'igihugu ndetse akaba azwiho umuvuduko wo hejuru mu gihe afite umupira

Ni umwaka wa mbere aba basore bombi bari gukina nk'abakinnyi mpuzamahanga, ndetse bakaba barageze muri Turkey mu Ukwakira umwaka ushize. Aba basore bombi bageze muri Turkey batinda kubona ibyangombwa, byatumye shampiyona itangira batari gukina kuko imikino 5 ibanza ya shampiyona batayikinnye. Tariki 1 Mutarama 2023, nibwo aba basore bombi batangiye gukina shampiyona, kuri ubu bakaba bamaze gukina imikino 4.

Gatete Fidele umaze gutsinda ibitego 2, aganira na Inyarwanda.com yavuze ko shampiyona ya Turkey ikomeye cyane bigendanye n'uburyo bakinamo. Yagize ati" Shampiyona ya hano irakomeye cyane birenze uko twe twakinaga mu Rwanda. Hano bakina umukino w'i Burayi kandi ikindi ikipe z’inaha zidafite umwirabura ntabwo ziba zikomeye. 

Shampiyona ya hano ikomejwe n’abakinnyi bo muri Afurika, kuko nibo bakomeye kandi bafite imbaraga. Ku ruhande rwacu shampiyona iracyatugoye kuko ntituramenyera imikinire y’inaha n'ururimi rwaho, kandi ni twebwe banyafurika bahamaze igihe gito cyane abandi usanga bamaze imyaka 4 kuzamura, urumva ko bamaze gufatisha naho twebwe n’ikipe yacu ntabwo turamenyerana neza kuko nitwe kipe ikinisha abirabura bake kandi inaha batinya abirabura mu kibuga."

Aha Gatete na Patrick bari bakigera muri Turkey batangiye imyitozo ndetse n'ubuzima bushya mu ikipe ya Pendik 

Gatete yakomeje avuga ko bakigerayo babahinduriye imyanya. "Tukihagera imyanya twakinagaho mu Rwanda barayihinduye, ubu njyewe nakinaga hagati none nsigaye nkina ku ruhande rw'ibumoso nataka nkanasubira inyuma, naho Patrick yari myugariro none ubu akina hagati ariko ikipe yacu niwe turi kugenderaho mu kibuga hagati."

Gatete Fidele na Patrick Imanirutabyose bari mu bakinnyi bahesheje u Rwanda igikombe cya CECAFA y'ibihugu cyabereye muri Tanzania mu 2019, ari naho ikipe bakinira ya Pendik yatangiye kubarambagiriza. 

Patrick Imanirutabyose ukinana na Gatete Fidele, bose ubu ni abakinnyi mpuzamahanga b'ikipe y'igihugu 

Gatete Fidele yavuye mu Rwanda ari umukinnyi w'ikitegererezo ndetse ufite inzozi zo kugera kure 

Mbere yo kuva mu Rwanda Gatete Fidele yari yahuye n'umukinnyi akaba umunyabigwi w'ikipe y'igihugu Amavubi Gatete Jimmy. Gatete Fidele avuga ko iyo bitaba Jimmy Gatete, atari gukina no gukunda umupira w'amaguru ku rwego ariho kuri ubu 

Patrick na Fidele mu ikipe yabo nshya biteguye kuzafasha runini 

Pendik ikinamo Gatete na Patrick, iri ku mwanya wa 7 mu gihe habura imikino 5 bakajya mu karuhuko bitegura imikino yo kwishyura.