Abakunzi b'umuziki n'imyambaro byo hambere bashimishijwe bikomeye na 'Oldies Music Festival' AMAFOTO

Ku wa Gatandatu tariki ya 3 Ukuboza, kuri Canal Olympia, Rebero, habereye igitaramo cyo kongera kwibuka no kwishimira umuziki, ibikoresho bya muzika n'imyambaro byo hambere, cyiswe 'Oldies Music Festival'.

Iki gitaramo cyateguwe na Impano Creature kitabiriwe n'ibyamamare bitandukanye birimo umunyarwenya Clapton Kibonge, Miss Rwanda wa 2021, Ingabire Grace, umuraperi,Bull Dogg. 

Ndetse hari n'abanyamakuru batandukanye barimo Murenzi Emmalito n'abandi  bantu baserutse mu myambaro yo muri za 80 na 90.

DJ Emery na Dj Mike nibo bafunguye igitaramo maze bashimisha abantu basaga nkaho bakiri kuza, babacurangira indirimbo zakunzwe muri za 80.

Ku isaha ya saa yine aba ba DJ basimbuwe na DJ Kadir wacuranze indirimbo zo muri za 90, ari nako umushyushyarugamba, Lion Manzi, abafasha kurushaho kuryoherwa.

Uko amasaha yisunikaga niko umubare w'abantu wiyongeraga, ari nako barushaho kugaragaza ko bishimye kandi baryohewe n'umuziki wa kera, akarusho n'uko nta nzara n'inyota byaharanzwe kuko hari icyo kunywa kiri kugurishwa ndetse na mucoma. 

Saa sita nibwo Dj RY yatangiye gucuranga, akurikirwa na DJ Karim bacuranga indirimbo za hagati ya 2000 na 2010, uyu mwanya wishimiwe cyane n'abitabiriye iki gitaramo, dore ko babyinaga baziririmba ijambo ku rindi nk'izasohotse ejo.

Muri iki gitaramo hahembwe abantu bahize abandi mu myambaro myiza aribo umunyarwenya Clapton Kibonke wahembwe mu mwambaro mwiza ujyanye no mu myaka ya za 80, hahembwa n'umuhanzi w'injyana gakondo, Cyusa wahize abandi mu mwambaro mwiza wa za 90.

DJ Bissosso niwe wafunze igitaramo 'Oldies Music Festival', cyasojwe ku isaha ya saa saba n'igice z'ijoro, ubwo abantu bagendaga baseta ibirenge batifuza gutaha. 

Umunyarwenya Clapton Kibonge yahawe igihembo cy'umuntu wambaye neza byo mu myaka ya za 80

Umuhanzi w'injyana gakondo, Cyusa Ibrahim yahawe igihembo cy'umuntu wambaye neza byo mu myaka ya za 90

Abanyamakuru batandukanye bitabiriye 'Oldies music festival'

Umuraperi Bull Dog nawe yari yabukereye

Dj Emery yasusurukije abitabiriye igitaramo mu ndirimbo zo mu myaka ya za 80

DJ RY asusurutsa abitabiriye mu ndirimbo zo mu myaka ya za 90

Dj Kadir yavanze imiziki biratinda

Dj Karim washimishije bikomeye abitabiriye iki gitaramo