Uwahoze ari Perezida w'u Bushinwa Jiang Zemin yitabye Imana

Kuri uyu wa Gatatu, ibitangazamakuru bya Leta y'u Bushinwa byatangaje ko uwahoze ari Perezida w'u Bushinwa, Jiang Zemin yitabye Imana, mu makuru dukesha BBC. 

Uwahoze ari Perezida, Zemin ari mu bantu bakomeye mu mateka y’iki gihugu, ndetse akaba n'umwe mu batumye kigira iterambere ryihuse.

Urupfu rwe rubaye mu gihe Ubushinwa buri guhangana n'imyigaragambyo ikomeye cyane y'aba Tianan, aho benshi banenga amabwiriza yo kurwanya Covid.

Uwahoze ari Perezida w'u Bushinwa Jiang Zemin yitabye Imana ku myaka 96

Jiang yagiye ku butegetsi nyuma y’igitero cyamennye amaraso cyo mu 1989, cyibasiye abigaragambyaga mu gace ka Tianan ndetse no hafi yayo muri Beijing, ibi biza gutuma Ubushinwa buhabwa akato ku rwego mpuzamahanga.

Iyi myigaragambyo yateje urugamba rukomeye ku butegetsi hejuru y’ishyaka rya gikomunisiti ry’Ubushinwa, hagati y’abatavuga rumwe n’ubutegetsi n’abashakaga kuvugurura ubutegetsi.

Byatumye Zemin wari usanzwe agaragara nk'umwe mu bakomeye mu buyobozi azamurwa mu ntera atorerwa kuba perezida, bizeye ko azahuza abakomeye na rubanda rusanzwe.

Ku butegetsi bwe habayeho izamuka ry'ubukungu, ishyaka rya gikomunisite rirayobora, bituma u Bushinwa bufata umwanya wa mbere mu bihugu bikomeye ku Isi.

Zemin yayoboye ihererekanyabubasha ry’amahoro rya Hong Kong mu 1997, maze u Bushinwa bwinjira mu muryango w’ubucuruzi ku Isi muri 2001, buhuza ubukungu bw’igihugu n’umuryango mpuzamahanga.

Gusa Perezida Zemin yanenzwe igitero gikomeye cyo guhashya agatsiko k'idini rya Falun Gong mu 1999, byagaragaraga ko ritavuga rumwe n'ishyaka rya gikomunisiti.