BePawa
ATHF
Kigali

Martin Mugisha yashyize hanze indirimbo 'Umurwa w'Abera' aririmbamo ko azashima Imana bikomeye nahura na Eliya, Mose n'Ibizima 24 - VIDEO

Yanditswe na: Mupende Gedeon Ndayishimiye
Taliki:6/07/2022 10:14
0


Umuhanzi akaba na Producer, Mugisha Martin uzwi nka Martin Pro, yashyize hanze indirimbo nshya y'amashusho yise "Umurwa w'Abera" ije ikorera mu ngata "Shimwa" imaze ukwezi kumwe na "Birarangiye" yakunzwe cyane dore ko imaze kurebwa n'abarenga ibihumb 13 mu mezi 5 imaze kuri Youtube.



Muri iyi ndirimbo nshya "Umurwa w'Abera", Martin Pro aririmbamo ko azahimbaza Imana mu buryo bukomeye umunsi azaba yahuye na Mose, Eliya n'Ibizima 24. Ni indirimbo yatunganyijwe na Martin Pro mu buryo bw'amajwi, naho Karenzo Pro atunganya amashusho yayo. Martin Pro yashimiye byimazeyo Imana yamushoboje anashimira abagize uruhare mu ikorwa ry'iyi ndirimbo barimo: Claudine, Dina, Sandrine, Alice, Peace na Jean de la Paix.

"Mfite amatsiko yo kubona Abera inzovu ibihumbi bitabarika barimo gutambagira Umurwa w'Abera utatse ubwiza buhebuje, baririmba buzuye ubwuzu, batewe ishema n'isheja umucyo w'Imana umurika. Yesu uzampe gutura iwawe mu Ijuru kugira ngo n'Abamalayika bose bavuze impundu batewe ishema, banezerewe guserukana ishema n'isheja, ubwiza bw'Imana burabagirana, umucyo ubamurika". Ayo ni amwe mu magambo agize iyi ndirimbo nshya "Umurwa w'Abera".

Martin Pro ni umugabo wubatse utuye i Kinyinya mu Mujyi wa Kigali, akaba asengera mu itorero ryitwa Winners Chapter International Kigali. Yavukiye i Burundi mu muryango w'abakiristo w'abana batatu, akaba ari we bucura. Yatangiye kuririmba ubwo yari afite myaka 2 y'amavuko abitangirira mu ishuri ryo ku Cyumweru, atangira gucuranga piano afite imyaka 10. Yinjiye muri studio bwa mbere mu 2014 asohora indirimbo ye ya mbere.

Mu rugendo rw'umuziki, amaze gukora indirimbo nyinshi nk'umuhanzi ku giti cye aho amaze kugeza album 2. Album ye ya mbere yitwa 'Ikora uko yishakiye' ikaba iriho indirimbo 10. Azwi mu ndirimbo zirimo: 'Ikora uko yishakiye', 'Ikimenyetso', 'Nahageze', 'Nzakwigisha', 'Impamba'. Ni umwe mu bagize uruhare rukomeye mu ndirimbo yakoranye na Bishop Gafaranga n'abandi baramyi zirimo: "Mwabindimo", "Umuriro", "Igitambo" n'izindi. Amaze gushyira ibiganza ku ndirimbo z'abaramyi n'amakorali atandukanye hano mu Rwanda. 


Martin Pro akunzwe mu ndirimbo zinyuranye zirimo n'izo yakoranye na Bishop Gafaranga

REBA HANO INDIRIMBO NSHYA "UMURWA W'ABERA" YA MARTIN MUGISHA








TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND