RFL
Kigali

Mugisha Moise uheruka gutwara Tour du Cameroon yasimbujwe mu ikipe y' u Rwanda yitegura imikino ya Commonwealth

Yanditswe na: Ngabo Mihigo Frank
Taliki:5/07/2022 13:33
0


Mugisha Moise ukinira ProTouch ndetse n'ikipe y’Igihugu y' u Rwanda y'amagare yamaze gusimbuzwa Tuyizere Etienne, mu ikipe y'igihugu izitabira imikino ihuza ibihugu bikoresha ururimi rw'icyongereza (Commonwealth) iteganijwe mu mpera za Nyakanga n'intangiriro za Kanama 2022.



Mu Cyumweru gishize, Ishyirahamwe ry'umukino w'amagare mu Rwanda, FERWACY ryari ryatangaje urutonde rw'ibanze rw'abakinnyi bazahagararira igihugu muri iyi mikino izabera i Birmingham mu Bwongereza, uhereye ku ya 28 Nyakanga.

Abakinnyi bari batangajwe mbere mu cyiciro cy'abagabo ni Mugisha Samuel ukinira Protouch yo muri Afurika y’Epfo, Manizabayo Eric wa Benediction Ignite, Uhiriwe Renus wa NICE-OBOR, Muhoza Eric wa ANCA na Mugisha Moise wa ProTouch.

Ntibyabaye amahirwe kuri Mugisha Moise kuko yakoze impanuka mu cyumweru cyashize, ubwo yiteguraga Shampiyona y'igihugu yabaye mu mpera z'icyumweru giheruka, agasimbuzwa Tuyizere Etienne ukinira Benediction Club.

Tuyizere Etienne

Mu cyiciro cy’abagore, biteganijwe ko u Rwanda ruzahagararirwa na Tuyishimire Jacqueline, Ingabire Diane na Mukashema Josiane bose bakinira Benediction Club y'i Rubavu.

Guhera kuwa Gatanu w'icyumweru gishize, aba bakinnyi bashyizwe hamwe mu mwiherero muri Hotel ya La Palisse iri i Nyamata mu karere ka Bugesera, aho bakorera imyitozo bayobowe n'umutoza mukuru w'ikipe y'igihugu, Sempoma Felix.

Mugisha Moise utaragize amahirwe yo kujya mu ikipe y'igihugu, ni umwe mu bakinnyi bari bamaze igihe mu bihe byiza, aho yegukanye agace kasoje Tour du Rwanda muri Gashyantare 2022, akanegukana Tour du Cameroon 2022 yabaye muri Kamena.

Uyu musore w'imyaka 24 y'amavuko, ni umwe mu bakinnyi ngenderwaho mu ikipe y'igihugu, aho ari umwe mu bakinnyi bihuta ahatambika ndetse akaba umwe mu bahindura umuvuduko w'igikundi byiyongera ku kuba abasha gukora urugendo rw'ibilometero byinshi ari wenyine (Break Away Specialist).



Mugisha Moise






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND