BePawa
Kigali

Amikoro yicaje hasi Amavubi U17 yendaga kujya muri Ethiopia

Yanditswe na: ISHIMWE Olivier Ba
Taliki:23/09/2022 17:05
0


Ikipe y'igihugu Amavubi y'abatarengeje imyaka 17 ntabwo izitabira imikino ya CECAFA, bikaba bibaye inshuro ya kabiri iyi kipe ibuzwa kugira aho ijya.



Iyi kipe isa nk'aho itakibaho. Kuva mu 2020, nta mukino n'umwe irakina ndetse nta n'umwe uzi icyerekezo cyayo.

Tariki 30 Nzeri muri Ethiopia hazatangira imikino y'igikombe cya CECAFA imikino iba ngarukamwaka aho ibihugu byo muri aka karere bihurira hamwe bigakina bihatanira kwegukana igikombe.

Hari hasigaye icyumweru kimwe gusa kugira ngo iyi mikino itangire, ariko ku ruhande rw'u Rwanda iyi kipe y'igihugu yari itarahamagarwa ndetse nta n'umutoza yari ifite.

Amavubi U17 aheruka kwitabira imikino iyo ariyo yose mu 2020 ubwo u Rwanda rwakiraga iyi rukaza gusezererwa rutarenze umutaru.

Amakuru agera ku InyaRwanda avuga ko Minisiteri ya siporo mu Rwanda yabwiye ishyirahamwe ry'umupira w'amaguru mu Rwanda, FERWAFA, ko nta mikoro ahari yo gufasha iyi kipe.

Mu kiganiro umuyobozi wa FERWAFA Nizeyimana Olivier aherutse kugirana n'itangazamakuru yavuze ko biteguye ko ikipe y'igihugu y'abatarengeje imyaka 17 izitabira imikino ya CECAFA ariko bazabanza kubaza Minisiteri kuko ari yo ibaha ubushobozi. 

Muri iyi mikino u Rwanda rwari mu itsinda rya kabiri ruri kumwe na Uganda, Djibouti, Sudan, n'u Burundi.

Abakinnyi bari bitezwe ko bazahamagarwa mu batarengeje imyaka 17 harimo umubare munini w'ikipe y'igihugu y'abakinnyi batarengeje imyaka 16 baherutse kubura Visa yo kujya hanze kandi bari bamaze iminsi mu myitozo yo kujya i Burayi mu irushanwa rikomeye ku mugabane w’u Burayi rihuza abatarengeje iyo myaka.

Umutoza usanzwe atoza ikipe y'igihugu y'abatarengeje imyaka 17 ni Rwasamanzi Yves ubu urikumwe n'Amavubi y'abatarengeje imyaka 23 igomba gukina na Libya kuri uyu mugoroba mu mukino wo gushaka tike y'igikombe cy'Afurika kizabera muri Maroc umwaka utaha.






TANGA IGITECYEREZO

Izina ryawe
Email yawe
Andika igitecyerezo


Safari

Inyarwanda BACKGROUND