Umutoza wa Espagne yirukanywe nyuma yo gusezererwa mu gikombe cy'isi

Ishyirahamwe ry'umupira w'amaguru muri Espagne (RFEF) ryemeje ko ryamaze kwirirukana uwari umutoza w'ikipe y'igihugu ya Espagne, Luis Enrique bitewe n’uko batishimiye aho ikipe y'igihugu yabo yagarukiye mu mikino y'ibikombe cy'isi cy'uyu mwaka kiri kubera muri Qatar. 

Ikipe y'igihugu ya Espagne yasezerewe na Morocco, mu mikino ya 1/8 hitabajwe Penariti. Abakinnyi 3 bose ba Espagne bateye penariti nta n’umwe wayinjije, naho muri 4 bateye iza Morocco ba 3 bose barazinjije bihita bituma bakomeza 1/4 aho bazahura na Portugal kuwa 6.

Luis Enrique wirukanywe ataramara n'amasaha 24 ageze muri Espagne avuye muri Qatar

Luis Enrique yatangiye gutoza Espagne muri 2018 akomerezaho mu gikombe cy'isi cyabereye mu Burusiya ntiyitwara neza, ariko muri 2020 yageze muri 1/2 kirangiza mu gikombe cya Euro. 

Abayobozi n'ishyirahamwe ry'umupira w'amaguru muri Espagne barimo Luis Rubiales na José Francisco Molina bashimiye Luis Enrique kubyiza bicye yari amaze kugeza ku ikipe yabo, harimo kuba yaramaze kubaka ikipe ishingiye ku bakinnyi bakiri bato,  ndetse bamubwiye ko impamvu bamwirukanye ari uko bakeneye kubaka ibintu bishya mu ikipe y'igihugu yabo.