Canisius ufatwa nk’inyenyeri imurikira Mukura, yahawe igikombe n’Abafana – AMAFOTO

Ku wa gatandatu tariki ya 12 Gashyantare 2022, kuri Stade ya Huye, Mukura Victory Sport yahatsindiye Rayon Sports igitego 1-0 mu mukino w’umunsi wa 16 wa shampiyona y’u Rwanda, bituma iyi kipe y’i Huye yandika amateka yo gutsinda Rayon Sports na APR FC mu mikino ikurikiranye.

Nyuma yo gutsinda Rayon Sports igitego 1-0 cyatsinzwe na Opoku Mensah kuri penaliti, Mukura yazamutse ku rutonde rwa shampiyona aho yahise inganya amanota na Rayon Sports.

Umukino ukirangira Abafana ba Mukura Victory Sport bibumbiye mu itsinda rya ‘Trust Support Fan Club’ bashimiye umutoza w’iyi kipe, Nshimiyimana Canisius kubyo yagejeje ku ikipe muri rusange.

Aba bafana bahaye Canisius igikombe ndetse n’ibahasha irimo amafaranga twamenye ko ari hejuru y’ibihumbi ijana gusa ntawamenye umubare nyawo.

Impamvu nyamukuru yatumye aba bafana bashimira uyu mutoza ni ibikorwa yakoreye ikipe kuva yayisigarana nyuma yuko Ruremesha yirukanwe, ndetse agashyira buri kimwe ku murongo atsinda APR FC ndetse akanagira uruhare mu gutsinda Rayon Sports.

Kuva yasigarana iyi kipe nk’umutoza w’umusigire, nta mukino Canisius yigeze atsindwa cyangwa ngo anganye.

Mukura Victory Sport yitegura Gasogi ku mukino w’umunsi wa 17 wa shampiyona y’icyiciro cya mbere mu Rwanda, ubu inganya amanota na Rayon Sports 26.

Nshimiyimana Canisius yashimiwe ibikorwa bikomeye yakoreye Mukura

Abafana ba Mukura banyuzwe cyane n'umusaruro w'ikipe yabo yagaritse APR FC na Rayon Sports

Opoku Mensah watsinze igitego kuri Rayon Sports n'umutoza w'ungirije muri Mukura