BePawa
ATHF
Kigali

Yaciye agahigo katigeze undi mugore mu myaka 692 mu Bwongereza: Amateka ya Patricia Scotland umwiraburakazi umaze imyaka 6 ari Umunyamabanga Mukuru wa Commonwealth

Yanditswe na: Abitije Seraphin Elise
Taliki:22/06/2022 14:38
0


Umunyamabanga Mukuru wa Commonwealth, Patricia Scotland, ku myaka 66 ni umwe mu bagore bavuga rikijyana ku isi guhera mu myaka yo hambere muri 1977 akaba inararibonye mu Mategeko n’Ubutabera wakoreye u Bwongereza igihe kinini cyane.



Scotland yavukiye mu gihugu cya Dominica kiri mu birwa bya Carribean. Ni umwana wa 10 mu bana 12 bavukana ku babyeyi b'abakirisitu. Nyina umubyara ni umunya-Dominica naho Se ni uwo muri Antigua kimwe mu birwa bya Carribean.

Umuryango we wimukiye mu Majyaruguru y’u Burasirazuba bwa London ubwo yari afite imyaka, 2 ni naho yigiye amasomo ye abanza n'ayisumbuye mbere y'uko asoreza icyiciro cya Kabiri cya Kaminuza mu Mategeko muri London rwagati.

Yaje kwihugura mu Mategeko arebana n’imiryango hari 1977 ndetse ahita yerecyeza ku butaka bw’amavuko bwe bwa Dominica aho yakoreraga mu rugaga rw’abanyamategeko ba Guverinoma y’iki kirwa.

Mu mwaka wa 1991 yaciye agahigo ko kuba umwiraburakazi wa mbere winjiye mu banyamategeko b'ikirenga mu bwami bw’u Bwongereza. Yagiye azamurwa mu myanya kugeza ubwo yaje no kuyobora abandi banyamategeko.

Hagati y’umwaka wa 1999 na 2001 yabaye Umunyamabanga wa Leta mu Nteko Ishinga Amategeko mu biro by’Imibanire mpuzamahanga ndetse binarebana n’Umuryango w’Ibihugu bikoresha ururimi rw’Icyongereza.

Muri iki gihe yagaragaje umuhate ukomeye agenda azana amavugururwa adasanzwe arebana n’imibereho y’Abongereza batuye hirya no hino ku isi. Yanagize uruhare rukomeye mu gutanga ibisubizo ku bibazo byatewe n’ibitero bya Osama Bin Laden bo kuwa 11 Nzeri.

Mu mwaka wa 2001 yagizwe Umunyamabanga w’Inteko Ishinga Amategeko y’u Bwongereza umwanya yashizweho na Minisitiri w’Intebe Tony Blair. Muri icyo gihe yarushijeho kugenda akorana n’ibihugu binyuranye byo ku isi aho yanahawe umudali n’igihugu cya Poland kubera uruhare yagize mu mavugurura y’amategeko y’iki gihugu.

Mu mwaka wa 2003 Scotland yagizwe Minisitiri ushinzwe amavugururwa mu butabera n’amategeko umwanya yagumyeho kugera mu mwaka wa 2007 awuvaho akoze imirimo inyuranye irimo gushyiraho uburyo bwo kurwanya ihohoterwa rikorerwa mu ngo, utunama turengera abatangabuhamya, ashyiraho icyumweru cyahariwe ubutabera anagena gahunda yo gutanga ibihembo.

Kuwa 28 Kamena 2007 yagizwe Umushinjacyaha Mukuru na Minisitiri w’Intebe Gordon Brown ahita aca agahigo mu bagore aho ari we mugore wa mbere wabonye uyu mwanya kuva washyirwaho muri 1315, bivuze ko hari haciyeho imyaka 692.

Yakoze byinshi mu gihe cy'izi nshingano, akorana n’abakorerabushake mu butabera ashyiraho ibihembo biba bigenwe n’intwari muri bo zagiye zitangira ubutabera nta nyungu zikurikiye anashyiraho gahunda ihuza ubushinjacyaha n’urubyiruko. Mu Ugushyingo 2012 yagizwe ushinzwe inyungu z’ubucuruzi bw’Abongereza muri Africa y'Epfo. 

Mu mwaka wa 2015 ni bwo yamamajwe n’igihugu cye cy’amavuko cya Dominica mu bahataniye umwanya w’Umunyamabanga w’Umuryango w’Ibihugu bikoresha Icyongereza ku isi ahatanye na Ronald Sanders wo muri Antiguan na Mwamba wahoze ari Umunyamabanga wungirije w’ubabanyi n’amahanga wa Botswana. Yaje kubahiga aba umugore wa mbere ugiye kuri uyu mwanya n’uwa gatandatu uyoboye uyu muryango.

Nubwo hari abari batangiye guhwihwisa ko uyu mwanya Scotland atawukwiriye ubwo yatorwaga bwa mbere, nyuma yo kwerekana ubuhanga budasanzwe muri manda ya mbere, muri Kamena 2020 yagiriwe icyizere cyo kongera kuba Umunyamabanga wa Commonwealth muri manda ya kabiri.

Mu tuntu n’utundi twaranze ubuzima bwa Scotland Patricia harimo nko kuba muri Mutarama 2009 yarahaniwe kuba yarakoreshaga umukozi ufite pasiporo y’impimbano aho uyu mukozi yaje gukatirwa amezi 8 anacibwa ihazabu y’ibihumbi 95 by’amayero anasubizwa muri Tonga aho akomoka. Scotland yaciwe ibihumbi 5 by’amayero azira kuba yarakoresheje uyu mukozi witwaga Lolo Tapui ni we wamukoreraga amasuku.

Muri 2020 yashinjwe gutanga isoko ry’umugenzuzi wa Commonwealth mu buryo bunyuranije n’amategeko akariha inshuti ye. Scotland kandi yagiye akora ibikorwa bitandukanye byo gufasha abana, abagore n’imiryango itishoboye yaba mu by’amategeko no mu bindi.

Yegukanye ibihembo bitandukanye birimo n’impamyabumenyi y’icyubahiro yahawe na Kaminuza ya East London muri 2005. Yagiye kandi ashyirwa ku rutonde rw’abagore b'ibikomerezwa ku isi n’ibinyamakuru bitandukanye mu myaka inyuranye. Ibinyamakuru byamushyize kuri urwo rutonde harimo BBC n’ibindi. Muri Mutarama 2014 yagizwe Umuyobozi wa Kaminuza ya Greenwich.

Mu buzima bwo ku ruhande, atuye mu murwa mukuru w’u Bwongereza, London, aho abana n’umugabo we Richard Mawhinney nawe w’umunyamategeko hamwe n’abahungu babo babiri.

Umwana we Mathew Mawhinney yagaragaye mu kiganiro cy’uruhererekane cya Too Hot to Handle muri 2021akaba yaraje no gutabwa muri yombi kubera yitwaje izina rya nyina ubwo yari mu ndege asaba icyo kunywa ku ngufu ngo bamwubahe bihute kuko akaze ati:”Reba Mama uwo ari we ihute unzanire icyo kunywa.”

Ari mu bashyitsi b'imena bari mu Rwanda mu nama ya CHOGM

Kuwa 20 Kamena 2022 ubwo yakirwaga na Perezida Kagame muri Village Urugwiro barebera hamwe ibijyanye n'imigendekere myiza ya CHOGM 2022

Madamu Jeannette Kagame na Patricia Scotland mu ihuriro ry'abari n'abategarugori bo mu muryango wa Commonwealth

Inama ya CHOGM irakomeje ku nshuro yayo ya 26 aho iri kubera mu Rwanda nyuma y'imyaka 14 itabera muri Africa

Ni ibikorwa byinshi biteganijwe muri iyi nama yitabiriwe n'abanyarwanda n'abanyamahanga benshi biganjemo abaturuka mu bihugu bya Commonwealth






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND