Minisitiri w’Uburezi Dr Uwamariya Valentine yasabye abarimu gukomeza kuba abarezi beza

Mu butumwa yanyujije ku rukuta rwe rwa Twitter, Minisitiri w’uburezi, Dr. Uwamariya Velentine, yagaragaje ko abarimu bakora akazi katoroshye ko kurerera igihugu no kwigisha abana bacyo umuco n’indangagaiciro zikwiriye Abanyarwanda, kuva bageze mu mashuri y’incuke kugeza barangije kwiga bagiye mu mirimo no mu bundi buzima busanzwe.

Yasabye abarimu bose gukomeza kuba umusemburo w’impinduka ziganisha ku burezi bufite ireme nk’umusanzu mu kuzamura uburezi u Rwanda rwifuza.

Mu magambo ye yanditse ati:” Umunsi mwiza Mpuzamahanga ku barimu mwese. Dushima akazi keza mukora mu kuzamura abana bato mu bumenyi n’imyumvire. Mureke dufatanye kuba umusemburo w’impinduka ziganisha ku kuzamura ireme ry’uburezi nk’umusanzu mu kubaka u Rwanda twifuza. Happy International Teachers Day” #WDTD2022.

Abarimu ni bamwe mu bagira akamaro gakomeye cyane binyuze mu murimo bakora wo kurera. Ibi ni byo byatumye barebwaho maze bashyirirwaho umunsi wabo mpuzamahanga wo kwishimira ibyo bagezeho.