RFL
Kigali

Britney urusha Asghari imyaka 12 ni we wateye intambwe ya mbere! Urugendo rw’urukundo rw'aba bombi bitegura kwibaruka-AMAFOTO

Yanditswe na: Abitije Seraphin Elise
Taliki:13/05/2022 13:44
1


Britney Spears w’imyaka 40, umubyeyi w’abana babiri akomeje kugirana ibihe byiza n’umukunzi we w’imyaka 28 banitegura kwibaruka umwana wabo wa mbere. Aba bombi bamaranye imyaka irenga 5 mu munyenga w’urukundo waranzwe n’ibihe bitoroshye ariko bagakomeza gukundana.



Urukundo rwa Britney Spears na Sam Asghari ruri kugenda ruryoha nkuko bakomeza kugenda babisangiza ababakurikira ku mbuga nkoranyambaga. Bakunze kugaragara basohokanye basangira ubuzima mu bice binyuranye by’isi.

Gusa na none bagiye bahura n’imbogamizi zitandukanye zirimo ibibazo bya Britney Spears byatumye yamburwa uburenganzira bwo kwigenga ku mutungo we kuva afite imyaka 27 aho se ari we wamufashaga muri buri kimwe.

Nk'uko Britney yabitangaje mu kwezi kwa Kamena ni kimwe mu bihe bikomeye yahuye nabyo aho atashoboraga kuba yakora ubukwe cyangwa ngo abe yabyarira mu bihe yarimo anyuramo ibi akaba yarabivugiye mu rukiko.

Kuri ubu rero asigaye yarahawe uburenganzira yari yarambuwe nk'uko byatangajwe n’umucamanza Brenda Penny mu kwezi k'Ugushyingo 2021, ibintu byanahaye urubuga urukundo rwa Britney wamusabye ko bazabana mu kwezi kwa Nzeri 2021.

Uyu munsi INYARWANDA igiye kugaruka ku bihe byaranze urukundo rwa'ba bombi bamaze imyaka 5 bari mu rukundo kuva bahurira mu ‘Slumber Party’, Britney ubwe akaba ariwe utera intambwe yo guhamagara Sam nyuma y'amezi atanu bahuye kuri ubu bakaba bitegura kwibaruka umwana wabo wa mbere.

2016: Guhura kwabo mu buryo butunguranye

Britney na Sam bahuye bwa mbere mu mwaka wa 2016, ubwo Sam yamufashaga mu ikorwa ry’amashusho y’indirimbo ye ‘Slumber Party’ nk'uko Britney yabisobanuriye radiyo ya CBS muri Mutarama 2017 ati:”Twarimo dutegura ifatwa ry’amashusho ubwo twari dutegereje ko ibintu bijya mu buryo nk’iminota 20 turi kumwe byabaye ngombwa ko dutangira kuganira, byaje kurangira duhanye nimero za telefone.”

Nyuma baje gutandukana birangira amuhamagaye, Britney Spears akaba ari we wari uteye intambwe yo guhamagara Sam Asghari, batangira kuganira ikiganiro cyaranzwe n’ibihe bisekeje cyane, urugero ni nk'ukuntu Sam yamusubirishijemo asa nk'utamumenye kuko hari haciye amezi agera kuri atanu bavuganye. Britneye yamuhamagaye agira ati: ”Bite ni Britney”, undi nawe akomeza amusubirishamo ati: ”Izina ni irihe na none.”

Kuwa 26 Ugushyingo 2016: Guhura no gusangira bwa mbere 

Nubwo Britney Spears ari we wateye intambwe ya mbere ahamagara Sam, ariko ubwo bahuraga uyu musore ni we watangiye kugaragaza ko yishimiye cyane guhura na Britney mu mafoto yashyize ku rubuga rwe mbere y'uko ayasiba nk'uko tubikesha urubuga rwa US Weekly yagize ati: ”Uri uw'agatangaza n’igikundiro.”

Kuwa 01 Mutarama 2017: Gutangaza ko bari mu rukundo


Mu ntangiriro z’umwaka ni bwo aba bombi bagaragaje ko bari mu rukundo aho Britney Spears yasangije abakunzi be bari hirya no hino umukunzi we mushya mu mafoto atandukanye aberekana bari kurya ubuzima mu biruhuko byabo bya mbere nk’abakundana.

Kuwa 16 Werurwe 2017: Bahuye n’imiryango

Umuhangamideli Michael Costello yatangaje ko Sam yiteguye kwereka umuryango we igikomangokazi cy’injyana ya Pop ubwo yashyiraga ifoto y'aba bombi bitabiriye ibirori bye by’imideli bya Stello byari byatambutsemo na mushiki wa Sam witwa Fay.

Kuwa 05 Kamena 2017: Byagaragaye ko ntacyabatanya

Ubwo aba bombi bajyanaga mu Buyapani bikemezwa ko kuba umwe yasiga undi n’isegonda rimwe bitagikunda, Sam yabaye hafi Britney mu myiteguro no mu gihe cy'igitaramo yari afite muri iki gihugu.

Kuwa 09 Nzeri 2017: Umunsi w’ibyishimo mu isi ya babiri

Britney n’umukunzi we Sam bari buje akamwenyu ubwo bahuriraga mu birori by’isabukuru y’abana b’uyu muhanzikazi yabyaranye n’umugabo we wa mbere Kevin. Umwana umwe wizihiza isabukuru kuwa 12 Nzeri, undi kuya 14 Nzeri.

Kuwa 29 Ugushyingo 2017: Basangiye ubuzima umwe yicaye iruhande rw'undi


Bagaragaye bagiye kureba umukino wa Lakers yakinaga na Golden State Warriors umukino wabereye muri Leta ya Los Angeles.

Kuwa 02 Ukuboza 2017: Bizihije bari kumwe isabukuru y’amavuko ya Britney

Sam Asghari ubundi usanzwe ari umunyamideli n’umukinnyi wa filimi yizihizanije isabukuru y’amavuko na Britney nk'uko bigaragara mu mashusho yashyize hanze agaragaza Britney Spears yunamye arimo kuzimya Bougie nyinshi yari yakirijwe.

Sam yasangije abamukurikira yongeyeho ubutumwa bugira buti:”Warakoze kuba wowe, warakoze kunyereka igisobanuro nyacyo cy’umugore nyawe. Ninjye mugabo w’umunyamahiwe kuri uy’umugabane.”

Gashyantare 2018: Britney yateye imitoma Sam

Yamutakagije agira ati: ”Maranye umwaka n’uyu mugabo buri munsi mwigiraho ikintu gishya gituma mpora numva ari njye mukobwa w’umunyamahirwe mu isi.”

Kuwa 12 Mata 2018: Umunsi uteye ishema


Sam yaserukanye n’umukunzi we ubwo yahabwaga igihembo na Glaad Media Award muri Leta ya Los Angeles ashimirwa ko yateje imbere uburinganire n’uburenganzira bw’ababana bahuje ibitsina.

Kuwa 20 Nyakanga 2018: Sam yongeye gutaka Britney

Haciyeho umwaka n’igice Sam yongeye kugira icyo atangaza mu kiganiro na Men’s Health agira ati: ”Antera imbaraga kurusha undi wese, biratangaje kuba mu rukundo n’umuntu w’igitangaza nkawe.”

Muri Mata 2019: Bagaragaje gufashanya


Sam yavugiye Britney ubwo hari hatangiye gukwirakwira amakuru ko yataye ubwenge, uyu mugabo yavuze ko ibyo Britney yavuze byari bikwiye kandi ari amagambo yuje ubwenge abantu bakwiye kwigiraho. Icyo gihe Britney yari yavuze ko yumva anyotewe no gutwara ubwenge, umubiri na roho y’umuntu.

Kuwa 22 Nyakanga 2019: Batambutse ku itapi itukura bari kumwe

Britney na Sam batambutse bwa mbere ku itapi itukura bari kumwe mu birori byabereye muri Leta ya Los Angeles mu ishiyirwa hanze rya filime y’uruhererekane yitwa ‘Once Upon Time’ ibi birori bikaba byarabereye mu gace kazwi cyane ka Hollywood.

Kuwa 11 Gicurasi 2020: Ibihe bya COVID-19


Mu bihe by’umwaduko wa COVID19 watangirnye n'ibihe bya Guma mu rugo, aba bombi bakomeje gusangiza amashusho ababakurikira bari gukora imyitozo ngororamubiri.

Kuwa 06 Werurwe 2021: Batangaje ko bifuza kubyara

Mu kiganiro Sam yagiranye n’ikinyamakuru cya Forbes Magazine, yatangaje ko yifuza gushyira ibintu ku rundi rwego kandi ko nubwo yakwibaruka ntacyo bimutwaye ati:”Ndifuza gushyira umubano wacu ku rundi rwego, ndashaka kuba umubyeyi w’umunyembaraga kandi hakiri kare.”

Kuwa 12 Nzeri 2021: Sam yamusabye ko bazabana

Nyuma y’imyaka 5 bari mu munyenga w’urukundo, Sam yasabye umukunzi we ko bazabana, bishimisha cyane Britney nk'uko bigaragara mu mashusho yashyize hanze avuga ko atabyizera ko yamaze kwambikwa impeta.

Kuwa 12 Ugushyingo 2021: Uburenganzira bwo kwigenga

Hashize imyaka itari micye Britney Spears asaba ko yahabwa uburenganzira bwo kwigenga yari yarambuwe guhera afite imyaka 27, urukiko rwemeje ko ahabwa uburenganzira. Ibi byahise biha aba bombi kuba bakora ubukwe igihe babishakiye. Mbere ntibari borohewe ko babasha kubukora kuko hari uburenganzira Britney Spears atari afite. Nk'uko Umunyamategeko Sarah Wentz yabitangaje byari ibyishimo bikomeye. Sam yagize ati: ”Ubwingenge, amateka yiyanditse none ubu Britney arigenga.”

Kuwa 02 Ukuboza 2021: Ibirori by’agatangaza by’isabukuru y’amavuko y’imyaka 40


Nyuma y'uko Britney abonye ubwigenge akanatangaza ko yiteguye gukora ubukwe kandi buteguye mu buryo bwagutse, ku isabukuru ye y’imyaka 40 bakoze ibirori bitangaje maze Sam akora mu nganzo amutaka ubwiza n’ubushongore ati: ”Nkwita intare y’ingore kuko nizerera mu ntege zidasanzwe zawe. Iteka nterwa ishema n’umutima mwiza ugira, nishimira iteka inseko yawe isusurutsa isi yanjye. Umunsi wose n’isabukuru y’amavuko yawe mwamikazi wanjye umunsi mwiza w’amavuko mugore wanjye.”

Kuwa 11 Mata 2022: Gutwita kwa Britney Spears

Britney yatangaje ko atwite kuwa 11 Mata 2022, bivuze ko we na Sam bagiye kugira umwana wabo wa mbere. Mu butumwa yashyize ku rubuga rwe rwa Instagram yagaragaje ko yabanje kwibaza niba ibyo acyeka ari byo atari uguhaga ariko nyuma aza gusanga atwite.

Barushanwa imyaka 12 



 






TANGA IGITECYEREZO

Izina ryawe
Email yawe
Andika igitecyerezo

IBITECYEREZO

  • Nduwimana christophe1 year ago
    Urukundo ntamupaka





Inyarwanda BACKGROUND