RFL
Kigali

Umutoza wa mbere yamaze kuzinga utwangushye kubera umusaruro wo mu gikombe cy'Isi

Yanditswe na: ISHIMWE Olivier Ba
Taliki:2/12/2022 10:05
0


Roberto Martinez watozaga u Bubiligi yamaze gusezera ku kazi, nyuma y’aho iki gihugu kinaniwe kurenga imikino y'amatsinda.



Roberto Martinez w'imyaka 49 yari yagizwe umutoza mukuru w'u Bubiligi mu 2016, akaba yari amaze imyaka isaga itandatu ari kumwe n'iyi kipe. 

Roberto Martinez abaye umutoza wa mbere utandukanye n'ikipe y'igihugu bitewe n'imikino y'igikombe cy'Isi kiri kubera muri Qatar 

U Bubiligi bwari bwabaye ubwa gatatu mu mikino y'igikombe cy'Isi iheruka, bwaje kuri iyi nshuro buri ku mwanya wa 2 ku rutonde ngarukakwezi rwa FIFA. 

Ku mugoroba wo kuri uyu wa Kane nibwo u Bubiligi bwakinnye umukino wa nyuma wo mu matsinda, aho basabwaga gutsinda Croatia ariko ntibyabahiriye kuko baje kunganya ubusa ku busa, bituma Maroc na Croatia arizo zizamuka mu itsinda.

"Uyu ni umukino wanjye wa nyuma birababaje nk’uko na we ubyumva." Roberto Martinez w'imyaka 49 aganira n'itangazamakuru nyuma y'umukino. 

“Uyu mwanzuro nawufashe mbere y'uko igikombe cy'Isi gitangira, nagerageje gukora imishinga yaguye muri iyi kipe y'igihugu, ariko igihe ni iki ngo dufate ikindi cyerekezo. 

Kuva mu 2018 nagiye ngira impamvu nyinshi zatuma ntandukana n'iyi kipe nkajya gutoza ikipe isanzwe, ariko narabyanze kuko nashakaga kubanza gusoza amasezerano yanjye kandi ndabona bigenze neza." 

Roberto Martinez yari amaze imyaka 6 ari kumwe n'ikipe y'igihugu y'u Bubiligi yafatwaga nk'ikipe ya zahabu u Bubiligi bwagize, gusa ikiragano cyayo kikaba kirangiye nta gikombe yegukanye

Roberto Martinez yagizwe umutoza w'u Bubiligi mu 2016 hashize amezi 6 yirukanwe na Everton, akaba yarageze muri Everton mu 2013 amaze kwegukana igikombe cya FA Cup ari kumwe na Wigan. 

Roberto Martinez biteganyijwe ko asubira gutoza amakipe asanzwe.






TANGA IGITECYEREZO

Izina ryawe
Email yawe
Andika igitecyerezo


Safari

Inyarwanda BACKGROUND