Guinée Eq: Umuhungu wa Perezida akurikiranyweho kurigisa indege ya Leta

Iyi nkuru yagarutsweho n'ibinyamakuru bitandukanye byo muri Africa n'i Burayi ivuga ko Bwana Ruslan Nsue akurikiranyweho kurigisa ku giti cye indege ya Kompanyi ya Leta yaburiwe irengero muri 2018.

Indege yaburiwe irengero ni iyo mu bwoko bwa ATR 72-500 ya Kompanyi ya Leta yitwa Ceiba Intercontinental, aho iperereza ry'ibanze rivuga ko muri 2018 iyo ndege yajyanywe mu kazi k'ubwikorezi i Las Palmas muri Espagne, birangira igurishirijweyo.

Bikekwa ko iyo ndege yagurishijwe ikigo cya Binter Technic cyo muri Espagne, ku bushake bwa Ruslan Obiang wari umuyobozi mukuru w’ihuriro ry'ibigo bitanga serivisi ku bibuga by’indege bya Guinée Equatorial.

Ruslan Nsue ari guhatwa ibibazo

Teodoro Nguema Obiang Mangue, umuvandimwe wa Ruslan Obiang ndetse  akaba na Visi Perezida wa Guinée Equatorial yemeje ko ubwe ari we watangije iperereza kuri murumuna we, akanasabwa ko atabwa muri yombi agakurikiranwa.

Teodoro Obiang Manque na Ruslan Obiang Nsue ni abahungu ba Teodoro Obiang Nguema Mbasogo umaze imyaka 43 ari Perezida wa Guinée Equatorial, binamugira Perezida umaze igihe ku ntebe y'ubutegetsi kurisha abandi bose bariho ku isi.

Visi Perezida Obiang Mangue yatangaje ko yasabye se Nguema Mbasogo guhagarika Ruslan Nsue ku mirimo yose ya Leta mu gihe ari gukorwaho iperereza ku byerekeye indege bikekwako yagurishijwe mu buryo bw'uburiganya. Manque kandi yavuze ko adashyigikiye na gato amakosa ya murumuna we.

Obiang Manque akurikiranyw murumuna we

Teo Nguema Mbassogo amaze imyaka 43 ari Perezida wa Guinée Equatorial