AC Milan y'intizanyo n'imisago yegukanye Serie A nyuma y'imyaka 11 y'amapfa

Iyi kipe yashinzwe mu 1899, yatwaye Shampiyona y'uyu mwaka ihigitse Inter Milan ya kabiri ku rutonde rwa Shampiyona, Napoli ya Gatatu ndetse na Juventus yacitse intege kuva mu myaka ibiri ishize.

AC Milan babyinirira amazina ya 'I Rossoneri' na 'Il Diavolo' bisobanuye amashitani, yegukanye igikombe ku munsi wa 38 ari nawo wa nyuma wa Shampiyona, nyuma yo kwitwara neza ikanyagira ikipe ya Sasuolo yari ku kibuga cyayo.

Tomori na Giroud

Mu mukino wa nyuma wahaye igikombe AC Milan, rutahizamu Olivier Giroud w'umufaransa yatsinze ibitego bibiri ku minota ya 17 na 32 byabanjirije icya gatatu cyatsinzwe na Frank Kessie ku munota wa 36, byuzuza ibitego bitatu bya AC Milan ku busa bwa Sasuolo.

Ku rundi ruhande, Inter Milan yari irekereje itegereje ko AC Milan yakira ikosa igatakaza igikombe, nayo yatsinze ibitego bitatu ku busa (3-0) bwa Sampdoria Genoa.

AC Milan y'umutoza Stefano Pioli, yasoje umwaka wa Shampiyona ifite amanota 86, itungura benshi bijyanye n'uko yatangiye uyu mwaka w'imikino idahabwa amahirwe ugereranyije na Inter Milan, Napoli na Juventus.

Abakinnyi ba AC Milan barimo rutahizamu w'imyaka 40, Zlatan Ibrahimovic utari wizewe na benshi kubera imvune za hato na hato zatumye asiba imikino itandukanye kuva mu myaka ine ishize.

Hari kandi Olivier Giroud wanatsinze ibitego bibiri ku mukino wa nyuma, wageze i Milan mbere yo guca muri Arsenal na Chelsea zo mu Bwongereza, aho atafatwaga nk'umukinnyi wafasha ikipe gutwara igikombe cya Shampiyona.

Mu bakinnyi ngenderwaho b'iyi kipe kandi hari Alessandro Frolenzi usanzwe ari intizanyo ya Paris Saint Germain, na Fikayo Tomori ukina nk'intizanyo ya Chelsea yo mu Bwongereza.

Tomori

AC Milan kandi yari ifite inkingi ya mwamba, Frank Kessie wasoje amasezerano y'akazi i Milan, aho biteganijwe ko mu minsi ya vuba azerekeza mu ikipe ya FC Barcelona ataguzwe.

Milan yaherukaga igikombe muri 2011, ubwo yatozwaga na Maximilliano Allegeri wari ufite abakinnyi bakomeye nka; Mark van Bommel, Andrea Pirlo, Gennaro Gattuso, Clarence Seedorf, Zalatan Ibrahimovic, Robinho n'abandi.

Mu myaka 11 yari ishize abafana ba AC Milan batabona igikombe cya Shampiyona, ibikombe 10 bikurikiranye byose byatwawe na Juventus, mu gihe igiheruka cy'umwaka wa 2020-2021 cyatwawe na Inter Milan.

Amakipe azahagararira u Butaliyani muri UEFA Champions League ni; AC Milan, Inter Milan, Napoli na Juventus mu gihe Lazio na AS Roma bo bazitaba muri UEFA Europa League.

Byari ibyishimo

San Siro hari umunezero