RFL
Kigali

Volleyball: REG VC yateruye shampiyona, Gisagara VC iyikurura ibitugu

Yanditswe na: ISHIMWE Olivier Ba
Taliki:23/01/2023 8:12
0


REG VC yegukanye igikombe cya shampiyona y'umwaka w'imikino 2022-23, n'ubwo umukino usoza yatsinzwe na Gisagara VC amaseti 3-1.



Mu rugendo rwenda kugera ku mezi ane amakipe azenguruka ibice bitandukanye by'u Rwanda, ku mugoroba wo kuri iki Cyumweru tariki 22 Mutarama, ni bwo shampiyona y'icyiciro cya mbere mu mukino wa Volleyball mu Rwanda yashyizweho akadomo amakipe amwe ataha yimyiza andi nayo yishimira uko yitwaye mu mwaka w'imikino. Muri iyi shampiyona mu bagabo n'abagore hakinwe uduce 8 twa bereye i Gisagara, Kirehe, Ngoma, Ruhango na Kigali yakiriye uduce turenze kamwe.

REG VC na Gisagara VC zagaragaje ihangana ryo hejuru uyu mwaka

Amakipe yose yegukanye shampiyona, ntabwo agace ka nyuma kabahiriye kuko nta n'imwe yabashije kukegukana. Mu bagore, ikipe ya APR VC niyo yegukanye shampiyona n'ubwo mu gace ka nyuma yatsindiwe muri 1/2 na RRA amaseti 3-2.

RRA yahise igera ku mukino wa nyuma bwa mbere mu duce twose yari imaze gukina, gusa ntabwo byayihiriye kuko yaje gutsindwa na Forefront VC amaseti 3-1. Mu duce 8 twakinwe APR WVC yegukanye uduce 7, mu gihe agace kamwe kandi ka nyuma kegukanwe na Forefront WVC.

APR WVC yegukanye igikombe cya shampiyona itsinzwe umukino umwe

Mu bagabo, agace ka nyuma kagiye gutangira REG VC na Gisagara VC sigifite amahirwe yo kwegukana shampiyona. REG VC niyo yari iyoboye n'amanota 50, mu gihe Gisagara VC yari iya kabiri n'amanota 49. Kugira ngo nibura Gisagara VC yegukane shampiyona, byasabaga ko REG VC itagera ku mukino wa nyuma, gusa ntabwo byaje gukunda kuko REG yageze ku mukino wa nyuma bikiri mu gitondo itsinze APR amaseti 3-1. 

Gisagara VC nayo yahise imanuka mu kibuga ikubita IPRC Ngoma amaseti 3-0, ihita gera ku mukino wa nyuma. Hano icyari gisigaye kwari ukurwanira ishema kwa Gisagara VC kuko igikombe yari yamaze kugitakaza.

REG yegukanye shampiyona nyuma yo gutsinda APR VC mu mikino ya 1/2

Mu mukino utatinze, Gisagara yaje gutsinda REG VC amaseti 3-1, ihita inganya amanota 57 na REG VC, ariko REG yegukana shampiyona kuko yatwaye uduce twinshi kandi ari ko itegeko rivuga mu gihe amakipe yanganyije amanota. Ikipe ya mbere muri buri cyiciro yahembwe miliyoni 2 Frw, ikipe ya kabiri ihabwa miliyoni n'igice Frw, ikipe ya gatatu ihabwa miliyoni imwe y'amanyarwanda.

Nyirimana Fidele utoza Gisagara VC yashimiye REG VC uburyo yitwaye muri uyu mwaka. Yagize ati: "Ndashimira cyane abateguye iyi shampiyona kuko yagenze neza, ndashimira kandi REG VC itwaye shampiyona n'umutoza wayo kuko yashyize ikipe hamwe. 

Ndashimira Gisagara VC kuko ni ikipe y'ibikombe n'ubwo uyu mwaka bitagenze neza. Nta kipe idasitara kuko n'i Burayi bibaho twitwaye neza muri Afurika, ariko kubigenzura biratugora. Twatakaje abakinnyi benshi kandi muri shampiyona hagati, biri mu byatumye shampiyona itugora.”

Kwizera Pierre Marshal wegukanye shampiyona, yatangaje ko ari iby'agaciro ku gikombe cye cya mbere cya shampiyona. "Njyewe ku bwanjye ntabwo ndabyakira, n'ubu ngubu ntabwo ndabyakira kuko ntabwo biba ari ibintu byoroshye, guhatanira igikombe cya shampiyona uri umutoza, ni inshuro ya kabiri, bwa mbere nabaye uwa kane ubu ngubu mbaye uwa mbere, urumva ko ni ibintu ntahita niyumvisha kano kanya ariko bitewe n'ubushobozi mfite, ni ibyishimo."

Umutoza Kwizera Pierre yegukanye igikombe cya mbere cya shimpiyona nyuma yaho yatoje Gisagara VC mu 2019-20 ntibyamuhira kuko yabaye uwa 4 muri shampiyona


REG VC yegukanye shampiyona igaragaje guhangana nyuma yo gutwara uduce 4 mu duce 8 twakiniwe

Gisagara VC yaje ku mukino wa nyuma yarakaye cyane ndetse yashakaga gutsinda REG ubundi bagatwara igikombe banganya amanota






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND