Kigali

USA: Mupenzi Inshongore yasohoye indirimbo yahimbiye umugore we-VIDEO

Yanditswe na: Janvier Iyamuremye
Taliki:13/05/2022 16:12
0


Umuhanzi w’umunyarwanda Mupenzi Inshongore ukorera umuziki mu Leta Zunze Ubumwe za Amerika, yasohoye amashusho y’indirimbo ye nshya yise “Mbogamizi” yahimbiye umugore we bemeranyije kubana nk’umugabo n’umugore mu 2020.



Mupenzi yabwiye INYARWANDA ko mu ntangiriro za 2020, ari bwo yemeranyije n’umugore we kubana akaramata ahita agira igitekerezo cyo kumuhimbira indirimbo igaruka ku rukundo yamukunze n’urugo rwabo.

Uyu muhanzi avuga ko icyo gihe yari umunyeshuri muri Kaminuza yo mu Bubiligi, afite umwanya uhagije ajya mu nganzo yandika iyi ndirimbo.

Mupenzi avuga ko atari afite igitekerezo cyo kujyana iyi ndirimbo muri studio ahubwo ‘numvaga nzajya nyicuranga hamwe n’izindi mfite’.

Uyu muhanzi avuga ko iyi ndirimbo yakomeje kuyiririmbira inshuti ze n’abo mu muryango we, aza guhura na Daniel Ngarukiye ubarizwa mu Bufaransa amugira inama yo kuyikora muri studio.

Ati “Igitecyerezo cyaje cyo kuyikora giturutse ku mukirigitananga wi’nshuti yanjye, Ngarukiye Daniel niwe wangiriye inama ati ‘uzayikore ni nziza rwose’.”

Akomeza ati “Mbogamizi rero ni iy'urukundo natuye umufasha wanjye. Ariko yafasha benshi bakundana, nifuje ko abumva ikinyarwanda bose bayikoresha bakayumva kandi izabaryohera cyane.”

Mupenzi avuga ko imyaka ibiri ishize ari kumwe n’umukunzi we. Kandi bahuriye muri Kaminuza.

Uyu muhanzi avuga ko mu gihe amaze arwubakanye n’umukunzi we, yishimira icyizere bafitanye no kuganira bagahuza muri buri kimwe.

Mupenzi agira inama abari mu rukundo kuganira, kuko havamo umuti urambye. Ati “Nabagira inama yo kwizerana kandi bakaganira bagahuza imitima (Fellowship). Urugo rutaganira byanze bikunze satani ararugenderera.”

Uyu muhanzi yagize uruhare mu gushinga amatorero arimo Inshongore z’Urukaka hamwe n’Indahangarwa.

Avuga ko yishimira uruhare rwe ‘mu guhuza urubyiruko’ rufite intego yo guteza imbere ‘gakondo yacu n’ubu kandi baba ari intore zihamije intambwe’.

Avuga ko umuziki ari ikintu amazemo igihe. Ariko ntiyigeze na rimwe atekereza ko azakora indirimbo, kuko kenshi yaririmbanaga n’abandi mu bitaramo.

Ati “Bitewe n'umwanya mucye uba i Burayi, tuvanga amasomo n'akazi ugasanga biragoye kujya muri studio, mpitamo kubikora nishimisha kuko mbikunda.”

Muri iki gihe, uyu muhanzi abarizwa mu Mujyi wa Chicago muri Amerika. Mupenzi avuga ko we n’umukunzi we bateganya kuza mu Rwanda bidatinze.

Iyi ndirimbo yasohoye yise ‘Mbogamizi’ yakozwe mu buryo bw’amajwi na Didier Touch, naho amashusho akorwa na Bob Chris Raheem afatanyije na Karpet Pixelz.

Amashusho y’iyi ndirimbo yafatiwe mu Rwanda, ndetse afatirwa no muri Amerika. 

Mupenzi yasohoye amashusho y’indirimbo yahimbiye umugore we barushinze mu 2020 

Mupenzi yavuze ko yishimira uruhare yagize mu gushinga amatorero arimo 

Mupenzi yavuze ko agiye gukora umuziki n’ubwo afite umwanya mucye, bitewe n’amasomo ari gukurikirana muri Kaminuza

KANDA HANO UREBE AMASHUSHO Y’INDIRIMBO ‘MBOGAMIZI’ YA MUPENZI INSHONGORE

">






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND