RFL
Kigali

Raphael Osaluwe ukinira Rayon Sports yamaze kubagwa

Yanditswe na: ISHIMWE Olivier Ba
Taliki:29/11/2022 15:29
0


Raphael Olise Osaluwe ukina mu kibuga hagati mu Ikipe ya Rayon Sports azamara ukwezi hanze nyuma yo kubagwa imvune yo mu ivi yari amaranye igihe.



Kuri uyu wa Gatandatu ni bwo Rayon Sports yafashe umwanzuro w'uko umukinnyi wayo Rafael Osaluwe Olise abagwa imvune yo mu ivi yari amaranye igihe akiniraho, gusa bikaba byari bimaze kwanga.

Tariki 23 Ukwakira ni bwo Raphael Osaluwe Olise yagize ikibazo cy'imvune ivi rye bongera kuritoneka, byatumye ava mu mukino atarangiye, bikaba byari ku munsi wa 6 wa shampiyona. 

Kuva ubwo ntabwo uyu mukinnyi ukomoka muri Nigeria yongeye kugaruka mu kibuga byanatumye Rayon Sports itangira kugorwa no mu kibuga hagati. 

Raphael Osaluwe yageze muri Rayon Sports ategerejwe na benshi ndetse imikino ye ya mbere igenda neza

Nyuma yaho iyi mvune ibyukiye, Raphael Osaluwe Olise yasabye Rayon Sports ko bamufasha gukira burundu akabagwa, kuko n'ubundi imvune yari ayimaranye igihe kuva ari muri Bugesera FC kandi yakiraga, yakina imikino 3 akongera akavunika.

Ntabwo Rayon Sports yabyakiriye neza kuko yabonaga amafaranga yo kuvuza iyi mvune ari menshi bagasaba ko Raphael Osaluwe ariwe wabyikorera.

Muganga yari yabwiye Rayon ko kugira ngo uyu mukinnyi abagwe akire neza byari kubatwara miliyoni 1 n'ibihumbi 500 y'amanyarwanda.

Impande zombi zagumye gusigana Rayon Sports iterera agati mu ryinyo kugera aho Raphael Osaluwe mu ntangiriro z'icyumweru gishize asubiriye ku bitaro nabwo muganga amubwira ko nta bundi buryo buhari usibye kubagwa.

Raphael Osaluwe Olise ubu yatangiye urugendo rwo gukira 

Rayon Sports yaje kuva ku izima ikora igisabwa cyose ngo uyu mukinnyi avurwe, aribwo ku wa Gatanu w'icyumweru dusoje yajyanwe mu bitaro bya DBC Kicukiro ari naho yabagiwe, ubu akaba yaratangiye urugendo rwo gukira.

Biteganyijwe ko Raphael Osaluwe azagaruka mu kibuga nyuma y'ukwezi, nta gihindutse akazatangirana n'ikipe mu mikino yo kwishyura. 

Raphael Osaluwe Olise yageze muri Rayon Sports avuye muri Bugesera FC ikipe yakiniye bwa mbere ageze mu Rwanda anayigiriramo ibihe byiza






TANGA IGITECYEREZO

Izina ryawe
Email yawe
Andika igitecyerezo


Safari

Inyarwanda BACKGROUND