Impuzamashyirahamwe y'umupira w'amaguru ku mugabane w' u Burayi 'UEFA', yamaze gushyira ahagaragara abakinnyi batatu batoranirijwe kuzahatanira igihembo cy'umukinnyi witwaye neza kurusha abandi ku mugabane w'u Burayi, mu mwaka w'imikino wa 2021-2022.
Benzema
Karim Benzema uherutse gufata umwanya wa kabiri mu batsindiye Real Madrid ibitego byinshi (324) atambutse kuri Raul Gonzalez, ni umwe mu batoranijwe ndetse akaba uhabwa amahirwe menshi yo gutwara iki gihembo, nyuma yo gufasha ikipe ye gukusanya ibikombe birimo na UEFA Champions League.
Uyu mufaransa w'imyaka 34 yaryohewe n'umwaka w'imikino ushize ndetse yanatangiye neza uwa 2022-2023, aho yatsinze kimwe mu bitego bibiri byahesheje Real Madrid kwegukana igikombe kiruta ibindi 'UEFA Super Cup' itsinze Eintracht Frankfurt kuwa Gatatu w'iki cyumweru.
Ku rundi ruhande, hari umunyezamu Thibout Courtois wa Real Madrid na we wagize umwaka uryoshye w'imikino ndetse agatanga umutahe ukomeye ku gikombe cya UEFA Champions League, aho yafashije ikipe ye kwikura imbere y'amakipe akomeye nka Chelsea na Manchester City igatwara Igikombe gipima ibiro 11.
Thibout
Uwa gatatu mu bahataniye igihembo cy'umukinnyi w'umwaka i Burayi, ni Kevin De Bruyne ufatiye runini ikipe ya Manchester City ndetse akaba uwagize uruhare rukomeye kugira ngo igere ku mukino wa nyuma wa UEFA Champions League ya 2021-2022.
Uyu Mubiligi w'imyaka 31 kandi yafashije Man City gutwara igikombe cya Shampiyona y'u Bwongereza, igikuye imbere ya Liverpool yashakaga kucyisubiza.
UEFA yatangaje ko umukinnyi w'umwaka azatangazwa kuwa 26 Kanama 2022, ubwo hazaba hakorwa Tombola y'amatsinda ya UEFA Champions League 2022-2023. Igihembo giheruka, cyegukanywe na Jorginho Luiz Frelo wa Chelsea yari yatwaye UEFA Champions League ya 2020-2021.
TANGA IGITECYEREZO