Umutoza Pitso Mosimane yerekeje mu cyiciro cya kabiri muri Saudi Arabia

Nyuma yo gutandukana n'ikipe ya Al Ahly yari amaze guhesha ibikombe 2 bya CAF Champions League, Pitso Mosimane yakomeje kuvuga mu makipe atandukanye yo mu Barabu ndetse n'ahandi ku Isi, ariko bikarangira nta n'imwe asinyiye.

Kuri iki cyumweru nibwo ikipe ya Al-Ahli Saudi FC yatangaje ko uyu mugabo ukomoka muri Afurika Y'Epfo, yagizwe umutoza mushya w'ikipe ya mbere. Inshingano za mbere uyu mutoza yahawe, harimo kugarura ikipe mu cyiciro cya mbere, nyuma y’aho imanutse mu cyiciro cya kabiri mu mwaka w'imikino 2021-2022.

Al-Ahli Saudi FC yahaye ikaze ndetse inatangaza ku mugaragaro ko Pitso Mosemane ari umutoza mushya wayo 

Al-Ahli Saudi FC kuva yashingwa mu 1937 ni ubwa mbere yari imanutse mu cyiciro cya kabiri, byateye umujinya abafana bayo ndetse basaba ubuyobizi bw'ikipe ko bagomba kugarura ikipe vuba na bwangu.

Pitso Mosimane w'imyaka 58 afatwa nk'umutoza wa mbere muri Afurika Y'Epfo ndetse no muri Afurika muri rusange, nyuma y'amakipe yaciyemo arimo Mamelodi Sundowns na Al Ahly kandi zose akazihesha ibikombe bya CAF Champions League.

Pitso yabaye umutoza wa mbere muri Afurika utwaye ibikombe 2 bya CAF Champions League mu makipe abiri atandukanye, ndetse aba umutoza wa CAF mu 2016, akaba yari amaze imyaka 2 muri Al Ahly yagezemo mu 2020.

Pitso yaro yagiriye ibihe byiza mu ikipe ya Al Ahly yo mu Misiri