Ahabanza Imikino

AMAFOTO - Ubwo Rayon Sports yatsindaga Gorilla FC mu mukino wikanzwemo amarozi bigateza imvururu

Yanditswe na: Ngabo Mihigo Frank
Taliki:8/12/2022 7:49 0

Rayon Sports yaraye itsindiye Gorilla FC kuri Stade ya Kigali iri i Nyamirambo, mu mukino w'ikirarane cy'umunsi wa 7 wa Shampiyona, waranzwe no kwikanga amarozi buri mwanya ndetse bigateza amahane hagati y'abakinnyi n'abatoza.

Igitego rukumbi cya Rayon Sports cyabonetse muri uyu mukino, cyinjiye ku munota wa 27, cyinjijwe na rutahizamu Will Essomba Onana kuri Penaliti yateye ahana ikosa ryari rikorewe Boubacar Traore mu rubuga rw'amahina.

Amakuru avuga ko Mbere gato y'uko umukino utangira, Gatera Musa utoza Gorilla FC yegereye urwambariro rwa Rayon Sports ariko abashinzwe kurucungira umutekano baramuzitira, nyuma abo ku mpande zombi bagafatana mu mashati kubwo gucyeka amarozi.

Gatera Musa Hagati y'abatoza bamwungirije

Amakipe yombi yatangiye akina biryoheye ijisho, ndetse mu minota yose y'umukino waranzwe no gusatirana ku mpande zombi.

Ubwo Rayon Sports yabonaga Penaliti, rutahizamu Willy Onana yanze gutera umupira yari ahawe n'umusifuzi uturutse ku bakinnyi ba Gorilla FC, ajya kwizanira uwari hanze y'ikibuga, binatuma ahabwa ikarita y'umuhondo, nabwo bigaragara ko hari habayeho kwikanga amarozi.

Onana ajya gutera penaliti

Umukino urangiye, Haringingo Francis utoza Rayon Sports yabajijwe n'abanyamakuru niba we n'abakinnyi be bikanze ibyo kurogwa ndetse niba ko urwambariro rwabereyemo imirwano, byose ntitabisubizaho, avuga gusa ko amenya ibyo mu rwambariro rw'ikipe ye.

Ku ruhande rwa Gorilla FC, umutoza Gatera Musa yasoje umukino ntiyaza kuvugana n'abanyamakuru, ahubwo hitaba Kalisa wungirije, na we abajijwe iby'imirwano yabaye, asubiza ati "Ibyo ntabyo nzi pee." Avuga ku mpamvu umutoza mukuru ataje kuganira n'itagazamakuru, Kalisa yasubije ati "Arwaye umutwe".